ထိုင်းနိုင်ငံ၏ ပိုက်နက်နယ်မြေထဲသို့ မြန်မာဘက်မှ ပစ်ခတ်သော လက်နက်ကြီးကျည် ၅ လုံးကျရောက်ပြီးနောက် ထိုင်းစစ်တပ်က မြန်မာဘက်သို့ မီးခိုးဗုံးအမြောက်များ သတိပေးပြန်လည်ပစ်ခတ်လိုက်ကြောင်း ထိုင်းတော်ဝင်စစ်တပ်မှ ဒုတိယဗိုလ်ချုပ်ကြီး Worathep Boonyaက ထုတ်ဖော်ပြောဆိုကြောင်း The Nation က သတင်းဖော်ပြသည်။
ယနေ့ နံနက်ပိုင်း၊ ကရင်ပြည်နယ်၊မြ၀တီမြို့နယ်၊ မင်းလက်ပံကျေးရွာအနီး စစ်တပ်နှင့် တော်လှန်ရေးတပ်များ တိုက်ပွဲ အပြင်းအထန်ဖြစ်ပွားခဲ့ပြီး မြန်မာစစ်တပ်က ပစ်ခတ်သော ၆၀ မမ လက်နက်ကြီးကျည် ၅ လုံး မှာ ထိုင်းပိုင်နက်နယ်မြေထဲသို့ ကျရောက်ပေါက်ကွဲကြောင်း၊ ထိုသို့ ပေါက်ကွဲမှုကြောင့် ထိုင်းရောက် မြန်မာနိုင်ငံသား ၂ ဦး ထိခိုက်ဒဏ်ရာရရှိခဲ့ကြောင်း၊ ယင်းနောက် ထိုင်းစစ်တပ်က မြန်မာဘက်သို့ ၁၂၀ မမ မီးခိုးဗုံး အမြောက်ကျည်များကို ပြန်လည် ပစ်ခတ်ခဲ့ကြောင်း သိရှိရသည်။
ထိုင်းစစ်တပ်မှ ဒုတိယဗိုလ်ချုပ်ကြီး Worathep Boonyaက မြန်မာဘက်မှ တိုက်ပွဲများကြောင့် ထိုင်းပိုင်နက်အတွင်းသို့ လက်နက်ခဲယမ်းများ ကျရောက်သည့်အတွက် ထိုင်းစစ်တပ်က လက် တုံ့ပြန်သည့်အနေဖြင့် မီးခိုးဗုံးအမြောက် ၄ လုံးကို တုံ့ပြန် ပစ်ခတ်ရန် အမိန့်ပေးခဲ့ကြောင်း အတည်ပြုပြောကြားသည်။
ထိုင်းဘက်သို့ ကျရောက်သော ၆၀ မမမ လက်နက်ကြီးကျည်များကြောင်း ထိုင်းနိုင်ငံသားပိုင် အရပ်သားနေအိမ်တစ်လုံးလည်း ပျက်စီးသွားခဲ့ကြောင်း သိရှိရသည်။
