မင်းအောင်လှိုင်ကို ထိပ်သီးအစည်းအဝေးသို့ ဖိတ်ခဲ့သည့် ထိုင်းနှင့် BIMSTEC အဖွဲ့ဝင်နိုင်ငံများအားလုံး စစ်အုပ်စု၏ ရာဇဝတ်မှုများတွင် ကြံရာပါပတ်သက်ဟု Justice For Myanmar ထုတ်ပြန်
ရန်ကုန်၊ ဧပြီ ၄
မြန်မာစစ်ခေါင်းဆောင် မင်းအောင်လှိုင်ကို ဘင်းမ်စတက် အစည်းအဝေးသို့ တက်ရောက်ခွင့်ပြုခဲ့သည့် ထိုင်းနိုင်ငံနှင့် ဘင်းမ်စတက် အဖွဲ့ဝင်နိုင်ငံများ၏ ဆုံးဖြတ်ချက်အပေါ် ကန့်ကွက်ရှုတ်ချကြောင်း လူ့အခွင့်အရေးအဖွဲ့တခုဖြစ်သည့် Justice For Myanmar (JFM)က ယနေ့ထုတ်ပြန်လိုက်သည်။
ထို့အပြင် ထိုင်း၊ အိန္ဒိယ၊ သီရိလင်္ကာနိုင်ငံများနှင့်အတူ ဘင်းမ်စတက် အဖွဲ့ဝင်နိုင်ငံများသည် မြန်မာစစ်တပ်သို့ လက်နက်၊ ဆက်စပ်ပစ္စည်းနဲ့ ငွေကြေးထောက်ပံ့နေမှုများဖြင့် စစ်တပ်၏ နိုင်ငံတကာရာဇဝတ်မှုများတွင် ပါဝင်ပတ်သက်နေကြကြောင်း JFMက ထုတ်ပြန်ပြောဆိုခဲ့သည်။
မြန်မာနိုင်ငံတွင်း အင်အားပြင်းငလျင် လှုပ်ခတ်မှုကြောင့် ပြိုကျပျက်စီးသွားရသော အဆောက်အဦးပျက်များအောက်တွင် ရုပ်အလောင်းများစွာ ကျန်ရှိနေသေးပြီး၊ တိုင်းပြည်အကြီးအကျယ် ပျက်စီးနေချိန်တွင် စစ်ခေါင်းဆောင် မင်းအောင်လှိုင်က ဘင်းမ်စတက် ထိပ်သီးအစည်းအဝေးသို့ သွားရောက်ခဲ့ခြင်းလည်း ဖြစ်သည်။
စစ်အုပ်စုသည် ငလျင်ဒဏ်သင့်ပြည်သူများအား လူသားစာနာမှုအကူအညီများနှင့် ကယ်ဆယ်ရေး လုပ်ငန်းများကို ပိတ်ပင်တားမြစ်ခဲ့သည့်အပြင် ငလျင်ဘေးသင့်ဒေသများအပါအဝင် နေရာအများအပြားကိုလည်း လေကြောင်းတိုက်ခိုက်မှုများ ဆက်လက်လုပ်ဆောင်ခဲ့သည်ဟု Justice For Myanmar အဖွဲ့က ဆိုသည်။
BIMSTEC သည် ၂၀၂၂ ခုနှစ်တွင် မြန်မာစစ်အုပ်စုအား ရာဇဝတ်မှုဆိုင်ရာ အပြန်အလှန်ဥပဒေ အကူအညီပေးရေး BIMSTEC သဘောတူညီချက်တွင် လက်မှတ်ရေးထိုးခွင့် ပြုခဲ့သည်။ ယင်းသဘောတူညီချက်သည် လူပုဂ္ဂိုလ်များအား တည်နေရာရှာဖွေခြင်းနှင့် မည်သူမည်ဝါသတ်မှတ်ခြင်း၊ သတင်းအချက်အလက်မျှဝေခြင်း၊ ရှာဖွေဖမ်းဆီးခြင်း၊ အဖမ်းခံထားရသူများအား သက်သေခံချက်ရရှိစေရေး သို့မဟုတ် စုံစမ်းစစ်ဆေးမှုများတွင် အကူအညီ ရရှိစေရေးတို့အတွက် ဒေသတွင်းပူးပေါင်းဆောင်ရွက်မှုကို လွယ်ကူစေသည်ဟု JFM ကဆိုသည်။
