ရန်ကုန်၊ နိုဝင်ဘာ ၂၉
မန္တလေးတိုင်း၊ ငါန်းဇွန်မြို့နယ်တွင် ဓာတ်တော်ကျေးရွာကို စစ်တပ်က ဝင်ရောက်စီးနင်းပြီး ပြည်သူ ၃ ဦးကို သတ်ဖြတ်ကာ ရွာလုံးကျွတ် မီးတင်ရှို့နေကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
နိုဝင်ဘာလ ၂၈ ရက်နေ့ နံနက် ၈ နာရီအချိန် စစ်တပ်က ငါန်းဇွန်မြို့နယ်၊ ဓာတ်တော်ကျေးရွာသို့ တိုက်ပွဲဖြစ်ပွားခြင်းမရှိဘဲ စစ်ကြောင်းထိုးလာကြောင်း၊ ယင်းနောက် ကျေးရွာအတွင်းရောက်ရှိလာချိန် အနီးအနားပတ်ဝန်းကျင်များသို့ လက်နက်ကြီးများ၊ ဒရုန်းများဖြင့် ထွက်ပြေးသော စစ်ဘေးရှောင် ပြည်သူများကို လိုက်လံပစ်ခတ်ခဲ့ကြောင်း၊ ထိုသို့ ပစ်ခတ်မှုကြောင့် ၂ နှစ်အရွယ် ကလေးငယ် ၁ ဦး အပါအဝင် ပြည်သူ ၃ ဦးသေဆုံးခဲ့ကြောင်း သိရှိရသည်။
ယင်းနောက် စစ်တပ်က ဓာတ်တော်ကျေးရွာတစ်ခုလုံးကို မီးတင်ရှို့ခဲ့ရာ အိမ်ခြေ အများအပြား မီးလောင်ပျက်စီး ပြာကျသွားကြောင်း၊ ယင်းနောက် စစ်တပ်စစ်ကြောင်းက ပြန်လည်ထွက်ခွာသွားကြောင်း သိရှိရသည်။
“အခုထိတော့ စစ်ကြောင်း ပြန်လာမှာစိုးရိမ်လို့ ဓာတ်တော်ကျေးရွာ ပြည်သူတွေကတော့ နီးစပ်ရာ တောတွေထဲမှာ စစ်ဘေးရှောင်နေရတုန်းပဲ” ဟု ဒေသပြည်သူတစ်ဦးက ပြောဆိုသည်။
အလားတူ ကချင်ပြည်နယ်၊ ဖားကန့်မြို့နယ်၊ မနကျေးရွာကို အကြမ်းဖက်စစ်တပ်က လက်နက်ကြီးဖြင့် ပစ်ခတ် ခဲ့ရာ လင်မယားနှစ်ဦး ဒဏ်ရာရရှိပြီး တစ်ဦး စိုးရိမ်ရကြောင်း ဖားကန့်သတင်းရင်းမြစ်က ရန်ကုန် ခေတ်သစ်သတင်းဌာနထံသို့ ပြောကြားသည်။
နိုဝင်ဘာလ ၂၇ ရက် ညနေပိုင်းက ဖားကန့်မြို့၊ ဗျူဟာကုန်းတပ်စွဲထားသည့် စစ်တပ်က မနကျေးရွာအတွင်းသို့ လက်နက်ကြီးဖြင့် ပစ်ခတ်ခဲ့ရာ လင်မယား ၂ ဦး ဒဏ်ရာရရှိပြီး တစ်ဦးစိုးရိမ်ရ ကြောင်း သိရသည်။
“တစ်ဦးကတော့ အဆုတ်ထဲကနေ သွေးတွေ ဖောက်ထုတ်ရတဲ့အနေအထားဖြစ်တယ်။ တော်တော် ကို ပြင်းထန်တယ်၊ အသက်လုရတဲ့အနေအထားဖြစ်နေတာ။ တစ်ယောက်ကတော့ သိပ်မပြင်းထန် ဘူးလို့ သိရတယ်။” ဟု ဖားကန့်သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောကြား သည်။
စစ်တပ်က လက်နက်ကြီးဖြင့် ပစ်ခတ်ခဲ့သည့် မနကျေးရွာသည် KIA ၊ KPDF တပ်ဖွဲ့များ ထိန်း ချုပ် ထားရာ ဆိပ်မူကျေးရွာ အုပ်စုထဲတွင် ပါဝင်ပြီး စစ်တပ်က ပြန်လည်သိမ်းပိုက်ထားသည့် ဆန်းကြွယ် ကျေးရွာနှင့် ကပ်လျက်တည်ရှိသည်။
နိုဝင်ဘာလ ၂၇ ရက် ည ၁၀ နာရီခန့်အချိန်ကလည်း ဖားကန့်မြို့နယ်၊ မှော်ဆီဇာဘုရားကုန်း၊ ဆန်း ကြွယ်ကျေးရွာရှိ စစ်တပ်စခန်းများ အပါအဝင် စစ်တပ် စွဲထားရာနေရာများကို KIA ပူးပေါင်းတပ်ဖွဲ့က ဒရုန်းဖြင့် ဗုံးကျဲတိုက်ခိုက်ခဲ့ကြောင်း သိရှိရသည်။
