အကြမ်းဖက် စစ်တပ်၏ ရွေးကောက်ပွဲသို့ ပူးပေါင်းပါဝင် ကူညီ ပံ့ပိုးမှုများ လုံး၀(လုံး၀) မပြုလုပ်ရန် KNU တပ်မဟာ ၆ က ကြေညာလိုက်ပြီး လိုက်နာခြင်းမရှိသော လူပုဂ္ဂိုလ်နှင့် အဖွဲ့အစည်းများအားလုံးကို ထိရောက်စွာ အရေးယူမည်ဟု သတိပေး

ရန်ကုန်၊ ဩဂုတ် ၃၁

အကြမ်းဖက် စစ်တပ်၏ ရွေးကောက်ပွဲသို့ ပူးပေါင်းပါဝင် ကူညီ ပံ့ပိုးမှုများ လုံး၀(လုံး၀) မပြုလုပ်ရန် KNU တပ်မဟာ ၆ က ယမန်နေ့ ညပိုင်း ထုတ်ပြန်ကြေညာလိုက်ပြီး လိုက်နာခြင်း မရှိသော လူပုဂ္ဂိုလ်နှင့် အဖွဲ့အစည်းများအားလုံးကို ထိရောက်စွာ အရေးယူမည်ဟု သတိ ပေးလိုက်သည်။

အကြမ်းဖက် အာဏာသိမ်းထားသည့် စစ်တပ်က တရားမဝင် ၂၀၀၈ ဖွဲ့စည်းပုံ အခြေခံဥပဒေကို လိုအပ်သလို အသုံးချ၍ ပြည်သူလူထုတရပ်လုံးအပေါ် ရေရှည် ဆက်လက် ဖိနှိပ် အုပ်ချုပ်နိုင်ရန် ဖြစ်ကြောင်း၊ စစ်တပ်၏ အတုအယောင် ရွေးကောက်ပွဲသည် ပြည်သူ လူထု တစ်ရပ်လုံး၏ သဘောထားကို ဆန့်ကျင်၍ အကြမ်းဖက်မှု ခြိမ်းခြောက်မှု အတင်း အဓမ္မ ဖမ်းဆီးမှု စသည့် လုပ်ရပ်များ ကျူးလွန်ပြီး ပြုလုပ်မည့် ရွေးကောက်ပွဲ ဖြစ်သည့် အတွက် လက်ရှိ နိုင်ငံရေးပဋိပက္ခကို ဖြေရှင်းနိုင်မည့် နည်းလမ်းမဟုတ်ကြောင်း KNU တပ်မဟာ ၆ က ကြေညာထားသည်။

လက်ရှိ ရွေးကောက်ပွဲသည် စစ်မှန်ပြီး တရားမျှတသည့် ရွေးကောက်ပွဲ မဟုတ်ဘဲ အကြမ်း ဖက်အာဏာသိမ်း စစ်ကော်မရှင် ဗိုလ်ချုပ်များနှင့် မိသားစုဝင်များ၊ ၎င်းတို့၏ အသိုင်းအ၀ိုင်း၊ အပေါင်းအပါများ၊ စစ်တပ် လက်သပ်မွေးထားသည့် နိုင်ငံရေးအမည်ခံပါတီများ အာ ဏာ ရရှိရေးအတွက်သာဖြစ်ပြီး တိုင်းရင်းသားပြည်သူအားလုံးအတွက် မည်သည့် အကျိုး ကျေးဇူးမှ ရရှိမည်မဟုတ်ကြောင်း KNU တပ်မဟာ ၆ က ပြောဆိုသည်။

ထို့ကြောင့် KNU တပ်မဟာ ၆ နယ်မြေအတွင်းရှိ လူပုဂ္ဂိုလ်များ၊ ဘာသာရေး ခေါင်းဆောင်များ၊ လူမှုအဖွဲ့အစည်းများ၊ NGOs ၊ INGOs များအနေဖြင့် တစ်ဦးချင်းအရ သော်လည်း ကောင်း၊ အဖွဲ့အစည်းအရသော်လည်းကောင်း စစ်တပ်၏ ရွေးကောက်ပွဲသို့ ကူညီပံ့ပိုး ပူး ပေါင်းပါဝင်ခြင်း လုံး၀ (လုံး၀) မပြုလုပ်ရန် တိုက်တွန်းထားသည်။

KNU တပ်မဟာ ၆ ၏ ကြေညာချက်နှင့် တိုက်တွန်းချက်ကို လိုက်နာခြင်းမရှိသည့် အဖွဲ့အစည်း ဖြစ်စေ၊ လူပုဂ္ဂိုလ်တစ်ဦးချင်း ဖြစ်စေ မည်သူ့ကိုမဆို KNU တပ်မဟာ ၆ က ချမှတ် ထားသော ကော်သူးလေ ဥပဒေနှင့်အညီ ထိရောက်စွာ အရေးယူ ဆောင်ရွက်မည် ဖြစ်ကြောင်း အလေးအနက် သတိပေး ကြေညာထားသည်။