ယင်းသည် စစ်အုပ်စုအား ထောက်လှမ်းရေး သတင်းအချက်အလက်များ၊ စစ်ဘက် ရဲဘက်ဆိုင်ရာ ပူးပေါင်းဆောင်ရွက်မှုများ ရရှိစေရန် အလွန်အမင်း အထောက်အကူဖြစ်စေခဲ့ပြီး တစ်ပြိုင်တည်းတွင် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့်ရာဇဝတ်မှုများကို အပြစ်ပေးအရေးယူခံရခြင်း အလျဉ်းမရှိ ဆက်လက်ကျူးလွန်နေမှုများအပေါ် မှားယွင်းသော နိုင်ငံရေးတရားဝင်မှု ပေးအပ်ကာ ဖုံးကွယ်ပေးခြင်းကိုလည်းဖြစ်စေသည်ဟု JFM ကဆိုသည်။
“ဘင်မ်းစတက် ထိပ်သီးအစည်းအဝေးမှာ မင်းအောင်လှိုင်ကို တက်ရောက်ခွင့်ပြုလိုက်တဲ့ဆုံးဖြတ်ချက်ကို ကျွန်မတို့ ပြင်းပြင်းထန်ထန် ရှုတ်ချပါတယ်၊ ရိုဟင်ဂျာတွေအပေါ် လူမျိုးတုန်းသတ်ဖြတ်မှုအပါအဝင် ရာဇဝတ်မှုကြီးတွေ ကျူးလွန်မှုတွေအတွက် တာဝန်ရှိနေတဲ့ စစ်ရာဇဝတ်ကောင်တစ်ဦးကို ဘင်းမ်စတက်နဲ့ ထိုင်းအစိုးရက လက်ခံကြိုဆိုတာဟာ ဝမ်းနည်းဖွယ်ကောင်းပါတယ်၊ ဒီလိုကြိုဆိုမှုက မြန်မာပြည်သူတွေ လေးနှစ်ကျော်ကြာ ခုခံဆန့်ကျင်နေတဲ့ စစ်အုပ်စုကို တရားဝင်မှု ပေးအပ်လိုက်တာဖြစ်ပြီး၊ သူတို့ကို ပိုမိုရဲတင်းလာစေမှာ ဖြစ်ပါတယ်” ဟု Justice For Myanmar ၏ ပြောရေးဆိုခွင့်ရှိသူ မရတနာမောင်က ပြောဆိုသည်။
ထို့အပြင် ထိုင်း အပါအဝင် BIMSTEC အဖွဲ့ဝင်နိုင်ငံများသည် မြန်မာစစ်တပ်၏ နိုင်ငံတကာရာဇဝတ်မှုများတွင် အောက်ပါလုပ်ရပ်များဖြင့် ကြံရာပါပတ်သက်နေသည်ဟု JFM. က အတိအလင်း ထုတ်ပြန်သည်။
ထိုင်းနိုင်ငံတွင် မှတ်ပုံတင်ထားသည့် ကုမ္ပဏီများသည် ၂၀၂၃ ခုနှစ်၊ ဘဏ္ဍာရေးနှစ်အတွင်း မြန်မာနိုင်ငံသို့ အမေရိကန်ဒေါ်လာ သန်း ၁၂၀ တန်ဖိုးရှိ စစ်လက်နက်နှင့် ဆက်စပ်ပစ္စည်းများကို ရောင်းချပေးပို့ခဲ့သည်ဟု မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ်က အစီရင်ခံစာထုတ်ပြန်ခဲ့သည်။
ထိုင်းနိုင်ငံ၏ အများပိုင်ရေနံကုမ္ပဏီကြီး PTT Exploration and Production Public Company Limited (PTTEP) သည် မြန်မာနိုင်ငံတွင်း အရေးပါသော ကမ်းလွန်သဘာဝဓါတ်ငွေ့စီမံကိန်းများကို လုပ်ကိုင်နေပြီး သဘာဝဓါတ်ငွေ့များ ရောင်းချမှုမှတဆင့် စစ်အုပ်စုအား နိုင်ငံခြားငွေကြေးများ ရှာဖွေပေးလျက်ရှိသည်။ ယင်းလုပ်ရပ်များက ထိုင်းအစိုးရအား စစ်အုပ်စု၏ စစ်ရာဇဝတ်မှုများနှင့် လူသားမျိုးနွယ်အပေါ်ကျူးလွန်သည့် ရာဇဝတ်မှုများတွင် တိုက်ရိုက်ကြံရာပါ ပတ်သက်စေသည်။
အိန္ဒိယသည် ရုရှား၊ တရုတ်တို့နှင့်အပြိုင် မြန်မာစစ်အုပ်စုထံ စစ်လက်နက်နှင့် စစ်ဘက်ဆိုင်ရာပစ္စည်းများအား အဓိကရောင်းချထောက်ပံ့နေသည့် နိုင်ငံတစ်ခု ဖြစ်သည်။ ရရှိထားသည့် ကုန်သွင်းကုန်ထုတ်မှတ်တမ်းများအပေါ်အခြေခံ၍ အိန္ဒိယနိုင်ငံပိုင်စစ်လက်နက်ကုမ္ပဏီများမှ မြန်မာစစ်အုပ်စုထံ စစ်လက်နက် ရောင်းချပေးပို့နေခြင်းများသည် လျော့နည်းသွားခြင်းမရှိဘဲ ဆက်လက်ပို့ဆောင်နေကြောင်းကို Justice For Myanmar က အတည်ပြုထုတ်ပြန်ခဲ့သည်။
