စစ်အာဏာသိမ်းမှုကို အားပေးခဲ့သော ဝန်ကြီးဟောင်း စိုးသိန်း၏သား အေးချမ်း လှိုင်သာယာ အရှေ့ပိုင်း ကြံ့ဖွတ် အမတ်လောင်းအဖြစ် ရွေးကောက်ပွဲဝင်သော်လည်း လုံခြုံရေးကြောင့် မဲမဆွယ်ရဲဘဲ အောက်ခြေပါတီဝင်များနှင့်လည်း အဆင်မပြေ

ရန်ကုန်၊ နိုဝင်ဘာ ၂၂

NLD အစိုးရ နှင့်ဒေါ်အောင်ဆန်းစုကြည်ကို အပုတ်ချခဲ့သူ၊ စစ်အာဏာသိမ်းမှုကို အားပေးခဲ့သော ဝန်ကြီးဟောင်း စိုးသိန်းသား အေးချမ်း လှိုင်သာယာမြို့နယ် အရှေ့ပိုင်း ကြံ့ဖွတ် အမတ်လောင်းအဖြစ် ရွေးကောက်ပွဲဝင်သော်လည်း မဲမဆွယ်ရဲဘဲ အောက်ခြေပါတီဝင်များနှင့်လည်း အဆင်မပြေ ဖြစ်နေကြောင်း ကြံ့ခိုင်ရေး သတင်းရင်းမြစ်က ပြောဆိုသည်။

သတင်းမီဒီယာကောင်စီတွင် အတွင်းရေးမှူးရာထူး ထမ်းဆောင်နေသည့်ကြားမှ ကြံ့ဖွတ်ပါတီ၏ လှိုင်သာယာမြို့နယ် အရှေ့ပိုင်း ပြည်သူ့လွှတ် တော်ကိုယ်စားလှယ်လောင်းအဖြစ် ကြံ့ဖွတ်ပါတီကိုယ်စားပြု၍ အေးချမ်းက ဝင်ရောက်ယှဉ်ပြိုင်ကြောင်း၊ သို့ရာတွင် လုံခြုံရေး စိုးရိမ်ချက်ကြောင့် အေးချမ်းမှာ ပေါ်ပေါ်တင်တင် မဲမဆွယ်ရဲဘဲ မဲဆွယ်စည်းရုံးရေး လှုပ်ရှားမှုအများစုတွင် ခိုးကြောင်ခိုးဝှက် လိုက်ပါကြောင်း၊ ယင်းအပြင် လှိုင်သာယာမြို့နယ် အရှေ့ပိုင်းမှ အောက်ခြေ ကြံ့ဖွတ်ပါတီဝင်များနှင့်လည်း အဆင်မပြေကြောင်း၊ အေးချမ်းက အောက်ခြေ ပါတီဝင်များနှင့် သဟဇာတမဖြစ်ဘဲ ခွဲခြားဆက်ဆံမှုများရှိနေကြောင်း သိရှိရသည်။

“သူက ဝန်ကြီးဟောင်း ဦးစိုးသိန်းသားဆိုပြီး ဗဟိုက သူ့ကို ပြည်သူ့လွှတ်တော်ကိုယ်စားလှယ်လောင်းအဖြစ် ချပေးတာ။ တကယ်က လှိုင်သာယာအရှေ့ပိုင်းမှာ ဝင်ပြိုင်မယ့် ပြည်သူ့လွှတ်တော်အမတ်လောင်းက ရှိပြီးသား။ သူ့ကို ဗဟိုက ချပေးတော့ အောက်ခြေမှာ ငြင်းမရဘူး။ သူက သူရဲ့ မဲဆွယ်ဆိုင်းဘုတ်တင် တာတွေ၊ နောက်ပြီး မဲဆွယ်လှုပ်ရှားမှုတွေမှာ ဓာတ်ပုံ မရိုက်ခိုင်းဘူး။ တင်ထားတာတွေလည်း အကုန်ဖျက်ခိုင်းတယ်။ သူ့ လုံခြုံရေးဆိုပြီး အဲဒီလိုတွေ လုပ်ခိုင်းတာ။ သူက စကားပြောတော့လည်း အထက်စီးက ဖြစ်တော့ အောက်ခြေပါတီဝင်တွေက သူ့ကို သဘောမကျဘူး” ဟု ကြံ့ခိုင်ရေးသတင်းရင်းမြစ်က ပြောဆိုသည်။

အေးချမ်းမှာ လှိုင်သာယာမြို့နယ်အရှေ့ပိုင်းအတွင်း မဲဆွယ်စည်းရုံးရေးလှုပ်ရှားမှုများတွင် လိုက်ပါခြင်းမပြုဘဲ နဝဒေးအိမ်ရာ၊ FMI အိမ်ရာကဲ့သို့သော နေရာမျိုးတွင်သာ မဲဆွယ်ကြောင်း၊ မဲဆွယ်ဆိုင်းဘုတ်ဖွင့်ပွဲများတွင်လည်း ၎င်း၏ လုံခြုံရေးအဖွဲ့ဖြင့် လာရောက်ကြောင်း သိရှိရသည်။

