စစ်ကိုင်းမြို့နယ်အတွင်း စစ်ကြောင်းထိုးလာသည့် စစ်တပ်ကို ခုခံတိုက်ခိုက်ရန် သွားရောက်စဥ် ကင်းပုန်းဝပ် တိုက်ခိုက်ခံရပြီး PDF ရဲဘော် ၁၄ ဦးကျဆုံး
ရန်ကုန်၊ ဇွန် ၂၈
စစ်ကိုင်းတိုင်း၊ စစ်ကိုင်းမြို့နယ်၊ စဉ့်ကိုင်တလိုင်းကျေးရွာဘက်သို့ စစ်ကြောင်းထိုးလာသည့် အကြမ်းဖက် စစ်တပ် စစ်ကြောင်းကို ခုခံတိုက်ခိုက်ရန် သွားရောက်စဥ် ကင်းပုန်းဝပ် တိုက်ခိုက်ခံရပြီး PDF ရဲဘော် ၁၄ ဦးကျဆုံးခဲ့ကြောင်း စစ်ကိုင်းခရိုင်တပ်ရင်း ၃ မှ တာဝန်ရှိသူတစ်ဦးက ရန်ကုန် ခေတ်သစ်သတင်းဌာနထံသို့ ပြောကြားသည်။
ယနေ့ ဇွန်လ ၂၈ ရက်တွင် မင်းကွန်းဘက်မှ မြစ်ကြောင်းအတိုင်း ဖလက်ခွံမော်တော်ဖြင့် ဆန်တက် လာသော အကြမ်းဖက် စစ်ကြောင်းသည် အုတ်ဖိုကျေးရွာ၌ ဆိုက်ကပ်ပြီး စဉ့်ကိုင်တလိုင်းကျေးရွာ ဘက်သို့ စစ်ကြောင်းထိုးလာသောကြောင့် စစ်ကိုင်းခရိုင်တပ်ရင်း ၃ နှင့် တပ်ရင်း ၁ တို့ပူးပေါင်းပြီး ခုခံတိုက်ခိုက်ရန်သွားရောက်စဉ် အကြမ်းဖက် စစ်တပ်၏ ကင်းပုန်းဝပ် တိုက်ခိုက်ခံရပြီး PDF ရဲဘော် ၁၄ ဦးကျဆုံးကာ လက်နက်များလည်း ဆုံးရှုံးခဲ့ကြောင်း သိရသည်။
“အလောင်းတွေကို စစ်ခွေးတွေက မီးရှို့သွားတယ်၊ ရွာပြင်မှာပဲ၊ ထိုးကြောင်းထိုးလာလို့ ကာဖို့ လုပ်တဲ့ အချိန် ဖြစ်သွားတာပါ၊ဟိုဘက်က ကင်းပုန်းနဲ့တွေ့ပြီး ထိတွေ့မှုဖြစ်ကျဆုံးသွားတာပါ၊” ဟု စစ်ကိုင်းခရိုင် တပ်ရင်း ၃ မှ တာဝန်ရှိသူတစ်ဦးက ရန်ကုန် ခေတ်သစ်သတင်းဌာနထံသို့ ပြောကြားသည်။
အကြမ်းဖက်စစ်တပ်၏ တိုက်ခိုက်ခံရမှုကြောင့် စစ်ကိုင်းခရိုင်တပ်ရင်း ၃ မှ ဒုတပ်ရင်းမှူး ရဲဘော် အဇဲ၊ တပ်ခွဲမှူး ရဲဘော် လင်းရောင်၊ တပ်စိပ်မှူး ရဲဘော်တိုးကြီး၊ ရဲဘော် ငရဲ၊ ရဲဘော် ဆံဝါ၊ ရဲဘော် နန်းကြီး၊ ရဲဘော်တေဇ၊ ရဲဘော် စိုးကြီး၊ ရဲဘော် ရဲဇော်တို့ကျဆုံးကာ စစ်ကိုင်းခရိုင်တပ်ရင်း ၁ မှ ရဲဘော် ၅ ဦး တို့ ကျဆုံးခဲ့ကြောင်း သိရသည်။
ယင်းအကြမ်းဖက်စစ်ကြောင်းသည် စစ်ကိုင်းမြို့နယ် ထန်းကြီးကျေးရွာသို့ရောက်ရှိနေပြီး ကျောင်းဖြူရွာ နှင့် တလိုင်းရွာကြား၌လည်း အဖွဲ့တစ်ဖွဲ့ရှိကြောင်း သိရသည်။
