တရုတ်နိုင်ငံ၏ အစိတ်အပိုင်းမဟုတ်သော ထိုင်ဝမ်နိုင်ငံ အရေးကိစ္စနှင့်ပတ်သက်၍ တရုတ်နှင့်ဂျပန် ဆက်ဆံရေး တင်းမာနေချိန် ဂျပန်တွင် ပြန်လည် ဖြစ်ပေါ်လာနိုင်သော ဖက်ဆစ်ဝါဒနှင့် ဂျပန်ဝန်ကြီးချုပ်၏ ပြောစကားကို ရှုတ်ချကြောင်း အကြမ်းဖက်စစ်တပ်၏ ပြောရေးဆိုခွင့်ရှိသူ ဇော်မင်းထွန်း ထပ်မံပြောဆိုပြန်သည်။
နိုဝင်ဘာလ ၂၂ ရက်နေ့ တရုတ်အစိုးရပိုင် ဆင်ဟွာသတင်းဌာနသို့ အကြမ်းဖက် ဇော်မင်းထွန်းက ထိုသို့ ပြောဆိုခြင်းဖြစ်ပြီး နိုဝင်ဘာလ ၇ ရက်နေ့ ဂျပန်ဝန်ကြီးချုပ် တာ့ကာအိချိ (Takaichi) က တရုတ်က ထိုင်ဝမ်ကို တိုက်ခိုက်ပါက ဂျပန်၏ ရှင်သန်မှုကို ခြိမ်းခြောက်သည့် အခြေ အနေ အဖြစ် သတ်မှတ်နိုင်ကြောင်း ဂျပန်ပါလီမန်တွင် ပြောကြားခဲ့ခြင်းဖြစ်သည်။
ဂျပန်ဝန်ကြီးချုပ်၏ ပြောကြားချက်မှာ ဂျပန်၏ လုံခြုံရေးဆိုင်ရာ ဥပဒေမူဘောင်အရ ထိုင်ဝမ်အရေးကို ဂျပန်နိုင်ငံ၏ ပြည်တွင်းလုံခြုံရေးနှင့် တိုက်ရိုက်ဆက်စပ်သည်ဟု သတ်မှတ်လိုက်ခြင်းဖြစ်ပြီး ဂျပန်အနေဖြင့် ထိုင်ဝမ်အရေးတွင် စစ်ရေးအရ ပါဝင်ပတ်သက်နိုင်သည့် လမ်းကြောင်းကို ဖွင့်ပေးလိုက်ခြင်း ဖြစ်သည်ဟု သိရှိရသည်။
အကြမ်းဖက် စစ်တပ်၏ ပြောရေးဆိုခွင့်ရှိသူ ဇော်မင်းထွန်းက ထိုင်ဝမ်အရေးနှင့်စပ်လျဉ်းသည့် ဂျပန်ဝန်ကြီးချုပ် ဆာနာအဲ တာကာအိချိ၏ မှားယွင်းသော ပြောဆိုချက်များအပေါ် ရှုတ်ချကြောင်း၊ မြန်မာနိုင်ငံအနေဖြင့် တရုတ်တစ်နိုင်ငံတည်း မူဝါဒကို အစဉ်အမြဲ ခိုင်မာစွာ ထောက်ခံကြောင်း ပြောဆိုသည်။
ဆက်လက်၍ အကြမ်းဖက် ဇော်မင်းထွန်းက ဂျပန်ဝန်ကြီးချုပ် တာကာအိချိ၏ ပြောဆိုချက်များမှာ သမိုင်းအပေါ် သင်ခန်းစာမယူသည့် ပြောကြားချက်ဖြစ်ကြောင်း၊ ဂျပန်တို့၏ အတိတ်သမိုင်းက အာရှတိုက်အပေါ် ကျူးလွန်ခဲ့သည့် ရာဇဝတ်မှုများအပေါ်မှာ နောင်တမရသည့် တာဝန်မယူသော ပြောကြားချက်ဖြစ်ကြောင်း၊ ဂျပန်ဖက်ဆစ်ဝါဒ၏ ဆိုးကျိုးများကို မြန်မာနိုင်ငံ အပါအဝင် အရှေ့တောင်အာရှနိုင်ငံတိုင်းက ခါးသီးစွာ ခံစားခဲ့ဖူးကြောင်း၊ ဂျပန်၌ ပြန်လည်ဖြစ်ပေါ်လာနိုင်သော ဖက်ဆစ်ဝါဒအပေါ် မြန်မာနိုင်ငံအနေဖြင့် ရှုတ်ချကြောင်း ပြောဆိုသည်။
ဂျပန်ဝန်ကြီးချုပ် တာကာအိချိ၏ ပြောဆိုချက်မှာ တရုတ်နိုင်ငံ တစ်နိုင်ငံတည်းမူဝါဒကို ချိုးဖောက်ခြင်းဖြစ်ပြီး ပုန်ကန်သူများကို အားပေးခြင်းဖြစ်ကြောင်း ၊ တရုတ်နိုင်ငံ၏ တရုတ်တစ်နိုင်ငံတည်းမူဝါဒအပေါ် မြန်မာနိုင်ငံက အမြဲထောက်ခံ ရပ်တည်သွားမည်ဖြစ်ကြောင်း၊ ထိုင်ဝမ်သည် တရုတ်ပြည်သူ့သမ္မတနိုင်ငံ၏ ခွဲခြားမရသော အစိတ်အပိုင်းဖြစ်ကြောင်း၊ ထိုင်ဝမ်အရေးသည် တရုတ်ပြည်၏ ပြည်တွင်းရေးသာဖြစ်ပြီး မည်သည့် နိုင်ငံခြားတိုင်းပြည်၏ ဝင်ရောက်စွက်ဖက်မှုကိုမဆို မြန်မာနိုင်ငံအနေဖြင့် ရှုတ်ချကြောင်း ဇော်မင်းထွန်းက ဆိုပြန်သည်။
နိုဝင်ဘာလ ၂၁ ရက်နေ့ကလည်း စစ်တပ်ပိုင် သတင်းစာများမှတစ်ဆင့် အကြမ်းဖက် ဇော်မင်းထွန်းက ဂျပန်ဝန်ကြီးချုပ်သစ်၏ ထိုင်ဝမ်အရေး အပေါ် ပြော ဆိုချက်ကို မထောက်ခံဘဲ တရုတ်တစ်နိုင်ငံတည်းမူဝါဒအရ တရုတ်နိုင်ငံဘက်မှ ရပ်တည်ကြောင်း ပြောဆိုခဲ့သည်။
ဂျပန်ဝန်ကြီးချုပ်၏ ထိုင်ဝမ်အရေး မှတ်ချက်စကားကြောင့် တရုတ်နှင့်ဂျပန်အကြား တင်းမာမှုမှာ အရှိန်မြင့်တက်နေပြီး ကုန်သွယ်ရေး၊ ခရီးသွားလာရေး၊စီးပွားရေးနှင့် နိုင်ငံရေးကဏ္ဍများတွင် ဆက်ဆံရေးဖြတ်တောက်မှုများစွာဖြင့် နှစ်ဖက် အတင်းမာဆုံးအခြေအနေသို့ ဆိုက်ရောက်လျက်ရှိသည်။
ဓာတ်ပုံ- AFP။
