စစ်ကိုင်းတိုင်း၊ ဝက်လက်မြို့နယ်တွင် စစ်သား ၁ ဦးကို ပရိတ်ရေဖြင့် ထွက်ပက်သည့် အသက် ၆၀ အရွယ် ဒေါ်ဆန်းလွင်ကို စစ်တပ်က ပစ်သတ်ခဲ့ကြောင်း ဗန္ဓုလနှင့်အဖွဲ့သားများ တပ်ဖွဲ့မှ ကိုရာမက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၃ ရက်နေ့တွင် ဝက်လက်မြို့နယ် အတွင်းရှိ ကျေးရွာတစ်ရွာကို စစ်ကြောင်းထိုးဝင်ရောက်လာသော အကြမ်းဖက် စစ်တပ် စစ်ကြောင်းမှ စစ် သား ၁ ဦး အတက်ရောဂါ ခံစားနေရသည့် အတွက် ကျေးရွာနေပြည်သူ အသက် ၆၀ အရွယ် ဒေါ်ဆန်းလွင်က ပရိတ်ရေဖြင့် ထွက်ပက်ခဲ့ခြင်းဖြစ် ကြောင်း သိရသည်။
ထိုသို့ ပရိတ်ရေဖြင့် ထွက်ပက်သည်ကို စစ်ကြောင်းတွင် လိုက်ပါလာသော အရာရှိက စုန်းမကြီး ဟုပြောဆိုပြီး သေနတ်ဖြင့် ပစ်သတ်ခဲ့ခြင်းဖြစ်ကြောင်း၊ ထိုသို့ ပစ်သတ်ပြီးနောက် ဒေါ်ဆန်းလွင်၏ ရုပ်အလောင်းကို စစ်သားများက စောင်ဖြင့် သယ်ယူကာ သားနားရွာ နှင့် မောက်ကြိုးရွာ အကြားတွင် ရုပ်အလောင်းကို မြေမြုပ်ဖျောက်ဖျက်ခဲ့ကြောင်း သိရှိရသည်။
“အဖွားက ရွာထဲကို စစ်ကြောင်းဝင်လာတော့ မပြေးဘူးလို့ သိရတယ်။ စစ်ခွေးစစ်ကြောင်းက ရွာထဲရောက်တော့ အိမ်တွေကို လိုက်မွှေနေတုန်း စစ်ခွေး ၁ ကောင်က မကောင်းဆိုးဝါး ဝင်ပူးသလို အတက်ရောဂါဖြစ်သလို တွန့်လိမ်ကောက်ကွေးနေတဲ့ အချိန်မှာအဖွားက ပရိတ်ရေဖြင့် ထွက်ပက်ပေးတာ အဖွားရေနဲ့ ပက်လိုက်တဲ့ အချိန်မှာ အဲစစ်ခွေးက ပြန်ငြိမ်သွားတာ အဲတာကို မြင်တော့ စစ်ကြောင်းမှာပါလာတဲ့ အရာရှိက စုန်းမကြီးဆိုပြီး သေနတ်နဲ့ ပစ်သတ်လိုက်တာ အဲလိုပစ်သတ်ပြီး ရုပ်အလောင်းကို စစ်ခွေးတွေ စောင်နဲ့သယ်ယူသွားပြီး မြေမြုပ်ခဲ့တာ” ဟု ဗန္ဓုလနှင့်အဖွဲ့သားများ တပ်ဖွဲ့မှ ကိုရာမက ပြောဆိုသည်။
ထိုအကြမ်းဖက် စစ်တပ် စစ်ကြောင်းသည် ယင်းနေ့တွင် ပုဏ္ဏားကျေးရွာကို ဝင်ရောက် မီးရှို့နေစဉ် ပြည်သူ့ကာကွယ်ရေး ပူးပေါင်းတပ်ဖွဲ့များက ဝင်ရောက် တိုက်ခိုက်ခဲ့ရာ စစ်သား ၃၅ ဦး သေဆုံးပြီး အများအပြား ထိခိုက်ဒဏ်ရာရရှိကာ လက်နက် ၃၀ ကျော်နှင့်ခဲယမ်းများ သိမ်းဆည်းရရှိခဲ့ကြောင်း သိရသည်။
