ရန်ကုန်၊ နိုဝင်ဘာ ၂၉
မွန်ပြည်နယ်၊ ရေးမြို့နယ်၊ ပဒေါင်းရွာအနီး စစ်ကြောင်းထိုးလာသော အကြမ်းဖက် စစ်တပ်ကို တိုက်ခိုက်ရာ စစ်သား ၇ ဦးသေဆုံးခဲ့ကြောင်း တပင်ရွှေထီးကိုကျိုက်ပြည်သူ့ကာကွယ်ရေးတပ်မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၅ ရက်နေ့တွင် ရေးမြို့နယ်၊ ပဒေါင်းကျေးရွာအနီးကို အင်အား ၁၅၀ ခန့်ပါဝင်သော စက ၁၉ လက်အောက်ခံ တပ်ပေါင်းစုများက စစ်ကြောင်းထိုးလာသောကြောင့် တော်လှန်ရေး တပ်ဖွဲ့များနှင့် တိုက်ပွဲ ဖြစ်ပွားခဲ့ခြင်းဖြစ်ကြောင်း သိရသည်။
ထိုတိုက်ပွဲသည် ယင်းနေ့ မွန်းလွဲ ၁ နာရီခန့်မှ စတင်ဖြစ်ပွားခဲ့ပြီး အကြမ်းဖက် စစ်တပ်ဘက်မှ ၃ ဦး သေဆုံးကာ ၂ ဦး ထိခိုက်ဒဏ်ရာရရှိခဲ့ကြောင်း၊ မွန်းလွဲ ၂ နာရီ ၅၀ မိနစ်ခန့်တွင်လည်း ပဒေါင်းဘုရားအနီးတွင် ဒုတိယအကြိမ် တိုက်ပွဲထပ်မံဖြစ်ပွားခဲ့ပြီး အကြမ်းဖက် စစ်တပ်ဘက်မှ ၂ ဦး ထပ်မံသေဆုံးကာ ၁ ဦး ထိခိုက်ဒဏ်ရာရရှိခဲ့ကြောင်း သိရှိရသည်။
အလားတူ နိုဝင်ဘာလ ၂၇ ရက်နေ့ နံနက် ၆ နာရီခန့်တွင်လည်း ဘဲလမုရွာအပြင်ဘက်ရှိ ကြိုးတံတားအနီးတွင် အကြမ်းဖက် စစ်တပ်မှ တော်လှန်ရေး တပ်ဖွဲ့များ တိုက်ပွဲ ထပ်မံ ဖြစ်ပွားခဲ့ပြီး အကြမ်းဖက် စစ်သား ၂ ဦး သေဆုံးကာ ၂ ဦး ထပ်မံ ထိခိုက်ဒဏ်ရာရရှိခဲ့ကြောင်း သိရသည်။
“တိုက်ပွဲက ၃ ကြိမ်ဖြစ်ပွားတာပေါ့။ စစ်ခွေး ၇ ကောင်သေပြီးတော့ ၅ ကောင် ထိခိုက်ဒဏ်ရာရတယ်။ စစ်ခွေးတွေက ပဒေါင်းကျေးရွာအနီးကို အင်အား ၁၅၀ ခန့်ပါဝင်တဲ့ စစ်ကြောင်းနဲ့ စစ်ကြောင်းထိုးလာလို့ တိုက်ပွဲဖြစ်ပွားခဲ့တာပါ” ဟု တပင်ရွှေထီးကိုကျိုက်ပြည်သူ့ကာကွယ်ရေးတပ်မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို KNLA တပ်မဟာ ၆ တပ်ရင်း ၂၇ ခွဲ ၁ ၊ တပင်ရွှေထီးကိုကျိုက်ပြည်သူကာကွယ်ရေးတပ်နှင့် ဗျူဟာ ၃၃ ချေမှုန်းရေးတပ်ခွဲတို့က ပူးပေါင်း လုပ်ဆောင်ခဲ့ပြီး တော်လှန်ရေးရဲဘော်များ အထိအခိုက်မရှိပြန်လည် ဆုတ်ခွာနိုင်ခဲ့ကြောင်း သိရသည်။
အလားတူ စစ်ကိုင်းတိုင်း၊ မုံရွာမြို့နယ်၊ မုံရွာ – ချောင်းဦး လမ်းပိုင်းတွင် ဆက်ကြေးကောက်ခံနေသော အကြမ်းဖက် စစ်သားများကို တိုက်ခိုက်ရာ စစ်သား ၁ ဦးသေဆုံးခဲ့ကြောင်းArea71 Local People Defense Force Monywa မှ အဖွဲ့ခေါင်းဆောင် ကိုထွန်းက ရန်ကုန်ခေတ်သစ်သတင်းဌာနထံသို့ပြောဆိုသည်။
