မူးနှင့် ရွှေကျင် မြို့နယ်ရှိ ကျေးရွာများကို စစ်တပ်က လေကြောင်းမှ ဗုံးကျဲပြီး လက်နက်ကြီးဖြင့် ပစ်ခတ်မှု ပြည်သူ ၂ ဦးသေဆုံး
ရန်ကုန်၊ စက်တင်ဘာ ၆
ပဲခူးတိုင်း၊ မူးမြို့နယ်နှင့် ရွှေကျင်မြို့နယ်ရှိ ကျေးရွာများကို စစ်တပ်က လေကြောင်းမှ ဗုံးကျဲပြီး လက်နက်ကြီးဖြင့် ပစ်ခတ်မှု ပြည်သူ ၂ ဦးသေဆုံးခဲ့ကြောင်း ကေအဲန်ယူ ဗဟို က ထုတ်ပြန်ထားသည်။
စက်တင်ဘာလ ၃ ရက်နေ့တွင် မူး(မုန်း) မြို့နယ်တွင် အကြမ်းဖက် စစ်တပ်နှင့် ကရင်အမျိုးသား လွတ်မြောက်ရေး တပ်မတော် (K.N.L.A) တပ်မဟာ ၃ လက်အောက်ခံ တပ်များ အကြား တိုက်ပွဲ ၂ နာရီကြာဖြစ်ပွားခဲ့ပြီး အကြမ်းဖက် စစ်တပ်၏ ခမရ−၄၃၉ တပ်ရင်းနှင့် ခလရ−၆၀ တပ်ရင်းများက လက်နက်ကြီး ၆၃ လုံး ပစ်ခတ်ခဲ့ရာ ဟော်ခိုဝေါ် (ငထွေစုပ်) ရွာ ဘုရားအနားတွင် အလုံး ၃၀ နှင့် ဝေကော်ရွာတွင် ၃၂ လုံး ကျရောက် ပေါက်ကွဲခဲ့ကြောင်း သိရသည်။
အဆိုပါ ထိတွေ့တိုက်ပွဲများအတွင်း အကြမ်းဖက် စစ်တပ်က ဟော်ခိုဝေါ် (ငထွေစုပ်) ကျေးရွာအတွင်း လေကြောင်းမှ ဗုံးကျဲ တိုက်ခိုက်ခြင်းကြောင့် အသက် ၁၂ နှစ်အရွယ် စောလားခူဝါး သေဆုံးခဲ့ပြီး စောအယ်ကော်ထူး၊ စောညီနိုင်၊ နော်မနိုး၊ နော်မနိုးရီယာ၊ စောဝါစီနှင့် စောဂျိုးတို့ ထိခိုက် ဒဏ်ရာရရှိကာ နေအိမ် ၃ လုံးထိမှန်ပြီး ပျက်စီးခဲ့ကြောင်း၊ မျက်ရဲကရင်ရွာ၊ ဟော်ခိုဝေါ် (ငထွေစုပ်) ရွာ၊ ဆေးပုလဲရွာ၊ မိသ္သလင် ကျေးရွာနှင့် ဗမာမျက်ရဲကျေးရွာတို့မှ ပြည်သူ ၂၈၀၂ ဦးလည်း ဘေးလွတ်ရာသို့ ထွက်ပြေး တိမ်းရှောင်နေရကြောင်း သိရှိရသည်။
စက်တင်ဘာလ ၄ ရက်နေ့ နံနက် ၉ နာရီ ၃၀ မိနစ်တွင် မူး (မုန်း) မြို့နယ်ရှိ လည်ပတ်တွင်အခြေချ တပ်စွဲထားသော အကြမ်းဖက် စစ်တပ်၏ ခလရ−၆၀ တပ်ရင်းမှ ပရဲစီ ကျေးရွာအတွင်းကို လက်နက်ကြီး ၃ လုံး ပစ်ခတ်ခဲ့ရာ အသက် ၈၃ နှစ်အရွယ် စောကျော်ဟိန်း ပွဲချင်းပြီး သေဆုံးကာ နော်ဒါးရေ ၊ နော်အယ်ခူဆဲနှင့် ညားတာမ တို့ ထိခိုက်ဒဏ်ရာ ရရှိခဲ့ကြောင်း သိရသည်။
ဆောထိ (ရွှေကျင်) မြို့နယ်တွင် အကြမ်းဖက် စစ်တပ်၏ ပုဇွန်မြောင်းတွင်ရှိသော အမြောက်တပ် ခမရ−၂၀ တပ်ရင်းက လက်နက်ကြီးများဖြင့် စက်တင်ဘာလ ၄ ရက်နေ့ ညနေ ၄ နာရီ ၁၅ မိနစ်တွင် ညောင်ပင်ကြီး ကျေးရွာအတွင်းကို ပစ်ခတ်ခဲ့ပြီး အသက် ၁၉ နှစ်အရွယ် မျိုးမျိုးထွေး နောက်ကျောထိ ဒဏ်ရာရ၊ အသက် ၈ နှစ်အရွယါ အေးမွန်ခိုင် မျက်ခမ်းထိ ဒဏ်ရာရ နှင့် အသက် ၃၈ နှစ်အရွယ် မမြင့်မာ ခြေထောက် ထိခိုက်ဒဏ်ရာရှိခဲ့ကြောင်း၊ ည ၉ နာရီခန့်တွင်လည်း ခမရ- ၂၀ တပ်ရင်းက လက်နက်ကြီးများဖြင့် ထပ်မံပစ်ခတ်ခဲ့ရာ ဝိုင်ကျိုး ကျေးရွာအတွင်း ကျရောက်ခဲ့ပြီး အသက် ၆ လအရွယ် ချစ်ကိုနိုင် ခါးအောက်ပိုင်းကို ထိမှန်ကာ ထိခိုက်ဒဏ်ရာရရှိခဲ့ကြောင်း သိရှိရသည်။
