ရခိုင်ပြည်နယ်သို့ လက်နက်ခဲယမ်းနှင့် ရိက္ခာများ ပို့ဆောင်ရန် စစ်တပ်က ပုဂ္ဂလိက သင်္ဘောတချို့ကို ဖမ်းဆီး ချောဆွဲပြီး ရိက္ခာ ဆေးဝါးနှင့် လက်နက်ခဲယမ်းများ အဆက်မပြတ် ဖြည့်တင်းနေ

ရခိုင်ပြည်နယ်သို့ လက်နက်ခဲယမ်းနှင့် ရိက္ခာများ ပို့ဆောင်ရန် စစ်တပ်က ပုဂ္ဂလိက သင်္ဘောတချို့ကို ဖမ်းဆီး ချောဆွဲပြီး ရိက္ခာ ဆေးဝါးနှင့် လက်နက်ခဲယမ်းများ အဆက်မပြတ် ဖြည့်တင်းနေ

ရန်ကုန်၊ ဇန်နဝါရီ ၁၈

ရခိုင်ပြည်နယ်သို့ လက်နက်ခဲယမ်းများနှင့်ရိက္ခာများ ပို့ဆောင်ရန် ပုဂ္ဂလိက ကုန်တင်သင်္ဘောတချို့ကို ဖမ်းဆီး ချောဆွဲနေကြောင်း ချောဆွဲခံရသည့် သင်္ဘောပိုင်ရှင်တချို့နှင့် နီးစပ်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။

ရန်ကုန်မှ စစ်တွေမြို့သို့ လက်နက်ခဲယမ်းနှင့် ရိက္ခာများပို့ဆောင်ရန် စူပါ အုပ်စုပိုင် သင်္ဘော ၁ စီး ကို စစ်တပ်က ချောဆွဲခဲ့ပြီး ရေယာဉ်မောင်းနှင်သူကိုသာ ခေါ်ဆောင်ကာ အခြားသင်္ဘောသားများကို သင်္ဘောပေါ်မှ ဆင်းခိုင်းကြောင်း၊ ယင်းနောက် စစ်တပ်က သင်္ဘောနှင့် မောင်းနှင်သူကို စစ်တပ်က သယ်ယူမည့် ကုန်များတင်မည့် နေရာဆိပ်ကမ်းသို့ ခေါ်ဆောင်သွားကြောင်း သိရှိရသည်။

စစ်တပ်၏ ချောဆွဲမှုခံရသော ကုန်တင် သင်္ဘာကို လုပ်ငန်းရှင်က ငွေကြေးဖြင့် လိုက်လံ ရွေးထုတ်သော်လည်း ပြန်လည်ပေးအပ်ခြင်းမရှိဘဲ သယ်ယူပို့ဆောင်ရေး လုပ်ဆောင်ပြီးမှသာ ပြန်လည် လွှတ်ပေးမည်ဟု ပြောဆိုကြောင်း သိရှိရသည်။

အကြမ်းဖက် စစ်တပ်က ရခိုင်ပြည်နယ်ကို ပြန်လည်ထိုးစစ်ဆင်ရန်အတွက် ရေလမ်းကြောင်းဖြင့် လူအင်အားနှင့် လက်နက်ခဲယမ်းများကို စစ်တပ်သုံး ရေယာဉ်များဖြင့် ပို့ဆောင်သော်လည်း ရခိုင်တပ်တော် AA ၏ ကြားဖြတ် တိုက်ခိုက်မည်ကို စိုးရိမ်၍ ပုဂ္ဂလိကပိုင် သင်္ဘောများကို အသုံးပြု၍ လက်နက်ခဲယမ်းများ ပို့ဆောင်ရန် ချောဆွဲမှုများ လုပ်ဆောင်လာခြင်းဖြစ်ကြောင်း သိရသည်။

“Super အုပ်စုပိုင် သင်္ဘော ၁ စီးက စစ်တွေမြို့ကို စားသောက်ကုန်နဲ့ လူသုံးကုန် ပစ္စည်းတွေကို ကွန်တိန်နာ အလုံး ၁၀၀ နဲ့ လာပို့ပြီး ရန်ကုန်ကို အပြန်မှာ စစ် တပ်က ထပ်ဖမ်းဆီးပါတယ်။ ပြီးတော့ သင်္ဘောပေါ်က သင်္ဘောမောင်းတွေကို ပြန်မလွှတ်ဘဲနဲ့ တခြား ဝန်ထမ်းတွေကို ပြန်လွှတ်ပေးပြီး သင်္ဘောနဲ့မောင်းသူတွေကို ဖမ်းဆီးသွားတယ်။ စစ်လက်နက် ပစ္စည်းတွေကို အဲ့သင်္ဘောနဲ့ ရခိုင်ပို့ဖို့ ချောဆွဲသွားတယ်။ စစ်သင်္ဘော အသုံးမပြုဘဲ ပုဂ္ဂလိကပိုင် သင်္ဘောနဲ့ ပစ္စည်းပို့မှာ သူဌေးတွေက သင်္ဘောကိုရွေးတယ်။ ပြန်မပေးပါဘူး” ဟု ချောဆွဲခံရသည့် သင်္ဘောပိုင်ရှင်နှင့်နီးစပ်သော သတင်းရင်းမြစ်က ပြောဆိုသည်။

ဇန်နဝါရီလ ၁၄ ရက်နေ့ ရခိုင်ပြည်နယ် စစ်တွေမြို့သို့ ဆန်နှင့်အခြေခံစားသောက် ကုန်ပစ္စည်းများ ရန်ကုန်မှ သယ်ဆောင်လာသော အမ်ဗွီတော်ဝင်သီရိသင်္ဘောနှင့် အမ်ဗွီအောင်ရတနာဝင်းသင်္ဘော ဆိုက်ရောက်ခဲ့ပြီး ရခိုင်ပြည်နယ်ဝန်ကြီးချုပ် ထိန်လင်းနှင့် စစ်အရာရှိများက သွားရောက် ကြည့်ရှုစစ်ဆေးခဲ့ကြောင်း သိရှိရသည်။

ရန်ကုန်မှ ထွက်ခွာခဲ့သော အမ်ဗွီတော်ဝင်သီရိသင်္ဘောတွင် ဆန်နှင့်စားသုံးကုန်ပစ္စည်းများ စုစုပေါင်း ၄၀၀ တန် တင်ဆောင်၍ လည်းကောင်း၊ အမ်ဗွီအောင်ရတနာဝင်းသင်္ဘောတွင် ဆန်နှင့်အခြေခံစားသောက်ကုန်များ စုစုပေါင်း ၆၀၀ တန် တင်ဆောင်၍ လည်းကောင်း စစ်တွေမြို့သို့ သွားရောက် ဆိုက်ကပ် ခဲ့ကြောင်း သိရှိရသည်။

“အခုက တပ်က ရိက္ခာ၊ လက်နက်ခဲယမ်းတွေကို သင်္ဘောတွေနဲ့ စစ်တွေကို တောက်လျှောက်ပို့နေတယ်။ ကျနော်တို့သိသ လောက်တင်ကို သင်္ဘောခရီးစဉ် ၄ ခုလောက် စစ်တွေကို သွားနေတယ်” ဟု ပြည်တွင်းကုန်တင်သင်္ဘောလုပ်ငန်းအသိုင်းအ၀ိုင်းက ပြောဆိုသည်။