မြိုင်နှင့် ရေစကြို အစပ်ရှိ လင်းကတောစခန်းမှ စစ်ကောင်စီ တပ်သားများက ပြည်သူပိုင် နွားများကို လိုက်လံ ဖမ်းဆီးပြီး နွား ၁ ကောင်ကို ဆန် ၁၀ အိတ်ဖြင့် ပြန်ရွေးခိုင်း
မကွေးတိုင်း၊ မြိုင်မြို့နယ်နှင့် ရေစကြိုမြို့နယ် အစပ်ရှိ လင်းကတောစခန်းမှ အကြမ်းဖက် စစ်ကောင်စီ တပ်သားများက ပြည်သူပိုင် နွားများကို လိုက်လံ ဖမ်းဆီးပြီး နွား ၁ ကောင်ကို ဆန် ၁၀ အိတ်ဖြင့် ပြန်ရွေးခိုင်းနေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဧပြီလပိုင်းမှ စတင်ကာ မြိုင်မြို့နယ်နှင့် ရေစကြိုမြို့နယ် အစပ်ရှိ လင်းကတောစခန်းမှ အကြမ်းဖက် စစ်ကောင်စီ တပ်သားများသည် အနီးအနားရှိ ကျေးရွာများမှ ပြည်သူပိုင် နွားများကို လိုက်လံ ဖမ်းဆီးပြီး ၎င်းတို့ စခန်းအတွင်း ချုပ်နှောင်ထားမှုများ လုပ်ဆောင်ခဲ့ကြောင်း သိရသည်။
ထိုသို့ လုပ်ဆောင်ပြီးနောက် ကျေးရွာနေပြည်သူများကို နွား ၁ ကောင်လျှင် ဆန် ၁၀ အိတ်ဖြင့် လာရောက် ရွေးခိုင်းနေခြင်းဖြစ်ပြီး အကြမ်းဖက် စစ်တပ် စစ်ကြောင်း ၂ ကြောင်းလည်း ရိက္ခာရှာရန် စစ်ကြောင်းထိုးခြင်းများ လုပ်ဆောင်နေကြောင်း သိရှိရသည်။
လက်ရှိချိန်တွင် မြိုင်မြို့နယ်နှင့် ရေစကြိုမြို့နယ် အစပ်ရှိ ကျေးရွာတချို့မှ ပြည်သူများသည် စစ်ဘေးတိမ်းရှောင်နေရပြီး ၎င်းတို့ ပိုင်ဆိုင်နွားများကို ပြန်လည် ရွေးယူနိုင်ရန် ခက်ခဲနေကြောင်း သိရသည်။
” စစ်တပ်က မြိုင်နဲ့ရေစကြို အဆက်က လင်းကတောစခန်းကိုလည်း စစ်ကြောင်းထိုးပြီး ရိက္ခာပို့တာတွေလုပ်နေပါတယ်။ ပြည်သူတွေရဲ့ နွားတွေကိုလည်း ဖမ်းဆီးပြီး ဆန်အိတ်နဲ့ ပြန်လဲဖို့ ပြောနေပါတယ်။ နွား ၂ ကောင်ဆိုရင် ဆန်အိတ် ၂၀ နဲ့ လာလည်း ဖို့ပြောတာတွေရှိပါတယ်။ စစ်တပ်က ပုံမှန်လိုမဟုတ်ဘဲ စစ်ကြောင်း ၂ ကြောင်းထွက်ပြီး ညရိက္ခာရှာပြီး လင်းကတောစခန်းကိုပြန်ပို့နေတာပါ” ဟု ဒေသပြည်သူ တစ်ဦးက ပြောဆိုသည်။
