ရန်ကုန် ၊ မတ် ၅
အကြမ်းဖက် ဇော်မင်းထွန်းက မြန်မာနိုင်ငံတွင် စက်သုံးဆီ ပြတ်လပ်ရန် မရှိဘဲ အလုံအလောက်ရှိသည်ဟု ယမန်နေ့ ပြောဆိုခဲ့သော်လည်း ပြည်သူများက ယုံကြည်ခြင်းမရှိဘဲ ယနေ့တွင်လည်း နေပြည်တော်၊ မန္တလေးနှင့် ရန်ကုန် အပါအဝင် တစ်နိုင်ငံလုံးရှိ စက်သုံးဆီဆိုင်များတွင် စက်သုံးဆီရရှိရေး တိုးကြိတ် ဝယ်ယူနေရကာ လိုသလောက် ဝယ်မရကြောင်း သိရှိရသည်။
“ဒီမနက်လည်း ဆီဆိုင်တိုင်းလိုလိုမှာ မနက် ၅ နာရီခွဲလောက်ကစပြီး တန်းစီနေကြတာ။ ဒီဇယ်မရတဲ့ဆိုင်၊ 92 ဓာတ်ဆီပဲ ရတဲ့ဆိုင်နဲ့ ငွေ ၅ သောင်းဖိုးပဲ ရောင်းတဲ့ဆိုင်တွေ ရှိတယ်။ ဆီက အကုန် တန်းစီတိုးနေကြတာ။ ဆီမပြတ်လပ်ဘူးဆိုရင် လိုသလောက် ရောင်းပေးရင် တန်းစီစရာမလိုပါဘူး။ အခုက ဆီဆိုင်တွေကို မနက်တစ်ပိုင်း လောက်ရောင်းပြီးရင် ဆီကုန်ပြီဆိုပြီး ပြန်လှည့်ခိုင်းနေတယ်” ဟု ရန်ကုန်မှ တက္ကစီအငှားယာဉ်မောင်းတစ်ဦးက ပြောဆိုသည်။
ရန်ကုန်တိုင်း၊ သီရိမင်္ဂလာစျေးအနီးရှိ 360 ဆီဆိုင်တွင်မူ စက်သုံးဆီ မရှိ၍ ဆိုင်ပိတ်ထားရကြောင်း သိရှိရသည်။
မန္တလေးနှင့် နေပြည်တော်မှ ပြည်သူများကလည်း ဆီဆိုင်များတွင် ဆီများပြတ်လပ်နေပြီး အကန့်အသတ်ဖြင့်သာ ယနေ့ နံနက်ပိုင်း ရောင်းချပေးနေကြောင်း ပြောဆိုသည်။
“နေပြည်တော်မှာ ဒီဇယ်နဲ့ 92 မရတဲ့ ဆိုင်တွေ များတယ်။ ရတဲ့ဆိုင်မှာလည်း ၃ သောင်းဖိုးပဲ ရောင်းတယ်။ ကားတန်းတွေက ဆီတစ်ခါရဖို့ ၁ နာရီလောက် တန်းစီရတယ်” ဟု နေပြည်တော်မှ သတင်းထောက်တစ်ဦးက ပြောဆိုသည်။
အကြမ်းဖက်ဇော်မင်းထွန်းကမူ စက်သုံးဆီ ပြတ်လပ်ရန် မရှိသော်လည်း ကမ္ဘာ့အခြေအနေများကြောင့် စက်သုံးဆီစျေးနှုန်းများမှာမူ ကမ္ဘာ့စျေးနှုန်းနှင့်အညီ ပြောင်းလဲမှုများ ရှိလာနိုင်ကြောင်း ထုတ်ဖော်ပြောဆိုထားသည်။
စစ်တပ်က ပြည်သူများကို စက်သုံးဆီချွေတာရန် ထုတ်ပြန်ခြင်းမှာ ဆီမရှိ၍ မဟုတ်ဘဲ ရေရှည်အတွက် စဉ်း စား၍ လုပ်ဆောင်ခြင်းဖြစ်ကြောင်း၊ စက်သုံးဆီ ပြတ်လပ်စရာ အကြောင်းမရှိဘဲ ရက်ပေါင်း ၄၀ စာအတွက် အရ န်ဆီ ဂါလန် သန်း ၁၃၀ နီးပါး အဆင်သင့်ရှိနေကြောင်း၊ မြန်မာနိုင်ငံ၌ တစ်ရက်လျှင် ဓာတ်ဆီ ၁ ဒသမ ၅ သန်းဂါလန်နှင့် ဒီဇယ်ဆီ ၁ ဒသမ ၇ သန်းဂါလန်၊ စုစုပေါင်း ၃ ဒသမ ၂ သန်းဂါလန်ခန့် သုံးစွဲလျက်ရှိကြောင်း၊ လက်ရှိတွင် ဓာတ်ဆီဂါလန် သန်း ၆၀ နှင့် ဒီဇယ်ဆီဂါလန် သန်း ၇၀ ခန့် စုပုံထားရှိပြီးဖြစ်သဖြင့် အရန်ဆီ ရက် ၄၀ စာ ရှိနေကြောင်း၊ ဆိပ်ကမ်းတွင် ဆိုက်ကပ်ထားသည့် သင်္ဘော ၂ စီးနှင့် လမ်းခရီးတွင် ရောက်ရှိလာမည့် သင်္ဘော ၁၄ စီးရှိသဖြင့် အခက်အခဲ မရှိနိုင်ကြောင်း စစ်တပ် ပြောရေးဆိုခွင့်ရှိသူ အကြမ်းဖက် ဇော်မင်းထွန်းက ယမန်နေ့တွင် ထုတ်ဖော်ပြောဆိုသည်။
