ပဲခူးနှင့် ရန်ကုန်တိုင်း စစ်ဆင်ရေးအတွက် ပဲခူးပကဖကို ဖွဲ့စည်းလိုက်ပြီး အထူးတိုင်းစစ်ဌာန စစ်ကြောင်းသို့ လွှဲပြောင်း ပူးပေါင်းလိုက်ကြောင်း အထူးတိုင်းစစ်ဌာန တိုင်းကွပ်ကဲရေးမှူး ရဲဘော်အောင်စံရှားက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ အောက်တိုဘာလ ၅ ရက်နေ့ KNU တပ်မဟာ ၁ နယ်မြေတွင် ပဲခူးခရိုင်ပကဖက ဖွဲ့စည်း ထားသည့် တိုက်ခိုက်ရေးစစ်ကြောင်းကို ပြည်သူ့ကာကွယ်ရေးတပ်မတော်၊ အထူးတိုင်းစစ်ဌာန၏ စစ်ဆင်ရေးကွပ်ကဲမှုအောက်တွင် တာဝန်ထမ်းဆောင်စေရန် လွှဲပြောင်းအပ်နှံပွဲ အခမ်းအနားကျင်းပခဲ့ ပြီး ပဲခူးခရိုင်ပကဖတာဝန်ခံ ရဲဘော်ဖြိုးမောင် မှ အထူးတိုင်းစစ်ဌာန တိုင်းကွပ်ကဲရေးမှူး ရဲဘော် အောင်စံရှားထံသို့ ပဲခူးခရိုင်ပကဖ တိုက်ခိုက်ရေးစစ်ကြောင်းကို လွှဲပြောင်း အပ်နှံပေးခဲ့ကြောင်း သိရ သည်။
ပဲခူးခရိုင်ပကဖ တိုက်ခိုက်ရေး စစ်ကြောင်းကို အမှတ် ၁ စစ်ဆင်ရေးနယ်မြေ၊ အထူးတိုင်းစစ်ဌာန၏ စစ်ဆင်ရေးကွပ်ကဲမှူအတွင်းရှိ ဝေါမြို့ နယ် ၊ ကဝမြို့နယ် ၊ သနပ္ပင်မြို့နယ်၊ ပဲခူးမြို့နယ် အခြေစိုက် ပြည်သူ့ကာကွယ်ရေးအဖွဲ့ -ပကဖ ဖြစ်သော အင်းတကော် ပကဖ ၊ ဘုရားကြီးပကဖနှင့် ပဲခူးမြို့နယ် ပဖက တို့မှ ပေါင်းစည်းထားသည့် စစ်ကြောင်း တစ်ခုဖြစ်ကြောင်း၊ PDF တပ်ရင်း/စစ်ကြောင်းစုဖွဲ့မှုအတိုင်း လက်ရုံးတပ်ဖွဲ့များပါ ပြည့်စုံအောင် စုဖွဲ့လေ့ ကျင့်ထားပြီး စစ်ဆင်ရေးများလည်း ပူးပေါင်းဆောင်ရွက်နေပြီဖြစ်ကြောင်း အသိပေးသည်။
“ကျွန်တော်တို့ရဲ့ တော်လှန်ရေးအင်အားစုတွေဟာ ရန်သူ(စကစ) ထက် ယနေ့အချိန်ထိ အင်အား သာလွန်နေဆဲပါ။ ကျွန်တော်တို့ စုစည်းဖို့ပဲလိုတာပါ။ ကျွန်တော်တို့မှာ ခိုင်မာတဲ့စုစည်းမှူနဲ့ ရှိနေတဲ့အရင်းအမြစ်တွေကို မျှဝေပြီး အကျိုးရှိရှိသုံးနိုင်ရင် လာမဲ့ အထွေထွေစစ်ကို အောင်မြင်အောင် စွမ်းဆောင်နိုင်မှာဖြစ်ပါတယ်။ EROs ၊ PDF ၊ ပကဖ တွေကို တစုတစည်းတည်း စုစည်းပြင်ဆင်နေကြပါတယ်၊ Joint Operations Command တစ်ခုတည်းအောက်မှာရှိအောင် တည်ဆောက်နေပြီးဖြစ်ပါတယ်။ ပကဖတွေကို PDF အသွင် လေ့ကျင့်စုဖွဲ့တာသည်လည်း အထွေထွေစစ်အတွက် ကြိုတင်ပြင်ဆင်မှုတစ်ခုပါ၊ ပဲခူးခရိုင်ပကဖသည် အထူးတိုင်းစစ်ဌာနရဲ့ စစ်ဆင်ရေးကွပ်ကဲမှူနဲ့အတူ ပဲခူး၊ ရန်ကုန်စစ်ဆင်ရေးတွေမှာ အစွမ်းကုန် ပူးပေါင်းသွားမဲ့ စိတ်ဓာတ်ပြတ် သားပြီး လေ့ကျင့်သားဝတဲ့ ပကဖ တိုက်ခိုက်ရေးရဲဘော်တွေနဲ့ စုဖွဲ့ထားတဲ့ စစ်ကြောင်းတကြောင်းဖြစ်ပါတယ်” ဟု အထူးတိုင်းစစ်ဌာန တိုင်းကွပ်ကဲရေးမှူး ရဲဘော်အောင်စံရှားက ရန်ကုန်ခေတ်သစ်သတင်းဌာနထံသို့ ပြောဆိုသည်။
ပဲခူးပကဖကို ဖွဲ့စည်းလိုက်ပြီး အထူးတိုင်းစစ်ဌာန စစ်ကြောင်းသို့ လွှဲပြောင်း သည့်အခမ်းအနားသို့ အထူးတိုင်းစစ်ဌာန တိုင်းကွပ်ကဲရေးမှုး ရဲဘော်အောင်စံရှား၊ စစ်ထောက်အရာရှိ ရဲ ဘော် ကွီးသောင်း၊ တိုင်းဆေးတာဝန်ခံ ဒေါက်တာဒေဝ၊ အမှတ် ၃၆ နည်းဗျူဟာမှူး ရဲဘော်ရန်နိုင်၊ပဲခူးတိုင်းပကဖ ထောက်လှမ်းရေးအရာရှိ ရဲဘော်စောဘီလူး ၊ ပဲခူးခရိုင်ပကဖတာဝန်ခံ ရဲဘော်ဖြိုး မောင်နှင့် ခရိုင်တာဝန်ခံများ သက်ဆိုင်ရာမြို့နယ် ပကဖတာဝန်ခံများ တက်ရောက်ခဲ့ကြောင်း သိရသည်။
