ရန်ကုန်၊ ဖေဖော်ဝါရီ ၂၇
ကချင်ပြည်နယ်၊ ဝိုင်းမော်မြို့နယ်ရှိ ခလရ ၅၈ တပ်ရင်း ကာကင်းစခန်းအချို့ကို သိမ်းပိုက်ရရှိခဲ့ရာ စစ်သား ၁ ဦး သေဆုံးပြီး ၁ ဦးအရှင်ဖမ်းမိခဲ့ကြောင်း KIA စစ်ရေးသတင်းရင်းမြစ်က ရန်ကုန်ခေတ် သစ်သတင်းဌာနထံသို့ ပြောကြားသည်။
ဖေဖော်ဝါရီလ ၂၅ ရက်နေ့ နံနက် ၅ နာရီခန့်အချိန် ဝိုင်းမော်မြို့၊ခလရ ၅၈ ကာကင်းစခန်းတစ်ခုကို KIA တော် လှန်ရေး ပူးပေါင်းတပ်ဖွဲ့များက တိုက်ခိုက်ခဲ့ရာ စစ်သား ၁ ဦးအလောင်းကျန်ရှိခဲ့ပြီး ကျန်စစ် သားများမှာ စခန်း စွန့်ခွာထွက်ပြေးသွားကြောင်း၊ အလားတူ ဖေဖော်ဝါရီလ ၁၂ ရက်နေ့ကလည်း ယင်း ခလရ ၅၈ တပ် ရင်း၏ ကာကင်းစခန်းတစ်ခုကို သိမ်းပိုက်ရရှိခဲ့ရာ စစ်သား ၁ ဦး အရှင်ဖမ်း မိခဲ့ပြီး ကျန်စစ်သားများမှာ စခန်းစွန့်ခွာ ထွက်ပြေးသွားကြောင်း သိရသည်။
“ကာကင်းတွေ သိမ်းဖို့ကတော့ ကျန်သေးတယ်။ အခုချိန်အထိ တိုက်ပွဲက နားလိုက်ဖြစ်လိုက်ပဲ။ ဖေဖော်ဝါရီလ ၂၅ ရက်နေ့က ကတုတ်ကျင်းထဲမှာ သေနေတဲ့စခအလောင်းတစ်လောင်းပဲရခဲ့တာ။ ကျန်တဲ့စခတွေ ထွက် ပြေးသွားတယ်။ ဖေဖော်ဝါရီလ ၁၂ ရက်နေ့ကလည်း ကာကင်းစခန်းဝင်သိမ်းတာ စခန်းမှာကျန်ခဲ့တဲ့ ၁ ဦးအရှင်မိခဲ့တယ်။ ကျန်တဲ့သူတွေထွက်ပြေးသွားတဲ့အချိန်မှာ သူက မသိဘဲစခန်းမှာကျန်နေခဲ့တာ ပါ” ဟု KIA စစ်ရေးသတင်းရင်းမြစ်က ရန်ကုန်ခေတ်သစ်သတင်း ဌာနထံသို့ ပြောကြားသည်။
အလားတူ ဖေဖော်ဝါရီလ ၂၅ ရက်နေ့နှင့် ၂၆ ရက်နေ့တို့တွင် ဗန်းမော်မြို့ရှိ ခလရ ၂၃၆ တပ်ရင်းမှ ကာကင်းစခန်းအချို့ကို KIA တော်လှန်ရေးပူးပေါင်းတပ်ဖွဲ့က သိမ်းပိုက်ရရှိခဲ့ပြီး လက်နက်ခဲယမ်းများ လည်း သိမ်းဆည်းရရှိခဲ့ကြောင်း၊ ယင်းစခန်းသိမ်းတိုက်ပွဲအတွင်း စစ်သားထိခိုက်သေဆုံးမှု၊ လက်နက် ခဲယမ်းသိမ်းဆည်းရရှိမှုအရေအတွက် အတိအကျကို သိရှိရခြင်းမရှိကြောင်း သိရသည်။
“ဗန်းမော်မှာလည်း ကာကင်းစခန်းအချို့ သိမ်းဆည်းရရှိတာရှိတယ်။ ဘယ်နေရာက စခန်းတွေ လည်းတော့ မေးလို့မရသေးဘူး။ လက်နက်ခဲယမ်းတွေလည်း သိမ်းဆည်းရရှိတာရှိတယ်” ဟု KIA စစ်ရေးသတင်းရင်းမြစ်က ပြောဆိုသည်။
ဗန်းမော်မြို့သိမ်းတိုက်ပွဲတွင် KIA ၊ AA ၊ KPDF နှင့် ပြည်သူ့ကာကွယ်ရေးတပ်မတော် – PDF တပ်ဖွဲ့ ဝင်များ ပူးပေါင်းကာ တိုက်ခိုက်နေခြင်းဖြစ်ပြီး နေ့စဉ်နှင့်အမျှ တိုက်ပွဲပြင်းထန်နေဆဲဖြစ်ကြောင်း၊ ဗန်းမော်တိုက်ပွဲအတွင်းသို့ စစ်ကော်မရှင်၏ တံတားဦးလေတပ်နှင့် မြစ်ကြီးနားမြို့ လေတပ်စခန်း တို့မှ တက်လာသော လေယာဉ်များဖြင့် ဗုံးကျဲတိုက်ခိုက်ကာ စစ်ကူပေးနေခြင်းဖြစ်ကြောင်း သိရ သည်။
