မကွေးတိုင်း၊ ပေါက်မြို့နယ်အတွင်း စစ်ကြောင်းထိုးနေသော အကြမ်းဖက် စစ်တပ်က ကျေးရွာ ၊ တောင်ယာ နှင့် ဗုံးခိုကျင်းများတွင် နင်းမိုင်းများ ထောင်ထားခဲ့၍ ပြည်သူ ၆ ဦး မိုင်းနင်းမိပြီး ပြင်းထန်ဒဏ်ရာရရှိခဲ့ကြောင်း ပေါက်မြို့နယ် လူသားစာနာဌာနမှ တာဝန်ရှိသူနှင့် ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၁၉ ရက်နေ့တွင် ပေါက်မြို့နယ်အတွင်း ဆိပ်ဖြူ ကပစ ၂၂ မှ ထွက်လာသော တပ်မ ၉၉ စစ်ကြောင်းသည် ပေါက်မြို့နယ် တောင်ပိုင်းကျေးရွာများကို စစ်ကြောင်းထိုးဝင်ရောက်လာပြီး လူနေအိမ်ဝိုင်းများ၊ ဗုံးခိုကျင်းများ၊ လယ်ယာတောများ သွားရာလမ်းများကို နင်းမိုင်းများထောင်ထားခဲ့ခြင်းဖြစ်ကြောင်း သိရသည်။
ထိုသို့ နင်းမိုင်းများ ထောင်ထားခဲ့သောကြောင့် ပေါက်မြို့နယ် တောင်ပိုင်းရှိ ကျေးရွာ ၂ ရွာမှ ပြည်သူ ၃ ဦး မိမိနေအိမ်ကို ပြန်ဝင်စဥ် မိုင်းနင်းမိပြီ ခြေထောက်များဆုံးရှုံးခဲ့ကြောင်း သိရှိရသည်။
အလားတူ နိုဝင်ဘာလ ၂၈ ရက်နေ့ နံနက် ၇ နာရီခန့်တွင် ပေါက်မြို့နယ် တောင်ပိုင်းရှိ သီးချောက်ရွာ၊ သပြေအေးရွာ နှင့် တဲတော်ယာရွာတို့မှ ဆွေမျိုးတော်စပ်သော ပြည်သူ ၃ ဦးသည် ဆိုင်ကယ် ၁ စီးဖြင့် လယ်ရိတ်ရန် သွားရောက်စဥ် အကြမ်းဖက် စစ်တပ်က ထောင်ထားခဲ့သော မိုင်းနင်းမိပြီး ပြည်သူ ၃ ပြင်းထန်ဒဏ်ရာရရှိခဲ့ကြောင်း သိရသည်။
“စစ်ခွေးတွေ စစ်ကြောင်းထိုးတုန်းက မိုင်းတွေကို တောက်လျောက်ထားခဲ့တာ အခုပြည်သူတွေတချို့ကို ရွာထဲကို ပြန်ဝင်တာနဲ့ လယ်ယာတွေကို ပြန်ဆင်းတာတွေ လုပ်တော့ မိုင်းတွေနင်းမိတာပါ။ ပြည်သူ ၆ ဦး ပြင်းထန်ဒဏ်ရာရတယ်လို့ သိရတယ်” ဟု ဒေသပြည်သူတစ်ဦးက ပြောဆိုသည်။
ထို့ပြင် အကြမ်းဖက် စစ်တပ် စစ်ကြောင်းသည် ပေါက်မြို့နယ်အတွင်း စစ်ကြောင်းထိုးလာချိန်မှ စ၍ လက်ရှိအချိန်ထိ လမ်းပြအဖြစ် ဖမ်းဆီးလာသော ပြည်သူ ၂ ဦး အပါအဝင် ကျေးရွာများအတွင်းမှ ပြည်သူ ၈ ဦးကို ဖမ်းဆီးသတ်ဖြတ်ခဲ့ပြီး ပြည်သူ ၂၀ ကျော်ကိုလည်း ဖမ်းဆီးခေါ်ဆောင်သွားကြောင်း သိရသည်။
ထို့ကြောင့် ပြည်သူများအနေဖြင့် အကြမ်းဖက် စစ်တပ် စစ်ကြောင်းထိုးဝင်ရောက်ခဲ့သော နေရာများကို သတိပြု သွားလာကြရန်လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဌာန ပေါက်မြို့က အသိပေးပြောဆိုထားသည်။
