စစ်တပ်က MNDAA ထိန်းချုပ်ထားသော အထူးဒေသ ၁ နယ်မြေများကို ၃ လတာအတွင်း လေကြောင်း တိုက်ခိုက်မှု ၂၅ ကြိမ် ပြုလုပ်ခဲ့ပြီး ပြည်သူ အနည်းဆုံး ၃၁ ဦး ထက်မနည်း သေဆုံးကာ ၉၀ ဦး ဒဏ်ရာရရှိ
ရန်ကုန်၊ အောက်တိုဘာ ၂
အကြမ်းဖက် စစ်တပ်က MNDAA ထိန်းချုပ်ထားသော အထူးဒေသ ၁ နယ်မြေများကို ၃ လတာအတွင်း လေကြောင်း တိုက်ခိုက်မှု ၂၅ ကြိမ် ပြုလုပ်ခဲ့ပြီး ပြည်သူ အနည်းဆုံး ၃၁ ဦး ထက်မနည်း သေဆုံးကာ ၉၀ ဦး ဒဏ်ရာရရှိခဲ့ကြောင်း MNDAA က ပြောဆိုသည်။
စစ်မြေပြင်တွင် ရှုံးနိမ့်သည့်အခါတိုင်း လက်တုံ့ပြန်သည့်အနေဖြင့် မခွဲခြားသော လေကြောင်း ဗုံးကျဲတိုက်ခိုက်မှုများနှင့် ပစ်ခတ်မှုများသည် မင်းအောင်လှိုင်၏ အာဏာသိမ်းတပ်၏ လုပ်ရိုးလုပ်စဉ်တစ်ခု ဖြစ်လာပြီး နိုင်ငံတစ်ဝှမ်း အဖြစ်ဆိုးများစွာ ဖြစ်ပေါ်စေခဲ့ကြောင်း၊ ဇူလိုင်လတွင် လားရှိုးစစ်ပွဲတွင် မကြာခဏရှုံးနိမ့်မှုများကြောင့် လက်တုံ့ပြန်သည့်အနေဖြင့် လေကြောင်း ဗုံးကျဲ တိုက်ခိုက်ခံရသည့် ဧရိယာများတွင် မြို့တော် လောက်ကိုင်မြို့၊ သိန္နီခရိုင်နှင့် အခြားနယ်မြေများ ပါဝင်ပြီး မင်းအောင်လှိုင်၏ အာဏာသိမ်းတပ်သည် အထူးဒေသ ၁ တွင် စစ်နယ်မြေ မဟုတ်သော ဒေသများကို ဗုံးကျဲ တိုက်ခိုက်ရေး လေယာဉ်များကို ဆက်တိုက်
စေလွှတ်ခဲ့ပြီး စစ်ပြေငြိမ်းပြီးနောက် လားရှိုးမြို့ကိုလည်း မင်းအောင်လှိုင်၏ အာဏာသိမ်းတပ်က ဗုံးကျဲခဲ့ပြီး စက်တင်ဘာလနှောင်းပိုင်းတွင် ဆက်တိုက်ဗုံးကျဲခဲ့ကြောင်း သိရသည်။
စက်တင်ဘာလ ၃၀ ရက်နေ့အထိ တိုက်ပွဲများ မရှိခဲ့ဘဲ မင်းအောင်လှိုင်၏ အာဏာသိမ်းတပ်သည် အထူးဒေသ ၁ (လားရှိုးမြို့အပါအဝင်) တွင် လေကြောင်းတိုက်ခိုက်မှု အနည်းဆုံး ၂၅ ကြိမ် ပြုလုပ်ခဲ့ပြီး လေကြောင်းမှ ဗုံးအလုံး ၁၀၀ ကျော်ကျဲချခဲ့ကြောင်း၊ အဆိုပါ လေကြောင်းတိုက်ခိုက်မှု ၁၆ ကြိမ်တွင် အရပ်သားသေဆုံးမှုဖြစ်ပွားခဲ့ပြီး ယခုအချိန်အထိ လူ ၃၁ ဦး သေဆုံးကာ ၉၀ ကျော် ဒဏ်ရာရရှိခဲ့ပြီး မရေမတွက်နိုင်သော အများပိုင် အဆောက်အအုံများဖြစ်သည့် နေအိမ်များ၊ ဟိုတယ်များနှင့် စာသင်ကျောင်းများ ပျက်စီးခဲ့ပြီး ပြည်သူများ၏ ပိုင်ဆိုင်မှုများ ထိခိုက်ပျက်စီးမှုသည် တိုင်းတာ၍ မရနိုင်သေးကြောင်း သိရှိရသည်။
ဇူလိုင်လ ၁၂ ရက်နေ့ နံနက် ၁ နာရီ ၁၅ မိနစ်မှ ၃ နာရီ ၃၀ မိနစ်အကြားတွင် မင်းအောင်လှိုင်၏ အာဏာသိမ်းတပ်သည် အထူးဒေသ ၁ ဖြစ်သည့် သိန္နီခရိုင်ရှိ လူနေရပ်ကွက်များကို အကြိမ်ကြိမ် ဗုံးကျဲတိုက်ခိုက်ခဲ့ရာ ဒေသခံ အရပ်သားတစ်ဦး သေဆုံးခဲ့ကြောင်း၊ မြန်မာစာသင်ကျောင်း ဗုံးကျဲ ဖျက်ဆီးခံရကာ ယခင် မင်းအောင်လှိုင် အာဏာသိမ်းတပ်၏ နည်းပညာ ရုံးခန်းဟောင်း ၂ လုံး ဗုံးကျဲခံရပြီး နေအိမ် ၄ လုံး ဗုံးကျဲခံရကြောင်း သိရသည်။
ဇူလိုင်လ ၁၄ ရက်နေ့ နံနက် ၂ နာရီ ၃၀ မိနစ်တွင် မင်းအောင်လှိုင်၏ အာဏာသိမ်း တိုက်လေယာဉ်များက အထူးဒေသ(၁)၏ မြို့တော် လောင်ကိုင်မြို့ တုံချိန်ဒေသကို ဗုံးကျဲ တိုက်ခိုက်ခဲ့ရာ ဒေသခံ အရပ်သား ၁ ဦး သေဆုံးကာ အရပ်သား ၁ ဦး ဒဏ်ရာ ရရှိခဲ့ပြီး အနီးနားရှိ ဟိုတယ်နှင့် အဆောက်အဦများ ပျက်စီးခဲ့ကြောင်း သိရှိရသည်။
ဇူလိုင်လ ၁၈ ရက်နေ့ ညနေ ၄ နာရီ ၃၇ မိနစ်တွင် မင်းအောင်လှိုင်၏ အာဏာသိမ်းတပ်မှ တိုက်လေယာဉ် ၂ စင်း စေလွှတ်ပြီး အထူးဒေသ(၁)သိန္နီခရိုင်ရှိ လူနေရပ်ကွက်များကို ဖောက်ခွဲဖျက်ဆီးပစ်ခဲ့ရာ စုစုပေါင်း ဗုံး ၈ လုံး ကျဲချခဲ့ကြောင်း၊ သိန္နီမြို့ရှိ လမ်းများနှင့် နေအိမ်များကို ဗုံးကျဲ တိုက်ခိုက်ခဲ့ရာ ၈ ဦးသေဆုံးကာ ၈ ဦး ဒဏ်ရာရခဲ့ပြီး ၅ ဦး ဒဏ်ရာအပြင်းအထန်ရရှိခဲ့ကြောင်း သိရသည်။
ဇူလိုင်လ ၂၃ ရက်နေ့ နံနက် အစောပိုင်း ၁၂ နာရီ ၁၈ မိနစ်ခန့်တွင် မင်းအောင်လှိုင်၏ အာဏာသိမ်း တပ်သည် ပြည်ထောင်စု မြန်မာနိုင်ငံ အထူးဒေသ (၁) ၏ မြို့တော် လောက်ကိုင်မြို့ တုံချိန်ဒေသကို ထပ်မံတိုက်ခိုက်ခဲ့ရာ အရပ်သား ၂ ဦး သေဆုံးပြီး အနည်းဆုံး ၇ ဦး ဒဏ်ရာရရှိခဲ့ကြောင်း သိရှိရသည်။