အကြမ်းဖက်စစ်တပ်က မတ်လ ၇ ရက်နေ့ စတင်မည့် စက်သုံးဆီ ခြိုးခြံချွေတာသုံးစွဲရေး နံပါတ်ပြားအလိုက် စုံရက်၊ မရက် ခွဲခြား၍ လမ်းပေါ်ထွက်ရမည်ဖြစ်သော်လည်း အလုပ်အသွားအပြန်၊ ကျောင်းပို့/ကြိုနှင့် ကုန်စည်ဖြန့်ဖြူးရေးအတွက် ထောက်ခံစာဖြင့် သွားလာနိုင်ကြောင်း ယမန်နေ့ညပိုင်း သတင်းထုတ်ပြန်သည်။
အရှေ့အလယ်ပိုင်းဒေသ စစ်ရေးပဋိပက္ခများကြောင့် လောင်စာဆီ သယ်ယူပို့ဆောင်ရေး လမ်းကြောင်းများတွင် အဟန့်အတားများ ဖြစ်ပေါ်နေသဖြင့် စက်သုံးဆီ ခြိုးခြံချွေတာရေးအတွက် မော်တော်ယာဉ်များကို နံပါတ်ပြားအလိုက် စုံရက်၊ မရက် ခွဲခြားမောင်းနှင်ရမည်ဟု မတ်လ ၃ ရက်နေ့ တွင် ထုတ်ပြန်ခဲ့ကြောင်း၊ ယင်းနောက် မတ်လ ၄ ရက်နေ့တွင် နောက်ဆက်တွဲ ဖြည့်စွက်ချက်အဖြစ် စီးပွားရေးလုပ်ငန်းများနှင့် ပြည်သူများ သွားလာရေး အဆင်ပြေစေရန်အတွက် အလုပ်အသွားအပြန်၊ ကျောင်းကြို/ပို့နှင့် ကုန်စည်ဖြန့်ဖြူးရေးယာဉ်များကို ထောက်ခံစာဖြင့် နေ့စဉ် သွားလာခွင့်ပြုမည်ဖြစ်ကြောင်း ဆက်လက် ထုတ်ပြန်ခဲ့သည်။
“သူတို့ပြောတဲ့ ထောက်ခံစာက ဌာနဆိုင်ရာ ရုံးထောက်ခံစာလား၊ ပုဂ္ဂလိက အလုပ်ထောက်ခံစာလား၊ အုပ်ကြီးတွေဆီကယူရမယ့် ထောက်ခံစာလား အဲဒါတွေလည်း သေသေချာချာ မပါဘူး။ အုပ်ကြီးတွေဆီက ထောက်ခံစာယူရမယ်ဆိုရင်တော့ အုပ်ကြီးတွေကို အလှူငွေ သို့မဟုတ် ရန်ပုံငွေဆိုပြီး တောင်းကြဦးမှာ။ အရေးယူမယ်ပြောနေတာကလည်း ဘာဥပဒေနဲ့ အရေးယူမှာလဲ။ ထောင်ချမှာလား၊ ဒဏ်ပဲရိုက်မှာလားတော့မသိဘူး။ ဒါပေမယ့် မော်တော်ပီကယ်တွေကတော့ လုပ်စားဂွင်ကြီးဖြစ်ဦးမယ့် အလားအလာပဲ” ဟု နေ့စဉ် အလုပ်သွားနေရသည့် အကောက်ခွန်အေးဂျင့်တစ်ဦးက ပြောဆိုသည်။
စစ်တပ်က မတ်လ ၇ ရက်နေ့မှ စတင်ကာ ပုဂ္ဂလိကယာဉ်များ၊ လုပ်ငန်းသုံးယာဉ်များနှင့် သယ်ယူပို့ဆောင်ရေးယာဉ်များသည် သတ်မှတ်ထားသော စည်းကမ်းချက်များနှင့်အညီ မောင်းနှင်ကြရမည် ဖြစ်ကြောင်း၊ လစဉ် “စုံ” ရက်များတွင် ယာဉ်နံပါတ်အက္ခရာအရှေ့၌ စုံဂဏန်းပါသောယာဉ်များ (ဥပမာ- 2A, 4A) နှင့် “မ” ရက်များတွင် မဂဏန်းပါသောယာဉ်များ (ဥပမာ- 1A, 3A) သာ မောင်းနှင်ရမည် ဖြစ်ကြောင်း၊ စည်းကမ်းချက်များကို ဖောက်ဖျက်ကျူးလွန်ပါက တည်ဆဲဥပဒေများနှင့်အညီ အရေးယူဆောင်ရွက်သွားမည် ဖြစ်ကြောင်း ထုတ်ပြန် ကြေညာထားသည်။
