စစ်ဆင်ရေးကျရှုံးမှု၊ လာဘ်ပေးလာဘ်ယူမှုများဖြင့် အရေးယူခံရသော နမခတိုင်းမှူး ဗိုလ်မှူးချုပ် မျိုးမင်းထွေး၏ ဇနီးနှင့်မိသားစုဝင်များကိုပါ စစ်တပ်က ဖမ်းဆီး ၊ တိုင်းမှူးအသစ် ဗိုလ်မှူးချုပ်ကျော်သူရ တာဝန်စယူပြီး စစ်ဆေးရုံကို သွားစစ်ဆေး

ရန်ကုန်၊ နိုဝင်ဘာ ၂၈

အနောက်မြောက်တိုင်းစစ်ဌာနချုပ် နယ်မြေဖြစ်သော စစ်ကိုင်းတိုင်းနှင့် ချင်းပြည်နယ်တွင် စစ်ဆင်ရေးကျရှုံးမှု၊ လာဘ်ပေးလာဘ်ယူမှုများဖြင့် အရေးယူခံရသော နမခတိုင်းမှူး ဗိုလ်မှူးချုပ် မျိုးမင်းထွေး၏ ဇနီးနှင့်မိသားစုဝင်များကိုပါ စစ်တပ်က ဖမ်းဆီးထားကြောင်း နေပြည်တော် စစ်ဘက်သတင်းရင်းမြစ်က ပြောဆိုသည်။

နိုဝင်ဘာလ ၁၀ ရက်ဝန်းကျင်မှစတင်ပြီး တိုင်းမှူးဟောင်း ဗိုလ်မှူးချုပ် မျိုးမင်းထွေးကို နေပြည်တော်စစ်ရုံးက ဖမ်းဆီးစစ်ဆေးခဲ့ကြောင်း၊ မူလက ဇနီးနှင့်မိသားစုဝင်များကို မုံရွာရှိ အနောက်မြောက်တိုင်းစစ်ဌာနချုပ်ရှိ တိုင်းမှူးနေအိမ်တွင် နေထိုင်ခွင့်ပေးခဲ့ကြောင်း၊ သို့ရာတွင် တိုင်းမှူး ဗိုလ်မှူးချုပ် မျိုးမင်းထွေးတွင် လာဘ်ပေးလာဘ်ယူမှုများ ပေါ်ပေါက်လာပြီးနောက် ဇနီးနှင့်မိသားစုဝင်များကို စစ်တပ် ခေါ်ယူဖမ်းဆီးသွားကြောင်း သိရှိရသည်။

“ဖမ်းတယ်ဆိုတာထက် ယာယီ ထိန်းသိမ်းလိုက်တယ်ဆိုရင် ပိုမှန်မယ်။ ဇနီးနဲ့ မိသားစုဝင်တွေကိုလည်း စစ်တာတွေရှိပါတယ်။ အခုက ဇနီးရော မိသားစုဝင်တွေရော သားသမီးတွေရော အကုန် ထိန်းသိမ်းခံထားရတယ်” ဟု နေပြည်တော်စစ်ဘက်သတင်းရင်းမြစ်က ပြောဆိုသည်။

လက်ရှိ အနောက်မြောက်တိုင်းစစ်ဌာနချုပ် တိုင်းမှူး ဗိုလ်ချုပ် မျိုးမင်းထွေးကို လာဘ်ပေးလာဘ်ယူမှု၊ စစ်ဆင်ရေးကျရှုံးမှုများဖြင့် ရာထူးမှ ဖယ်ရှား စစ်ခုံရုံးတင်လိုက်ပြီးနောက် ကလောမှ စစ်ဦးစီးတက္ကသိုလ်ကျောင်း အုပ်ကြီး ဗိုလ်မှူးချုပ်ကျော်သူရကို တိုင်းမှူးအသစ်အဖြစ် ခန့်အပ်လိုက်သည်။

နမခတိုင်းမှူးအသစ်ဖြစ်လာသော ဗိုလ်မှူးချုပ် ကျော်သူရမှာ ကလော စစ်ဦးစီးတက္ကသိုလ် ကျောင်းအုပ်ကြီးအဖြစ်မှ တိုင်းမှူးရာထူးသို့ ရာထူးတိုးပြောင်းရွှေ့လာခြင်းဖြစ်သည်။ ၎င်းမှာ စစ်တက္ကသိုလ်အပတ်စဉ် ၄၀ မှ ဖြစ်ပြီး နိုင်ငံတော်ကာကွယ်ရေးတက္ကသိုလ်၊ အမှတ် ၇ စစ်ဆင်ရေးကွပ်ကဲမှုဌာနချုပ်မှူး၊ စစ်ဦးစီးတက္ကသိုလ်တို့တွင် ရာထူးတာဝန်များကို ထမ်းဆောင်ခဲ့သူဖြစ်သည်။

တိုင်းမှူးသစ် ဗိုလ်မှူးချုပ် ကျော်သူရမှာ အနောက်မြောက်တိုင်းစစ်ဌာနချုပ်သို့ ရောက်ရှိနေပြီး စတင်တာဝန်ယူနေပြီဖြစ်ကြောင်း၊ ယနေ့တွင်မုံရွာမြို့ပေါ်ရှိ စစ်ဆေးရုံများသို့ သွားရောက် အားပေးကြည့်ရှုခဲ့ကြောင်း သိရှိရသည်။

စစ်တပ်၏ ဖမ်းဆီးအရေးယူမှု ခံလိုက်ရသော အနောက်မြောက်တိုင်းစစ်ဌာနချုပ် တိုင်းမှူးဟောင်း ဗိုလ်မှူးချုပ်မျိုးမင်းထွေးသည် အလုပ်သင်ဗိုလ် သင် တန်း (တေဇ- ၂၆)မှ ဖြစ်ပြီး၊ တပ်မ ၁၁၊ လောက်ကိုင် ဒေသကွပ်ကဲမှု စစ်ဌာနချုပ်၊ ကျောက်မဲ အမှတ် ၁ စစ်ဆင်ရေးကွပ်ကဲမှု စစ်ဌာနချုပ်တို့တွင် တပ်မမှူး တာဝန်ယူခဲ့ကာ MNDAA ထံတွင် လက်နက်ချ အညံ့ခံခဲ့သူလည်းဖြစ်သည်။