ကြို့ပင်ကောက်၊ သင်္ခရိုင်ရွာကို စစ်တပ်က ယနေ့ နံနက်ပိုင်း စီးနင်း ပေါ်တာဆွဲ ဖမ်းဆီးနေ၊ လူငယ်များထွက်ပြေးသွား၍ ရွာလုံးကျွတ် ပြည်သူများကို ဖမ်းဆီးထားကာ ရွာနှင့်လူများကို သတ်ဖြတ် မီးရှို့ မည်ဟု ခြိမ်းခြောက်
ရန်ကုန်၊ ဇန်နဝါရီ ၁၉
ပဲခူးတိုင်း၊ ကြို့ပင်ကောက်မြို့နယ်၊ သင်္ခရိုင်ရွာကို အကြမ်းဖက် စစ်တပ်က ယနေ့ နံနက်ပိုင်း ဝင်ရောက် ပေါ်တာဆွဲ ဖမ်းဆီးစဉ် လူငယ်များထွက်ပြေးသွား၍ ရွာလုံးကျွတ် ဖမ်းဆီးထားပြီး နေအိမ်များကို မီးရှို့၍ ပြည်သူမျာကို သတ်ဖြတ်မည်ဟု ခြိမ်းခြောက်နေကြောင်း ဒေသသတွင်း တော်လှန်ရေး သတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဇန်နဝါရီလ ၁၉ ရက်နေ့ နံနက် ၁၀ နာရီခန့်တွင် ကြို့ပင်ကောက်မြို့နယ်၊ သင်္ခရိုင်ရွာကို အကြမ်းဖက် စစ်တပ်က ဝင်ရောက် ပေါ်တာဆွဲ ဖမ်းဆီးစဉ် လူငယ်များ ထွက်ပြေးသွား၍ ရွာလုံးကျွတ် ဖမ်းဆီးထားပြီး နေအိမ်များကို မီးရှို့၍ ပြည်သူမျာကို သတ်ဖြတ်မည်ဟု ခြိမ်းခြောက် ပြောဆိုကြောင်း သိရသည်။
လက်ရှိချိန်တွင် သင်္ခရိုင်ရွာထဲ၌ ကလေးငယ်များ၊ သက်ကြီးရွယ်အိုများနှင့် အမျိုးသမီး အများစုကျန်ရှိခဲ့ပြီး အကြမ်းဖက် စစ်ကောင်စီ တပ်သား ၃၀ ခန့်က ရွာထဲ၌ ရှိနေကြောင်း၊ ထို့ပြင် အကြမ်းဖက် စစ်ကောင်စီ တပ်သားများက သင်္ခရိုင်ရွာကို PDF တပ်ဖွဲ့များ လာရောက် တိုက်ခိုက်ရန် ဖုန်းဆက် ပြောဆိုပြီး တိုက်ခိုက်ခြင်းမရှိပါကာ ၎င်းတို့ ဖမ်းဆီးထားသော ပြည်သူများကို သတ်ဖြတ်၍ နေအိမ်များကို မီးရှို့ဖျက်ဆီးမည်ဟု ခြိမ်းခြောက်ပြောဆိုခဲ့ကြောင်း ဒေသသတွင်း တော်လှန်ရေး သတင်းရင်းမြစ်က ပြောဆိုသည်။
“ကြို့ပင်ကောက်၊ သင်္ခရိုင်ရွာကို စစ်ခွေး ဒီနေ့ နံနက် ၁၀ နာရီလောက်က ရွာထဲဝင်ရောက်ပေါ်တာဆွဲတာ သူတို့လာဆွဲတော့ ရွာထဲက လူငယ်တွေ အကုန်လုံးထွက်ပြေးလို့ဆိုပြီး ကျန်ခဲ့တဲ့ သက်ကြီးရွယ်အိုတွေ ကလေးတွေ နဲ့ မိန်းကလေးတွေ တစ်ရွာလုံးကို ဖမ်းဆီးထားတာ တော်လှန်ရေးအဖွဲ့တွေကိုလည်း လာတိုက်ရင်တိုက် မတိုက်ရင် ရွာကို မီးရှို့မယ်လို့ စစ်ခွေးတွေက ဖုန်းဆက်ပြီး ခြိမ်းခြာက်ပြောဆိုတယ်” ဟု ဒေသတွင်း တော်လှန်ရေး သတင်းရင်းမြစ်က ပြောဆိုသည်။
အကြမ်းဖက်စစ်ကောင်စီက မြို့ပေါ်တွင်ပေါ်တာဆွဲ ဖမ်းဆီးရုံတင်မကတော့ဘဲ စစ်ကြောင်းထိုး၍ ကျေးရွာများကို စီးနင်းကာ လူငယ်များကို လိုက်လံ ဖမ်းဆီးမှုများ လုပ်ဆောင်လျက်ရှိကြောင်း ပဲခူးတိုင်းအတွင်းရှိ ကင်းထောက်သတင်းရင်းမြစ်များက ပြောဆိုကြသည်။
