စစ်ကိုင်းတိုင်း၊ ပုလဲမြို့နယ်တွင် အကြမ်းဖက် စစ်တပ် စစ်ကြောင်းကို မိုင်းဆွဲ ပစ်ခတ် တိုက်ခိုက်ရာ စစ်သားများ ထိခိုက်သေဆုံးမှုရှိနိုင်ကြောင်း Chindwin Toe Na Yar PDF မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
စက်တင်ဘာလ ၉ ရက်နေ့ နံနက်ပိုင်းတွင် ပုလဲမြို့နယ်၊ ကုက္ကိုကုန်းရွာမှ ထွက်လာသော အင်အား ၇၀ ခန့်ပါ စစ်ကြောင်းကို တော်လှန်ရေး တပ်ဖွဲ့များက ရှေ့ထွက်မိုင်း ၆ လုံး၊ လက်နက်ငယ်များဖြင့် စောင့်ကြို တိုက်ခိုက်ခဲ့ကြောင်း သိရသည်။
ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ ထိခိုက်သေဆုံးမှု အရေအတွက်ကို အတည်ပြုနိုင်ခြင်းမရှိသေးဘဲ တော်လှန်ရေး ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရှိရသည်။
“စစ်ခွေးတွေ ထိခိုက်သေဆုံးမှုရှိနိုင်ပေမယ့် အရေအတွက်ကိုတော့ အတည်မပြုနိုင်သေးဘူး။ စက်တင်ဘာ ၉ ရက် နံနက်ပိုင်းမှာ တိုက်ပွဲဖြစ်ပွားခဲ့တာပါ”ဟု Chindwin Toe Na Yar PDF မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို ယင်းမာပင်ခရိုင်အမှတ် (၂၉)တပ်ရင်းမှ တပ်ခွဲ ၂ မြေပြန့်ကျား နှင့်အတူ တပ်ခွဲ ၄ မိမိတို့ ချင်းတွင်းတိုးနယား PDF တို့က ပူးပေါင်းလုပ်ဆောင်ခဲ့ခြင်းဖြစ်ကြောင်း သိရသည်။
ပြည်သူများအနေဖြင့် အကြမ်းဖက် စစ်တပ် စစ်ကြောင်းများ အနီး သွားလာနေထိုင်နိုင်ခြင်း မပြုလုပ်ကြရန်နှင့် တော်လှန်ရေး တပ်ဖွဲ့များ၏ သတိပေး ထုတ်ပြန်ချက်များကို လိုက်နာကြရန် မေတ္တာရပ်ခံကြောင်း Chindwin Toe Na Yar PDF က အသိးပေး နှိုးဆော်ထားသည်။
