ကရင်ပြည်နယ်၊ ကော့ကရိတ်မြို့နယ် အာရှလမ်းပိုင်းကို စစ်ကြောင်းထိုးလာသည့် အကြမ်းဖက် စစ်တပ်ကို ကြားဖြတ် တိုက်ခိုက်ရာ စစ်တပ်ဘက်မှ ၇၀ ကျော် သေဆုံးပြီး အထိနာကာ ပြန်လည် ဆုတ်ပြေးသွားကြောင်း ဗျူဟာ ၃၁ လုံခြုံရေးတပ်ခွဲမှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဩဂုတ်လ ၉ ရက်နေ့နှင့် ၁၅ ရက်နေ့တို့တွင် ကော့ကရိတ်မြို့နယ် အာရှလမ်းပိုင်းကို အင်အား အလုံးအရင်းဖြင့် စစ်ကြောင်းထိုးလာသော အကြမ်းဖက် စစ်တပ်ကို ဗျူဟာ ၃၁ အပါအဝင် KNU ၊ KNLA ၊ KNDO နှင့် PDF ပူးပေါင်းတပ်များက တတန်ကူးကျေးရွားအနီးတွင် ခုခံ တိုက်ခိုက်ခဲ့ပြီး တိုက်ပွဲပြင်းထန်စွာ ဖြစ်ပွားခဲ့ကြောင်း သိရသည်။
ထို ထိတွေ့ တိုက်ပွဲ ၂ ကြိမ် အတွင်း အကြမ်းဖက် စစ်တပ်ဘက်မှ ၇၀ ကျော်သေဆုံးကာ ထိခိုက်ဒဏ်ရာရရှိသူ ၆၀ နီးပါးရှိကြောင်း၊ တိုက်ပွဲများ အတွင်း အကြမ်းဖက် စစ်တပ်ဘက်မှ အထိနာပြီး တပ်လှန်ကာ အကြိမ်ကြိမ် နောက်ပြန်ဆုတ်သွားသော်လည်း အင်အားများ ထပ်မံ ဖြည့်တင်းကာ ထိုးစစ်ဆင်နေသောကြောင့် တိုက်ပွဲများ နေ့စဉ် ဖြစ်ပွားလျက်ရှိကြောင်း သိရှိရသည်။
အကြမ်းဖက် စစ်တပ်သည် အာရှလမ်းပိုင်းကို ပြန်လည် စိုးမိုးနိုင်ရန်အတွက် ကော့ကရိတ်မြို့ထဲတွင် အင်အား ထောင်နှင့်ချီဖြည့်တင်းထားကာ အောင်ဇေယျ စစ်ကြောင်းသည်လည်း တောနော်ရေတံခွန်း အနီးတွင်ရှိနေသေးကြောင်း သိရသည်။
“ဩဂုတ်လ ၉ ရက်နေ့ကနေစပြီး နောက်ပိုင်း တောက်လျှောက်ဖြစ်နေတာ သူတို့ဘက်က အင်အား ၄၀၀ နီးပါနဲ့ တပ်အင်အားက ကော့ကရိတ်ထဲမှာကို ထောင်နဲ့ချီလောက် အင်းအားဖြည့်ထားတယ်။ အဲလို အင်အားဖြည့်ပြီး အာရှလမ်းဘက်ကို စစ်ကြောင်းထိုးနေတ, ဩဂုတ်လအတွင်း ဖြစ်တဲ့ တိုက်ပွဲတွေမှာ စစ်ခွေး ၇၀ ကျော်လောက်သေဆုံးတယ်။ ၆၀ နီးပါလောက်က ထိခိုက် ဒဏ်ရာရတယ်။ ၉ ရက်နေ့နဲ့ ၁၅ ရက်နေ့ကတော့ တိုက်ပွဲ အပြင်းထန်ဆုံးပဲ ကျန်ရက်တွေမှာလည်းထိတွေ့မှုက တောက်လျှောက်ပါပဲ။ လက်ရှိ အထိ စစ်ခွေးတွေနဲ့ ထိတွေ့ တိုက်ပွဲဖြစ်ပွားနေတုန်းပဲ။ အခု စစ်ကြောင်းက တတန်ကူး တစ်ဝိုက်မှာပဲ တက်လိုက်ပြန်လန်းကျလိုက်နဲ့ ရှေ့ဆက်မတိုးနိုင်သေးတဲ့အနေထားပါ။ လူနည်းစု အာဏာရှင်တွေအတွက် အသက် အသေမခံဘဲ အလင်းဝင်လာကြပါလို့ ကျနော်တို့ တော်လှန်ရေးအဖွဲ့တွေက ကြိုဆိုနေပါတယ်လို့ ပြောချင်ပါတယ်” ဟု People Defense Force မှ တာဝန်ရှိသူတစ်ဦးကပြောဆိုသည်။
အလားတူ မြဝတီမြို့တွင်းတွင်လည်း အကြမ်းဖက် စစ်တပ်က တပ်အင်အား ဖြည့်တင်းနေကာ အာရှလမ်းပိုင်းကို နှစ်ဖက် ညှပ်၍ စစ်ကြောင်းထိုးရန် ပြင်ဆင်နေပြီး တိုက်ပွဲများ ဆက်လက် ပြင်းထန်လာနိုင်ကြောင်း ဒေသတွင်း စစ်ရေး သတင်းရင်းမြစ်က ပြောဆိုသည်။
