နယ်စပ်ဒေသ တည်ငြိမ်အေးချမ်းရေး အတူ ထိန်းသိမ်းရန်နှင့် မြန်မာ့မြေ ပေါ်မှ တရုတ်အကျိုးစီးပွားများ ဘေးကင်းလုံခြုံရေး အာမခံပေးရန် ရှီကျင့်ပင်တောင်းဆို
ရန်ကုန်၊ ဩဂုတ် ၃၁
မြန်မာနိုင်ငံမြောက်ပိုင်း ငြိမ်းချမ်းရေးနှင့် တည်ငြိမ်ရေးအတွက် တရုတ်က အပြု သဘောဆောင်သော အခန်းကဏ္ဍမှ ပါဝင်နေကြောင်း အကြမ်းဖက် မင်းအောင်လှိုင်က ထုတ်ဖော်ပြောဆိုသည်။
ယမန်နေ့ တရုတ်နိုင်ငံတွင် တရုတ်သမ္မတ ရှီကျင့်ပင်နှင့်တွေ့ဆုံစဉ် အကြမ်းဖက် မင်းအောင်လှိုင်က ထိုသို့ ထုတ်ဖော်ပြောဆိုလာခြင်းဖြစ်သည်။
တရုတ်အနေဖြင့် မြန်မာနိုင်ငံ မြောက်ပိုင်း ငြိမ်းချမ်းရေး နှင့် တည်ငြိမ်ရေးအတွက် အပြုသဘောဆောင်သော အခန်းကဏ္ဍမှ ပါဝင်ကြောင်း၊ထို့ကြောင့် မင်းအောင်လှိုင်က တရုတ်တစ်နိုင်ငံတည်းမူဝါဒ（One China Policy）ကို ခိုင်ခိုင်မာမာ လက်ကိုင်စွဲထားမည်ဖြစ်ကြောင်း ပြောဆိုခဲ့သည်။
တရုတ်သမ္မတ ရှီကျင့်ပင်ကမူ တရုတ်-မြန်မာ နယ်စပ်ဒေသ တည်ငြိမ်အေး ချမ်း ရေးကို အတူတကွထိန်းသိမ်း၍ မြန်မာနိုင်ငံရှိ တရုတ်စီမံကိန်းမှဝန်ထမ်းများ၊ အဖွဲ့အစည်းများနှင့် စီမံကိန်းများ၏ ဘေးကင်းလုံခြုံမှုကို အာမခံပေးရမည်ဟု မင်းအောင်လှိုင်ကို တောင်းဆိုသည်။
ထို့ပြင် တရုတ်နိုင်ငံအနေဖြင့်မြန်မာနိုင်ငံက မိမိနိုင်ငံအခြေအနေများနှင့် ကိုက်ညီသည့် ဖွံ့ဖြိုးတိုးတက်ရေးလမ်းစဉ်ကို လျှောက်လှမ်းခြင်း၊ အချုပ်အခြာ အာဏာ၊ လုံခြုံရေး၊ ဖွံ့ဖြိုးတိုးတက်ရေးအကျိုးစီးပွားများကို ကာကွယ်စောင့် ရှောက်ခြင်းကို အားပေးထောက်ခံ လျက်ရှိပါကြောင်း၊ တရုတ်နိုင်ငံသည် မြန်မာ နိုင်ငံ ငလျင်အပြီး ပြန်လည်တည်ဆောက်ရေးလုပ်ငန်း၊ ပြည်သူ့လူနေမှုဘဝမြှင့်တင်ခြင်း၊ မြန်မာနိုင်ငံ စည်းလုံးညီညွတ်ပြီး ပြည်တွင်းနိုင်ငံရေး အင်အားစုများစွာကို စုစည်း၍ တည်ငြိမ်မှုနှင့် ဖွံ့ဖြိုးတိုးတက်မှု ပြန်လည်ရရှိစေရေးကိုလည်း ထောက်ခံကြောင်း၊ နှစ်နိုင်ငံ တရုတ်-မြန်မာ စီးပွားရေးစင်္ကြံ၏ အဓိကစီမံကိန်းများကို တွန်းအားပေးပြီး စီးပွားရေးနှင့် ကုန်သွယ်မှု ပူးပေါင်းဆောင်ရွက်မှုကို မြှင့်တင်သွားကြရန်၊ နယ်စပ်ဖြတ်ကျော် ရာဇဝတ်မှုများကို ပူးတွဲတိုက်ဖျက်ရန် ရှီကျင့်ပင်က ပြောဆိုကြောင်း သိရှိသည်။
အကြမ်းဖက် မင်းအောင်လှိုင်သည် ဩဂုတ်လ ၃၀ ရက်နေ့မှ စက်တင်ဘာလ ၆ ရက်နေ့အထိ တရုတ်နိုင်ငံသို့ သွားရောက်နေခြင်းဖြစ်ပြီး ၎င်း၏ ဒုတိယအကြိမ် မြောက်တရုတ်ခရီးစဉ်လည်းဖြစ်သည်။