၂၀၂၅ ခုနှစ်၊ ဇန်နဝါရီလတွင် Bharat Electronics Limited (BEL) သည် ရေကြောင်းထောက်လှမ်းရေးတွင် အသုံးပြုသည့် အီလက်ထရိုအော့ပ်တစ်ကယ် စောင့််ကြည့်ထောက်လှမ်းရေးစနစ်နှစ်ခုကို မြန်မာစစ်တပ်၏ ပစ္စည်းဝယ်ယူရေးညွှန်ကြားမှုဦးစီးဌာနထံ တင်ပို့ခဲ့ပြီး၊ ယင်းတင်ပို့မှုမတိုင်မီ ၂၀၂၄ ခုနှစ်တွင်လည်း မြန်မာစစ်တပ်ထံ ကုန်ပစ္စည်းများစွာ တင်ပို့ခဲ့သည်ဟုလည်း ဆိုသည်။
ထို့အပြင် BEL သည် ၂၀၂၄ ခုနှစ်အတွင်း အန်တီနာများ၊ တယ်လီစကုပ်တိုင်များ၊ ကေဘယ်အစည်းများ၊ ဓတ်အားထောက်ပံ့ရေးစနစ်များနှင့် အမျိုးမျိုးသော အီလက်ထရောနစ်နှင့် အီလက်ထရိုမက်ကန်းနစ် စနစ်များကို မြန်မာသို့ တင်ပို့ခဲ့သည်။
အိန္ဒိယနိုင်ငံသည် မြန်မာပြည်တွင်း လက်နက်ထုတ်လုပ်ရေးစက်ရုံများမှ စစ်ဘက်ဆိုင်ရာဝန်ထမ်းများအား ၂၀၂၄ ခုနှစ်တွင် ပရာဒက်ရှ် မြို့ရှိ Indian Army Educational Corps Training College and Centre တွင်လည်းကောင်း၊ ၂၀၂၂ ခုနှစ်တွင် ဟိုက်ဒရာဘတ်မြို့ရှိ Indian Military College of Electronics and Mechanical Engineering တွင်လည်းကောင်း လေ့ကျင့်သင်တန်းများ ပေးခဲ့ကြောင်းလည်း သိရသည်။
ထို့အပြင် Justice For Myanmar က ရရှိထားသည့် ကုန်သွင်းကုန်ထုတ်မှတ်တမ်းများအရ သီရိလင်္ကာနိုင်ငံသည်လည်း လေကြောင်းအီလက်ထရောနစ်ပြသမှုစနစ်တစ်ခု အပါအဝင် လေယာဉ်ပန်ကာနှင့် ဒလက်များ၊ အခြားလေယာဉ်အစိတ်အပိုင်းများနှင့် ရေနံဆီများကို မြန်မာသို့ ၂၀၂၄ ခုနှစ်တွင် တင်ပို့ ရောင်းချထားသည်။
လူမျိုးတုန်းသတ်ဖြတ်မှုနှင့် လူသားမျိုးနွယ်အပေါ် ရာဇဝတ်မှု ကျူးလွန်မှုများအတွက် စုံစမ်းစစ်ဆေးခြင်းခံနေရသော မြန်မာစစ်ခေါင်းဆောင်ကို ဘင်းမ်စတက် ထိပ်သီးအစည်းအဝေးသို့ တက်ရောက်စေခဲ့သော၊ တချိန်တည်းတွင်ပင် မြန်မာစစ်အုပ်စုကို နှစ်ရှည်လများ စစ်လက်နက်၊ ဆက်စပ်ပစ္စည်းနှင့် ငွေကြေးများ ထောက်ပံ့လျှက်ရှိသော ဒေသတွင်းအဖွဲ့အစည်းကြီးတခုဖြစ်တဲ့ ဘင်းမ်စတက်နှင့်အဖွဲ့ဝင်နိုင်ငံများသည် မြန်မာစစ်တပ်ကျူးလွန်သော နိုင်ငံတကာရာဇဝတ်မှုများတွင် ကြံရာပါ ပတ်သက်နေပြီဆိုသည်ကို ပို၍ထင်သာမြင်သာ ရှိလာစေခဲ့သည်ဟု Justice For Myanmar က ထုတ်ပြန်ခဲ့တယ်။