နိုဝင်ဘာလ ၂၆ ရက်နေ့ နံနက် ၈ နာရီ ၃၀ မိနစ်ခန့်အချိန် မုံရွာ – ချောင်းဦး လမ်းပိုင်းတွင် ပြည်သူများထံမှ ဆက်ကြေးကောက်ခံနေသော အကြမ်းဖက် စစ်တပ်ကို မြန်မာ့ မဏ္ဍိုင်စက်သုံးဆီ အရောင်းဆိုင်အနီးတွင် တော်လှန်ရေး တပ်ဖွဲ့များက ဝင်ရောက် ပစ်ခတ် တိုက်ခိုက်ခဲ့ကြောင်း ၊အဆိုပါ အပြန်အလှန် ပစ်ခတ်မှုအတွင်း အကြမ်းဖက် စစ်တပ်ဘက်မှ စစ်သား ၁ ဦးသေဆုံးကာ ၂ ဦး အပြင်းထန် ထိခိုက်ဒဏ်ရာရှိခဲ့ကြောင်း၊ တိုက်ခိုက်မှု ပြုလုပ်ပြီးနောက် တော်လှန်ရေး ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းသိရှိရသည်။
“စစ်ခွေး ၁ ကောင်ပဲ သေတယ်လို့ ကြားတယ်။ ၂ ကောင်က ဒဏ်ရာပြင်းထန်တယ်လို့ကြားသိရပါတယ်။ အဲနေရာက စစ်ခွေး အထိုင်ချတပ်စွဲပြီးတော့ ဂိတ်ချထားတဲ့နေရာပါ။ အဲဒီနေ့က စစ်ခွေးတွေက ခရီးသည်တင်ကားတွေကိုတားပြီး ပြည်သူတွေကို မိုင်းရှင်း ခိုင်းနေတာလည်း တွေ့မြင်ခဲ့ရတယ်။ အဲ့ဂိတ်မှာ လမ်းပေါ်တက် ငွေတောင်းနေတာက စစ်ခွေး ၇ ကောင်လောက်ပဲ။ လမ်းဘေးမှာ ကင်းပုန်းဝတ်နေတဲ့ စစ်ခွေးတွေနဲ့ ဆိုရင် စစ်ခွေး အင်အား ၃၀ လောက်တော့ရှိမယ်။ သူပစ် ကိုယ်ပစ် ဖြစ်တာဆိုတော့ ကျနော်တို့က အလစ်ဝင်ပစ်တာ စစ်ခွေး အင်အား ထပ်တိုးလာလို့ ကျနော်တို့ ပြန်ဆုတ်ခဲ့ရတာပါ။ စစ်ခွေး ၁ ကောင်တော့ နေရာတင် ပွဲချင်းပြီး သေဆုံးခဲ့ပါတယ်။ စစ်ခွေးတွေလုပ်မယ့် အတုယောင် ရွေးကောက်ပွဲ ကာလအတွင်း ကျနော်တို့ တော်လှန်ရေးအဖွဲ့အစည်းများက စစ်ရေးအရှိန်မြင့်နေတာမို့ ပြည်သူများတွေအနေဖြင့် တော်လှန်ရေး အဖွဲ့ အသီသီးက ထုတ်ပြန်တဲ့ ကြေငြာချက်တွေကို လိုက်နာပေးကြပါလို့ ပြောချင်တယ် ” ဟု Area71 Local People Defense Force Monywa မှ အဖွဲ့ခေါင်းဆောင် ကိုထွန်းကပြောဆိုသည်။
အဆိုပါ တိုက်ခိုက်မှုကို Area71 LPDF Monywa အဖွဲ့နှင့် CHINDWIN DYANAMITE SALINGYI အဖွဲ့ GOLDEN PEACOCK ATTACK FORCE အဖွဲ့တို့က ပူးပေါင်းလုပ်ဆောင်ခဲ့ခြင်းဖြစ်ကြောင်းသိရှိရသည်။
