ကိုးကန့်ဒေသတွင် ဖြစ်ပွားခဲ့သော တိုက်ပွဲအတွင်း စစ်ကောင်စီ တပ်ဖွဲ့ဝင် ၁၂ ဦးသေဆုံး၊ စစ်တပ်ထံမှ လက်နက်ခဲယမ်းနှင့် မူးယစ်ဆေးဝါးများ သိမ်းဆည်းရရှိ
ရန်ကုန်၊ အောက်တိုဘာ ၂၅
ရှမ်းပြည်နယ်၊ ကိုးကန့်ဒေသတွင် အကြမ်းဖက် စစ်ကောင်စီတပ်ဖွဲ့များ နှင့် MNDAA တပ်ဖွဲ့တို့ အကြား ဖြစ်ပွားခဲ့သော တိုက်ပွဲများအတွင်း စစ်ကောင်စီ တပ်ဖွဲ့ဝင် ၁၂ ဦးသေဆုံးခဲ့ကြောင်း MNDAA က ထုတ်ပြန်ထားသည်။
အောက်တိုဘာလ ၂၁ ရက်နေ့ မွန်းလွဲ ၁ နာရီ ၄၃ မိနစ်ခန့်က ကိုးကန့်ခရိုင်၊ ရှင်ဝမ်ဒေသ ၊ ရှိပတ်လင် စာသင်ကျောင်း၌ တပ်စွဲထားသော အကြမ်းဖက် စစ်သားများနှင့် စစ်တပ် လက်အောက်ခံ ပတ်စော်ချိန် ပြည်သူ့စစ် အဖွဲ့ ၏ စခန်းကို မြန်မာအမျိုးသား ဒီမိုကရက်တစ်မဟာမိတ် တပ်မတော် ကိုးကန့် (MNDAA) က ထိုးစစ်ဆင်တိုက်ခိုက်ခဲ့ရာ အကြမ်းဖက် စစ်ကောင်စီတပ်ဖွဲ့ဝင် ၈ ဦးသေဆုံးပြီး ဒရုန်း ၂ စီးနှင့် ကား ၄ စီးတို့ ပျက်စီးခဲ့ကြောင်း၊ ယင်းတိုက်ပွဲအတွင်း စစ်တပ်ထံမှ ကျည်ကာ အင်္ကျီ ၁ ထည်၊ ကျည်ဘောက် ၃ ခုနှင့် ကျည်အတောင့် ၆၀ တို့ကို သိမ်းဆည်းရရှိခဲ့ကြောင်း သိရသည်။
ထို့ပြင် ယင်းနေ့ မွန်းလွဲ ၂ နာရီ ၅ မိနစ်ခန့်တွင် နမ့်ခုံဟော်ရွာနှင့် ရှိပတ်လင်ကျေးရွာမှ အကြမ်းဖက် စစ်ကောင်စီ တပ်ဖွဲ့နှင့် ကိုးကန့် ပြည်သူ့စစ် ပူးပေါင်း အင်အား ၁၀၀ ခန့်သည် လက်နက်ကြီး ပစ်ကူယူကာ MNDAA ၏ ခံတပ်ကို ထိုးစစ်ဆင် တိုက်ခိုက်လာသောကြောင့် ၃ နာရီခန့်အကြာ တိုက်ပွဲဖြစ်ပွားခဲ့ပြီး အကြမ်းဖက် စစ်ကောင်စီတပ်ဖွဲ့ဝင် ၃ ဦးသေဆုံးကာ ကျည်ဘောက် ၁ ခု၊ ကျည် ၂၆ တောင့်ကို သိမ်းဆည်းရရှိခဲ့ကြောင်း သိရှိရသည်။
အောက်တိုဘာလ ၂၄ ရက်နေ့တွင် တိုက်ပွဲဖြစ်ပွားရာ နေရာကို မြန်မာအမျိုးသားဒီမိုကရက်တစ်မဟာမိတ် တပ်မတော် ကိုးကန့် (MNDAA) က နယ်မြေရှင်းလင်းရေးလုပ်ဆောင်ခဲ့ရာ လက်နက်ခဲယမ်းအချို့၊ မူးယစ် ဆေးဝါးစိတ်ကြွပြား ၄ ထုပ်နှင့် မြေမြုပ်ထားသည့် ကိုးကန့်ပြည်သူ့စစ် တပ်ဖွဲ့ဝင် ၁ ဦး၏ ရုပ်အလောင်းတစ်လောင်းတို့ကို တွေ့ရှိခဲ့ရကြောင်း သိရသည်။
စစ်မြေပြင်၌ ကိုးကန့်လူမျိုးနှင့် မင်းအောင်လှိုင်တပ်ဖွဲ့တို့ပူးပေါင်း ရောနှောနေသည် ကိုမတွေ့ချင်ကြောင်း၊ ကိုးကန့်(MNDAA) သည် ကိုးကန့်လူမျိုးအချင်းချင်း မပစ်ခတ်ဟု ဆိုသည့် ရပ်တည်ချက်ကို စွဲမြဲထား သော်လည်း သေနတ်ဖြင့် ကိုယ့်လူကို ချိန်စပါက မိမိတို့ဘက်မှ တုံ့ပြန်သွားမည်ဖြစ်ကြောင်း မြန်မာ အမျိုးသားဒီမိုကရက်တစ်မဟာမိတ် တပ်မတော် ကိုးကန့် (MNDAA)မှအရာရှိတစ်ဦးက ပြောဆို ထားသည်။
