စစ်ကိုင်းတိုင်း၊ မြင်းမူမြို့နယ်တွင် ပြည်သူများထံမှ ဆက်ကြေးကောက်နေသော အကြမ်းဖက် စစ်တပ်ဂိတ်ကို ၃ ရက်ဆက် ဒရုန်းဖြင့် ဗုံးကျဲရာ စစ်သားများ ထိခိုက်သေဆုံးမှုရှိနိုင်ကြောင်း MDF Drone Team 2 တာ၀န်ခံ ရဲဘော်ငန်းနက်က ရန်ကုန်ခေတ်သစ်သတင်းဌာနထံသို့ပြောဆိုသည်။
နိုဝင်ဘာလ ၂၆ ရက်နေ့ မွန်းလွဲ ၂ နာရီ ၄၅ မိနစ်ခန့်တွင် မြင်းမူမြို့နယ်၊ အလက္ကပ္ပရွာရှိ ကိုးဆူဘုရားတွင် ခရီးသွား ပြည်သူများကို ဂိတ်ဖွင့်ကာ ပိုက်ဆံတောင်းနေသည့် အကြမ်းဖက် စစ်သားများကို Fixed Wings Drone ဖြင့် ဗုံး ၂ လုံး ကျဲချ တိုက်ခိုက်ခဲ့ကြောင်း၊ထိုတိုက်ခိုက်မှုအတွင်းစစ်တပ်ဂိတ်ဘန်ကာဘေး ကျရောက်ပေါက်ကွဲခဲ့ပြီး စစ်သားများ ထိခိုက်သေဆုံးမှုရှိနိုင်ကြောင်း သိရသည်။
အလားတူ နိုဝင်ဘာလ ၂၇ ရက်နေ့ မွန်းလွဲ ၃နာရီ ၁၅ မိနစ်ခန့်တွင်လည်း ကိုးဆူဘုရားကုန်းပေါ်ရှိ အကြမ်းဖက် စစ်တပ် ဘန်ကာနှင့် ဆက်ကြေးကောက်နေသော အကြမ်းဖက် စစ်သားများကို Fixed Wings Drone ဖြင့် ဗုံး ၄ လုံး ထပ်မံ ကျဲချ တိုက်ခိုက်ခဲ့ရာ စစ်သား ၃ ဦး အပြင်း အထန်ဒဏ်ရာရှိခဲ့ကြောင်း၊ နိုဝင်ဘာလ ၂၈ ရက်နေ့ ညနေ ၅ နာရီခန့်တွင်လည်း မြင်းမူမြို့နယ်မြောင်လမ်းခွဲတွင် အထိုင်ချ တပ်စွဲထားသော အကြမ်းဖက် စစ်တပ် စခန်းကို Fixed Wings Drone ဖြင့် ဗုံး ၄ လုံး ထပ်မံ ကျဲချတိုက်ခိုက်ခဲ့ကြောင်းသိရှိရသည်။
ထို ၃ ရက်ဆက် တိုက်ခိုက်မှုအတွင်း အကြမ်းဖက် စစ်တပ်ဘက်မှ သေဆုံးမှုရှိသော်လည်း အရေအတွက်အတည်ပြုနိုင်ခြင်းမရှိသေးဘဲ အကြမ်းဖက် စစ်တပ်ဘက်မှလည်း လက်နက်ကြီး၊ လက်နက်ငယ်များဖြင့် ရမ်းသမ်း ပစ်ခတ်ခဲ့သော်လည်း တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်းသိရသည်။
“စစ်ခွေး သေစာရင်းကတော့ မသိရသေးဘူး။ ပြင်းထန် ဒဏ်ရာ သုံးယောက်ပဲ အတည်ပြုနိုင်သေးတယ်။ ပြင်းထန် ဒဏ်ရာရတဲ့ကောင်တွေပဲ သိရတာ အထိုင်ခွေးခြံကိုချတုန်းကလည်း သူတို့စခန်းက ကားလမ်းဘေး စခန်းပေါက်က အပင်တွေနဲ့ဆိုတော့ အပြင်လူ အလွယ်တကူမမြင်ရဘူး။ စစ်ခွေးဘက်က ထိခိုက်သေဆုံးမှုရှိနိုင်တယ်။ ဒုတိယနေ့ ချတဲ့ဟာက သုံးယောက်ပြင်းထန်ရတယ်” ဟု MDF Drone Team 2 တာ၀န်ခံ ရဲဘော်ငန်းနက်က ပြောဆိုသည်။
အဆိုပါ တိုက်ခိုက်မှုကို Myaung Drone Force MDFနှင့်အတူ မြင်းမူမြို့နယ် ပ.က.ဖ. ၊ ဧရာမြွေပွေး NZN ၊ JUSTICE WARRIORS တပ်ဖွဲ့ ၊ Revolutionary Air Forceတို့က ပူးပေါင်း လုပ်ဆောင်ခဲ့ခြင်းဖြစ်ကြောင်း သိရှိရသည်။
ဓာတ်ပုံ- တော်လှန်ရေးတပ်ဖွဲ့၏ တိုက်ခိုက်ရေး ဒရုန်း ၁ စင်း။
