ဒီပဲယင်းမြို့နယ်တွင် သံဃာတော်များက စစ်ကောင်စီကို ပတ္တနိက္ကုဇ္ဇန ကံဆောင်သပိတ် ပြုလုပ်ပြီး ကျောင်းသား ပြည်သူများနှင့်အတူ ချီတက် ဆန္ဒပြ
ရန်ကုန်၊ ဇွန် ၂၈
ဒီပဲယင်းမြို့နယ်တွင် သံဃာတော်များက အကြမ်းဖက် စစ်ကောင်စီကို ပတ္တနိက္ကုဇ္ဇန ကံဆောင်သပိတ် ပြုလုပ်ပြီး ကျောင်းသား ပြည်သူများနှင့်အတူ ယနေ့ ဇွန်လ ၂၈ ရက်နေ့တွင် ချီတက် ဆန္ဒပြခဲ့ကြောင်း သိရသည်။
အဆိုပါ ပတ္တနိက္ကုဇ္ဇနကံဆောင် သပိတ် ချီတက် ဆန္ဒပြပွဲကို S&C မီးဘေးစစ်ဘေးပညာရေးကူညီစောင့်ရှောက်ရေးအဖွဲ့ မှ ဦးဆောင်ပြီး ဒီပဲယင်းမြို့နယ်အတွင်းရှိ သံဃာတော်များ ပြည်သူများ ကျောင်းသား ကျောင်းသူများ အင်အား ၅၀၀ ကျော် ဖြင့် စတင်လိုက်ခြင်းဖြစ်ကြောင်း သိရသည်။
ထို့ပြင် သပိတ်စစ်ကြောင်း လုံခြုံရေး အတွက် ကာကွယ်ရေးအဖွဲ့များကလည်း လိုက်ပါ ဝန်းရံပေးခဲ့ကြောင်း S&C မီးဘေးစစ်ဘေးပညာရေးကူညီစောင့်ရှောက်ရေးအဖွဲ့ မှ တာဝန်ရှိသူ တစ်ဦးက ပြောဆိုသည်။
ပတ္တနိက္ကုဇ္ဇနကံဆောင် သပိတ်ကို ဇွန်လ ၂၃ ရက်နေ့တွင် ချောင်းဦးမြို့နယ်မှ သံဃာတော်များ စတင်ပြုလုပ်ခြင်းဖြစ်ပြီး ဇွန်လ ၂၄ ရက်၊ ၂၅ ရက်နှင့် ၂၆ ရက်နေ့တို့တွင် ဒီပဲယင်းမြို့နယ်၊ တန့်ဆည်မြို့နယ်၊ ဆားလင်းကြီးမြို့နယ်နှင့် စစ်ကိုင်းမြို့နယ်တို့မှ သံဃာတော်များ ပူးပေါင်းခဲ့ကာ ယနေ့ ဇွန်လ ၂၇ ရက်နေ့တွင် မုံရွာမြို့နယ်နှင့် မြိုင်မြို့နယ်တို့မှ သံဃာတော်များပါ ပူးပေါင်း ပါဝင်ခဲ့ခြင်း ဖြစ်ကြောင်း သိရှိရသည်။
အကြမ်းဖက် စစ်ကောင်စီကို ပတ္တနိက္ကုဇ္ဇန ကံဆောင်သပိတ် ပြုလုပ်ရာတွင် စစ်ကောင်စီကို သံဃာထုက အဆက် အဆံ မပြုရန် တစ်ညီတစ်ညွတ်တည်း ဆုံးဖြတ်ချက် ချခြင်းဖြစ်ပြီး ဇွန်လ ၁၉ ရက်နေ့၌ နိုင်ငံတော်သံဃမဟာနာယက အဖွဲ့ဝင် ဝင်းနိမ္မိတာရုံဆရာတော်ကို စစ်ကောင်စီက ပစ်ခတ်သတ်ဖြတ်လိုက်ပြီးနောက် သံဃာတော်များက စစ်ကောင်စီကို ပတ္တနိက္ကုဇ္ဇန ကံဆောင်သပိတ်မှောက်လာကြခြင်းဖြစ်ကြောင်း သိရသည်။
