ထိုင်း-ကမ္ဘောဒီးယား စစ်ပွဲ ဒုတိယမြောက်နေ့အဖြစ် ဆက်လက်တိုက်ခိုက်၊ ကမ္ဘောဒီးယားဘက်မှ စစ်အရာရှိကြီးတချို့ အပါအဝင် သေဆုံးမှုများရှိပြီး ထိုင်းဘက်တွင်လည်း ထိခိုက်ကျဆုံးမှုများရှိနေ

ရန်ကုန်၊ ဒီဇင်ဘာ ၉

ထိုင်း-ကမ္ဘောဒီးယား စစ်ပွဲ ဒုတိယမြောက်နေ့အဖြစ် ယနေ့ ဒီဇင်ဘာလ ၉ ရက်နေ့ နံနက် ၂ နာရီဝန်းကျင်မှစတင်၍ ဆက်လက်တိုက်ခိုက်လျက်ရှိကြောင်း နှစ်နိုင်ငံသတင်းဌာနများ၏ သတင်းဖော်ပြချက်အရ သိရှိရသည်။

ယနေ့ နံနက် ၁ နာရီ ၅၀ မိနစ်ဝန်းကျင်အချိန်မှစတင်၍ ကမ္ဘောဒီးယားစစ်တပ်က BM-21 ဒုံးကျည်များ၊ လက်နက်ကြီးများ၊ ဒရုန်းများဖြင့် စတင်တိုက်ခိုက်ခဲ့ကြောင်း၊ ထိုင်းစစ်တပ်ဘက်ကလည်း နယ်စပ်ဒေသ ထိန်းချုပ်ရေး တိုက်ခိုက်မှုများ လုပ်ဆောင်နေကြောင်း သိရှိရသည်။

လတ်တလော ကမ္ဘောဒီးယားစစ်တပ်၏ တိုက်ခိုက်မှုကြောင့် ထိုင်းအရပ်သားပြည်သူများ၏ နေအိမ်များ ထိခိုက်ခဲ့ပြီး ထိုင်းတပ်ဖွဲ့များက နယ်စပ်ဒေသမှ နောင်ဂျန်ရွာကို “ပြန်လည်သိမ်းပိုက်ရန်” စစ်ဆင်ရေးစတင်ခဲ့ကြောင်း၊ လက်ရှိ အချိန်အထိ နှစ်နိုင်ငံ နယ်စပ်မှ ထိုင်းပြည်သူများကို ဘေးလွတ်ရာသို့ ရွှေ့ပြောင်းပြီးဖြစ်သောကြောင့် ထိခိုက်ဒဏ်ရာရရှိမှု သို့မဟုတ် သေဆုံးမှု မရှိသေးကြောင်း သိရှိရသည်။

သို့ရာတွင် ကမ္ဘောဒီးယားဘက်တွင် အရပ်သားပြည်သူတချို့ သေဆုံးမှုနှင့် စစ်အရာရှိကြီးတချို့ သေဆုံးမှုများရှိနေကြောင်း၊ ထိုင်းဘက်တွင်လည်း ထိုင်းစစ်သားများ ထိခိုက်သေဆုံးမှုများ ဖြစ်ပေါ်နေကြောင်း သိရှိရသည်။

ကမ္ဘောဒီးယားအစိုးရက ယနေ့ နံနက်ပိုင်း ထုတ်ပြန်ချက်တွင် ကမ္ဘောဒီးယား ပြည်သူ ၇ ဦးသေဆုံးပြီး ၂၀ ဦးဒဏ်ရာရရှိကြောင်း၊ထိုင်းက ငြိမ်းချမ်းရေး သဘောတူညီချက်ကို ချိုးဖောက်ကြောင်း သတင်းထုတ်ပြန်ထားသည်။

ထိုင်းဝန်ကြီးချုပ် Anutin Charnvirakul ကမူ စစ်လိုလားသော ကမ္ဘောဒီးယားနှင့် တွေ့ဆုံဆွေးနွေးမည်မဟုတ်ကြောင်း ယမန်နေ့တွင် ထုတ်ဖော်ပြောဆိုထားသည်။

ထိုင်းစစ်တပ်က ယမန်နေ့ F-16 တိုက်လေယာဉ်များဖြင့် လေကြောင်းတိုက် ခိုက်မှုများ လုပ်ဆောင်ခဲ့ပြီး ယနေ့တွင်လည်း လေကြောင်းတိုက်ခိုက်မှုများ လုပ်ဆောင်နေကြောင်း ထိုင်းစစ်တပ်က သတင်းထုတ်ပြန်ထားသည်။