ရန်ကုန်၊ ဧပြီ ၁၃
အကြမ်းဖက် မင်းအောင်လှိုင်က သမ္မတ ရာထူး အတင်းအကျပ် ရယူမှုအပေါ် တရားဝင် အသိအမှတ်မပြုရန် အာဆီယံဥက္ကဋ္ဌ ဖိလစ်ပိုင်အစိုးရကို အာဆီယံပါလီမန်အမတ်များလူ့အခွင့်အရေးအဖွဲ့- APHRက ယမန်နေ့ တိုက်တွန်းလိုက်သည်။
အာဆီယံပါလီမန်အမတ်များ လူ့အခွင့်အရေးအဖွဲ့ (APHR) က ယခုနှစ် အာဆီယံအလှည့် ကျဥက္ကဋ္ဌ တာဝန်ယူထားသည့် ဖိလစ်ပိုင်နိုင်ငံအနေဖြင့် မင်းအောင်လှိုင် သမ္မတဖြစ်လာပြီးနောက် မြန်မာစစ်ကောင်စီကို တရားဝင်အစိုးရအဖြစ် အသိအမှတ်ပြုမည့် မည်သည့်လုပ်ဆောင်ချက်မျိုးကိုမဆို ငြင်းပယ်ရန် ပြင်းပြင်းထန်ထန် တိုက်တွန်းနှိုးဆော်လိုက်သည်။
စစ်တပ်က ထိန်းချုပ်ထားသည့် ဟန်ပြလုပ်ငန်းစဉ်များမှတစ်ဆင့် မင်းအောင်လှိုင် သမ္မတဖြစ်လာခြင်းသည် ဒီမိုကရေစီစနစ်သို့ ပြန်လည်ကူးပြောင်းမည့် အရိပ်အယောင် လုံးဝမရှိကြောင်း APHR က ထောက်ပြသည်။
ယင်းလုပ်ရပ်သည် အရပ်သားအစိုးရပုံစံဖြင့် စစ်အာဏာရှင်စနစ်ကို အမည်ပြောင်းလဲရန် ကြိုးပမ်းခြင်းသာဖြစ်ပြီး စစ်ကောင်စီသည် ပြည်သူများအပေါ် အကြမ်းဖက်မှုများကို ဆက်လက်လုပ်ဆောင်နေဆဲဖြစ်သည်ဟု ဆိုသည်။
အာဆီယံ၏ ဘုံသဘောတူညီချက် ၅ ရပ်ကို အကောင်အထည်ဖော်ရန် ပျက်ကွက်နေသည့် စစ်ကောင်စီနှင့် ဆက်လက် ထိတွေ့ဆက်ဆံနေခြင်းသည် စစ်တပ်အား ပိုမိုရဲတင်းစေပြီး အာဆီယံ၏ ဂုဏ်သိက္ခာကို ထိခိုက်စေကြောင်း APHR က သတိပေးထားသည်။
လေကြောင်းတိုက်ခိုက်မှုများ၊ အစုလိုက်အပြုံလိုက် ဖမ်းဆီးမှုများနှင့် ဒီမိုကရေစီ လိုလားသူများကို ဖယ်ကျဉ်ထားမှုများက စစ်ကောင်စီ၏ ပြုပြင်ပြောင်းလဲရေးဆိုသည်မှာ အနှစ် သာရမရှိကြောင်း သက်သေပြနေသည်ဟု APHR က ထောက်ပြသည်။
ဖိလစ်ပိုင်နိုင်ငံအနေဖြင့် အာဆီယံဥက္ကဋ္ဌအဖြစ် တာဝန်ယူထားသည့်အတိုင်း စစ်ကောင်စီအား တရားဝင်အစိုးရအဖြစ် ဆက်ဆံခြင်းကို ရပ်တန့်ရန်၊ ဒီမိုကရေစီအင်အားစုများဖြစ်သော အမျိုးသားညီညွတ်ရေးအစိုးရ (NUG)၊ ဖက်ဒရယ်ဒီမိုကရေစီပြည်ထောင်စု ပေါ်ထွန်းရေးဦးဆောင်ကောင်စီ (SCEF)၊ တိုင်းရင်းသားလက်နက်ကိုင်အဖွဲ့အစည်းများ (EROs) နှင့် အရပ်ဘက်အဖွဲ့အစည်းများကို ဦးစားပေးဆက်ဆံရန် APHR က တိုက်တွန်းသည်။
ယင်းအပြင် လူသားချင်းစာနာမှု အကူအညီများဖြစ်သော နယ်စပ်ဖြတ်ကျော် အကူအညီပေးရေးလုပ်ငန်းများကို ပိုမိုပံ့ပိုးကူညီရန်၊စစ်တပ်က ကျူးလွန်ထားသည့် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများအတွက် အရေးယူနိုင်မည့် လမ်းစများ ဖော်ဆောင်ရန် ဆက်လက်တိုက်တွန်းသည်။
မင်းအောင်လှိုင်အနေဖြင့် သူ့ကိုယ်သူ သမ္မတအဖြစ် ခန့်အပ်မှုကို တရားဝင်အဖြစ် အသိအမှတ်မပြုသင့်ဘဲ ဒေသတွင်း တုံ့ပြန်မှုများသည် မြန်မာပြည်သူများ၏ ဆန္ဒနှင့်အညီ ဖြစ်သင့်ကြောင်း၊ သို့မဟုတ်ပါက အာဏာရှင်စနစ် အမြစ်တွယ်ပြီး မြန်မာ့အရေး အကျပ် အတည်းများ ပိုမိုရှည်ကြာသွားနိုင်ကြောင်း APHR က ထောက်ပြထားသည်။