အေးချမ်း၏ ဖခင်ဖြစ်သူ စိုးသိန်းမှာ ၂၀၁၁ ခုနှစ်အစောပိုင်းမှ ၂၀၁၆ ခုနှစ်အထိ သိန်းစိန်အစိုးရလက်ထက် သမ္မတရုံးဝန်ကြီးအဖြစ် တာဝန်ယူခဲ့ပြီး စစ်အာဏာသိမ်းရန် အမျိုးသားရေး လှုပ်ရှားမှုများနှင့် လှုံ့ဆော်မှုများကို နောက်ကွယ်မှ ပံ့ပိုးပါဝင်ခဲ့သူဖြစ်ကြောင်း၊ ၂၀၂၁ ခုနှစ် စစ်အာဏာသိမ်းချိန်တွင် စိုးသိန်းက စစ်အာဏာသိမ်းမှုကို လွန်စွာကောင်းမွန်သည့် လုပ်ရပ်အဖြစ် “ကျနော်တို့ မြန်မာနိုင်ငံဟာ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့မှာ လွတ်လပ်ရေးရတယ်” ဟု ရေးသားဖော်ပြခဲ့သည်။

ယင်းအပြင် အကြမ်းဖက် စစ်တပ်မှ ဗိုလ်ချုပ်ဟောင်းတစ်ဦးဖြစ်သော ဝန်ကြီးဟောင်း စိုးသိန်းနှင့် သားဖြစ်သူ အေးချမ်းတို့က ပြည်သူ ၁၅ ဦးထက်မနည်းကို ကမာရွတ်မြို့နယ်၊ ဗဟန်းမြို့နယ်နှင့် ပန်းဘဲတန်းမြို့နယ်တို့တွင် ပုဒ်မ ၅၀၅ (က)၊ ပုဒ်မ ၆၆ (ဃ) တို့ဖြင့် အမှုဖွင့်သည့်အပြင် တရားမကြောင်းဖြင့်ပါ ငွေကျပ် သိန်းထောင်ချီလျှော်ကြေးတောင်းနေသည်။

ဗိုလ်ချုပ်ဟောင်း စိုးသိန်းနှင့် သား အေးချမ်းတို့က ဖေ့ဘုတ်စ် လူမှုကွန်ရက်တွင် စစ်အာဏာသိမ်းမှုကို ထောက်ခံသော မိသားစုအဖြစ် ဝေဖန်သော ပြည်သူမှန်သမျှကို မြို့နယ်ရဲတပ်ဖွဲ့များတွင် အမှုဖွင့်ခြင်း၊ မြို့နယ်တရားရုံးများတွင် တရားစွဲခြင်းနှင့် ခရိုင်တရားရုံးများတွင် သိန်းထောင်ချီ လျှော်ကြေးတောင်းမှုများ လုပ်ဆောင်နေခြင်းဖြစ် ကြောင်း၊ စိုးသိန်းသားအဖ၏ တရားစွဲခံရသူများတွင် သာမန်ပြည်သူမှစတင်၍ လုပ်ငန်းရှင်များအထိ ပါဝင်သည်။

စစ်တပ်အသိုင်းအ၀ိုင်းလည်း ဖြစ်သည့်အပြင် သားဖြစ်သူ အေးချမ်းမှာ မင်းအောင်လှိုင်က ဖွဲ့စည်းပေးထားသော မြန်မာနိုင်ငံသတင်းမီဒီယာကောင်စီ၏ အထွေထွေအတွင်းရေးမှူးအဖြစ်လည်း တာဝန်ယူထားသည်။

ဗိုလ်ချုပ်ကြီးဟောင်း စိုးသိန်းသည် သမ္မတသိန်းစိန်အစိုးရလက်ထက်တွင် သမ္မတရုံးဝန်ကြီးအဖြစ် တာဝန်ထမ်း ဆောင်ခဲ့သူဖြစ်ပြီး အေးချမ်းမှာမူ လုပ်ငန်းရှင်လည်းဖြစ်ကာ မင်းအောင်လှိုင်ဖွဲ့စည်းထားသော သတင်းမီဒီယာကောင်စီတွင် အတွင်းရေးမှူး ရာထူးဖြင့် စစ်ကောင်စီအတွက် အဓိက ဝါဒဖြန့်ပေးနေသူလည်းဖြစ်သည်။

ဗိုလ်ချုပ်ဟောင်း စိုးသိန်း၏ သား အေးချမ်းက သတင်းမီဒီယာကောင်စီ၏ အတွင်းရေးမှူးအဖြစ် နိုင်ငံတကာ သတင်းမီဒီယာ ညီလာခံများသို့ တက်ရောက်ကာ NLD က မဲခိုးမဲလိမ်၍ စစ်တပ်က အာဏာထိန်းရကြောင်း၊ လူမှုကွန်ရက်မှတစ်ဆင့် သတင်းတု၊ သတင်းမှားများကို မီဒီယာများက ဖြန့်ဝေနေကြောင်း စသည်ဖြင့် စစ်ကောင်စီကို ကာကွယ်သော ဝါဒဖြန့်မှုများကို အကြီးအကျယ် လုပ်ဆောင်ခဲ့သည်။