ဇူလိုင်လ ၂၄ ရက်နေ့ နံနက် ၁ နာရီ ၄၅ မိနစ်တွင် မင်းအောင်လှိုင် အာဏာသိမ်းတပ်သည် လောက်ကိုင်မြို့ ရွှေဆင်（Jin Xiangcheng）ဒေသ မူလ ၃၁၁ ရင်ပြင် အနီးတွင် အနီးနားတွင် ဗုံး ၂ ကြိမ်ကျဲချခဲ့ပြီး စုစုပေါင်း ဗုံး ၄ လုံး ကျဲချခြင်းကြောင့် အနီးနားရှိ အရပ်သား ၂ ဦး ဒဏ်ရာ အနည်းငယ် ရရှိခဲ့ကြောင်း သိရသည်။
ဇူလိုင်လ ၂၈ ရက်နေ့ နံနက်အစောပိုင်းတွင် မင်းအောင်လှိုင် အာဏာသိမ်းတပ်သည် သိန္နီမြို့ပေါ်၌ နောက်ထပ်လေကြောင်းဖြင့် ဗုံးကျဲတိုက်ခိုက်မှုပြုလုပ်ရန် တိုက်လေယာဉ်များ စေလွှတ်ခဲ့ရာ ဒေသခံ အရပ်သား ၂ ဦး သေဆုံးကာ ၅ ဦး ဒဏ်ရာရရှိခဲ့ကာ အရပ်သား နေအိမ်အများအပြား ပျက်စီးခဲ့ကြောင်း သိရှိရသည်။
ဩဂုတ်လ ၂ ရက်နေ့နှင့် ၅ ရက်နေ့တို့တွင် မင်းအောင်လှိုင်၏ အာဏာသိမ်းတပ်သည် လောက်ကိုင်မြို့ တုံချိန်ဒေသနှင့် ကိုးကန့်ခရိုင် တုံရှန်ဒေသ ထိုင်ဖျင်မြို့နယ်ရှီ ဇီယွမ်ကျေးရွာတွင် ဗုံးကြဲတိုက်ခိုက်ခဲ့ရာ အရပ်သား ၁ ဦး သေဆုံးပြီး ၂ ဦး ဒဏ်ရာ ပြင်းထန်ရ၍ လူအများဒဏ်ရာ အနည်းငယ်ရရှိကြောင်း၊ အထူးဒေသ (၁) ကွတ်ခိုင်ခရိုင်ကိုလည်း ဗုံးကျဲရန် တိုက်လေယာဉ်များ စေလွှတ်ခဲ့ရာ မြို့ပေါ်နှင့် အဓိကလမ်းမကြီးများပေါ်တွင် ဗုံးများကျရောက်ခဲ့ပြီး အပြစ်မဲ့ ဒေသခံ အနည်းဆုံး ၈ ဦးထက်မနည်း သေဆုံးပြီး ၁၂ ဦး ဒဏ်ရာ အပြင်းအထန်ရကာ လမ်းဘေးအိမ်များ အများအပြား ပျက်စီးခဲ့ကြောင်း သိရသည်။
စက်တင်ဘာ ၉ ရက် ၊ ၁၃ ရက်၊ ၂၁ ရက်နှင့် ၂၄ ရက်နေ့တို့တွင် မင်းအောင်လှိုင် ၏ အာဏာသိမ်း တပ်ဖွဲ့ က လားရှိုးမြို့ အရပ်သား နယ်မြေများကို လေကြောင်းမှ ဗုံး ၂ လုံး ကြဲချခဲ့ပြီး အပြစ်မဲ့အရပ်သား အနည်းဆုံး ၁၅ ဦးထက်မနည်း ဒဏ်ရာရခဲ့ပြီး ပတ်ဝန်းကျင်ရှိ လူနေအဆောက်အအုံများ၊ ဓာတ်ကြိုးများနှင့် အခြားအများပြည်သူဆိုင်ရာ အဆောက်အအုံများ အများအပြား ထိခိုက်ပျက်စီးခဲ့ကြောင်း၊ သိန္နီခရိုင် သံလွင်လျင်ဟိုန်ဒေသ နန်ဘန်းမြို့နယ်ကို လေကြောင်းမှ ဗုံးကြဲတိုက်ခိုက်မှု ထပ်မံပြုလုပ်ခဲ့ရာ အပြစ်မဲ့ပြည်သူ ၅ ဦး သေဆုံးပြီး ၈ ဦး ဒဏ်ရာရရှိခဲ့ပြီး ယင်း၌ ၃ ဦး ဒဏ်ရာအပြင်းအထန် ရရှိခဲ့ကြောင်း၊ လားရှိုးတိုက်ပွဲများ ငြိမ်သက်သွားပြီးနောက် မင်းအောင်လှိုင်၏ အာဏာသိမ်းတပ်သည် လားရှိုးမြို့ပေါ်၌ စတုတ္ထအကြိမ် လေကြောင်း ဗုံးကြဲတိုက်ခိုက်မှုဖြင့် ဒေသခံ အရပ်သားတစ်ဦး ဒဏ်ရာရရှိစေခဲ့ကြောင်း၊ လားရှိုးမြို့ ကို လေကြောင်းမှ ဗုံးကြဲတိုက်ခိုက်ခဲ့ရာ ဒေသခံ အရပ်သား ၁ ဦး သေဆုံးကာ ၁၆ ဦး ဒဏ်ရာရရှိကာ လူနေအိမ် အများအပြား ပျက်စီးခဲ့ကြောင်း သိရှိရသည်။
စက်တင်ဘာလ ၂၇ ရက်၊ ၂၈ ရက်နှင့် ၃၀ ရက်နေ့တို့တွင် လားရှိုးရပ်ကွက် ၂ မြို့မစျေး၊ အနီးတဝိုက်ရှိ လူနေရပ်ကွက်များနှင့် ရပ်ကွက် ၁ လူနေရပ်ကွက်များကို လေကြောင်းတိုက်ခိုက်မှု ၃ ကြိမ် ပြုလုပ်ခဲ့ရာ အနည်းဆုံး ဗုံး ၁၅ လုံး ကျဲချခဲ့ပြီး လူ ၂ ဦး သေဆုံးကာ ၆ ဦး ဒဏ်ရာရရှိကာ ယင်း၌ ၄ ဦး ပြင်းထန်စွာ ဒဏ်ရာရရှိကာ ဆေးရုံတင်ထားရပြီး ဈေးဆိုင်များနှင့် လူနေအဆောက်အအုံ အများအပြားလည်း ပျက်စီးခဲ့ကြောင်း၊ သိန္နီခရိုင်၊ သံလွင်လျင်ဒေသ နန်ဘန်းမြို့နယ်အား လေကြောင်းမှ ဗုံးကျဲတိုက်ခိုက်ခဲ့ရာ ဗုံးအသေး ၁၀ လုံးထက်မနည်း ကျဲချခဲ့ပြီး အရပ်သားတစ်ဦး၏ ဝဲဘက်ခြေထောက် ကျိုးကျကာ အိမ်များ၊ လမ်းများ ပျက်စီးခဲ့ကြောင်း၊ လားရှိုးမြို့ကို ဗုံးကျဲ တိုက်ခိုက်ခဲ့ရာ ရပ်ကွက် ၁၁ဂေါက်ကွင်း နှင့် ရပ်ကွက် ၈ မန်ဆူဟိုတယ်ကို ဗုံး ၃ လုံး ကျဲချခဲ့ပြီး အရပ်သား ၁ ဦး ပြင်းထန်စွာ ဒဏ်ရာရရှိခဲ့ကြောင်း၊ လားရှိုး ရပ်ကွက် ၁၂ မန်နားရွာသစ်ကို ဗုံးကျဲ တိုက်ခိုက်ခဲ့ရာ လူ ၆ ဦး ဒဏ်ရာရခဲ့ပြီး ယင်း၌ ၃ ဦး ဒဏ်ရာပြင်းထန်စွာ ရရှိခဲ့ကြောင်း သိရသည်။
