ငပုတောတွင် စက်လှေ ၁ စီးကို ဖမ်းဆီး နှိပ်စက်နေသည့် စစ်ကောင်စီ တပ်သားများကို ပြည်သူများက ပြန်လည် ခုခံ တိုက်ခိုက်ခဲ့ရာ ရဲ ၁ ဦးသေဆုံးပြီး ပစ္စတို သေနတ် ၁ လက် ယူဆောင်ကာ ထွက်ပြေးလွတ်မြောက်
ရန်ကုန် ၊ ဧပြီ ၄
ဧရာဝတီတိုင်း၊ ငပုတောမြို့နယ်၊ ငရုတ်ကောင်းနယ်မြေ၊ ဂေါ်ရင်ဂျီကျွန်းတွင် စက်လှေ ၁ စီးကို ဖမ်းဆီး နှိပ်စက်နေသည့် အကြမ်းဖက် စစ်ကောင်စီ တပ်သားများကို ပြည်သူများက ပြန်လည် ခုခံ တိုက်ခိုက်ခဲ့ရာ ရဲ ၁ ဦးသေဆုံးပြီး ပစ္စတို သေနတ် ၁ လက် ယူဆောင်ကာ ထွက်ပြေးလွတ်မြောက်သွားကြောင်း ဒေသနေပြည်သူများက ရန်ကုန်ခေတ် သစ်သတင်းဌာနထံသို့ ပြောကြားသည်။
ယမန်နေ့ ဧပြီလ ၃ ရက်နေ့ ညနေ ၅ နာရီ ၃၀ မိနစ်ခန့်တွင် ငပုတောမြို့နယ်၊ ငရုတ်ကောင်းနယ် ၊ နတ်မှော်ကျေး ရွာအုပ်စု ပင်လယ်ပြင်အနီး၌ ရခိုင်တိုင်းရင်းသား စက်လှေ ၁ စီးရောက်ရှိနေကြောင်း သတင်းအရ ငရုပ်ကောင်းမြို့ ၊ အုန်းကျွန်းကြီး အမြောက်တပ်မှ ဗိုလ်မှူး သန့်ဇင်လင်း ၊ ငရုပ်ကောင်းနယ်မြေ ရဲ စခန်းမှ ရဲတပ်သား မိုးထက်ဝဠာကျော် နှင့် နတ်မှော်အုပ်စု စာရေးတို့ ၃ ဦးသည် သွားရောက်ဖမ်းဆီးခဲ့ကြောင်း သိရသည်။
ထိုသို့ ဖမ်းဆီးပြီးနောက် ဖမ်းဆီးရရှိသည့် စက်လှေကို ရှေ့မှမောင်းခိုင်းပြီး ဒေသခံ စက်လှေကို နောက် မှ ကြိုးဖြင့်ဆွဲကာ ငရုတ်ကောင်းနယ်မြေရဲစခန်းသို့ ခေါ်ဆောင်လာစဉ် လမ်းတလျှောက် စစ်ကောင်စီ တပ်သားများက ရိုက်နှက်နှိပ် စက်မှုများ ပြုလုပ်ခဲ့ကြောင်း သိရသည်။
ထိုသို့ ရိုက်နှက် နှိပ်စက်ခြင်းကြောင့် ဂေါ်ရန်ဂျီကျွန်းအနီးရှိ နံသပုကျေးရွာအနီးအရောက်တွင် ရိုက်နှက်ခံရသော ပြည်သူများက ပြန်လည် ခုခံတိုက်ခိုက်ခဲ့ရာ ရဲတပ်သား မိုးထက်ဝဠာကျော် သေဆုံးပြီး ဗိုလ်မှူးနှင့် စာရေးတို့ အပြင်းအထန် ဒဏ်ရာရရှိခဲ့ကြောင်း၊ ထို့ပြင် ဗိုလ်မှူး ကိုင်ဆောင်သော ပစ္စတိုသေနတ် ၁ လက်ကိုလည်း ပြည်သူများက ယူဆောင်သွားပြီး ထွက်ပြေး လွတ်မြောက်သွား ကြောင်း သိရသည်။
“ရခိုင်ဘက်ကလာတဲ့ စက်လှေကို ဖမ်းလာတာ ပျက်နေတဲ့ ဒေသခံစက်လှေကို နောက်ကနေကြိုးနဲ့ ဆွဲလာတယ်။ သူတို့နှိပ်စက်နေတာ မခံနိုင်တော့ သံတုတ်နဲ့ပြန်ရိုက်ပြီး ထွက်ပြေးသွားတာ စခဗိုလ်ရဲ့ ပစ္စတိုသေနတ်ပါ ယူသွားတယ်လို့ သိရတယ်။ နောက်ကပါလာတဲ့ စက်လှေကိုတော့ ကြိုးကို ဓားနဲ့ ဖြတ် ထားခဲ့တယ်” ဟု ဒေသနေပြည်သူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြား သည်။
ရဲတပ်သား မိုးထက်ဝဠာကျော်သည် ယနေ့ ဧပြီလ ၄ ရက် နံနက် ၆ နာရီခန့်တွင် သေဆုံးခဲ့ခြင်းဖြစ်ပြီး ရပ်ကျေးစာရေးသည်လည်း ဓားထိုးခံရသော ဒဏ်ရာဖြင့် ဆေးကုသနေရကြောင်း၊ ဗိုလ်မှူး သန့်ဇင်လင်းသည်လည်း ပုသိမ်ဆေးရုံသို့ ပို့ဆောင် ကုသနေရပြီး သတိပြန်လည်လာ၍ မင်္ဂလာဒုံ စစ်ဆေးရုံသို့ လွှဲပြောင်းလိုက်ကြောင်း သိရသည်။
“သေသွားတဲ့ ရဲတပ်သား မိုးထက်ကို ငရုတ်ကောင်း ကမ်းခြေဒေသကလူတွေအားလုံးက ရွံ့ရှာနေ တာကြာပြီ။ ပြည်သူကို တအားရိုက်လို့၊ ရပ်ကျေးစာရေးကတော့ ဓားထိုးခံရတယ်၊ မသေဘူးဗျ။ ဗိုလ်မှူးကတော့ သတိပြန်လည်လာလို့ ပုသိမ်ကနေ မင်္ဂလာဒုံစစ်ဆေးရုံကို လွှဲလိုက်တယ်၊ သူလည်း ပြည်သူတွေအပေါ် တော်တော်ဆိုးပါတယ်” ဟု ဒေသနေပြည်သူတစ်ဦးက ရှင်းပြသည်။
ဓာတ်ပုံ – ငပုတောမြို့နယ်တွင် ပြည်သူများ ပြန်လည် ခုခံ တိုက်ခိုက်မှုကြောင့် သေဆုံးခဲ့သော ရဲတပ်သား မိုးထက်ဝဠာကျော်
