ရန်ကုန်၊ စက်တင်ဘာ ၁၃
ရခိုင်ပြည်၊ ကျောက်တော်မြို့နယ်တွင် စာသင်ကျောင်း ၂ ခုကို စစ်တပ်က လေယာဉ်ဖြင့် ဗုံးကျဲမှုကြောင့် ကျောင်းသားကျောင်းသူ ၁၉ ဦးသေဆုံးမှုနှင့် လေကြောင်းတိုက်ခိုက်မှုကြောင့် ရခိုင်ပြည်သူများ သေဆုံးမှုများအတွက် စစ်တပ်ကို ပြင်းထန်စွာ လက်တုံ့ပြန်သွားမည်ဖြစ်ကြောင်း အာရက္ခတပ်တော် AA က ထုတ်ပြန်ကြေညာသည်။
စစ်တပ်က စစ်ရှုံးမှုနှင့် နယ်မြေဆုံးရှုံးမှုများကို သူရဲဘောကြောင်ပြီး ဂုဏ်သိက္ခာမဲ့စွာ လက်တုံ့ပြန်သောအနေဖြင့် စစ်ဘက်ပစ်မှတ်များထက် အရပ်ဘက်ပစ်မှတ်များကိုသာ အငြိုးကြီးစွားဖြင့် လူမျိုးရေးအမုန်းတရားကို အခြေခံလျက် လေကြောင်းမှ ဗုံးကျဲမှုများ တောက်လျှောက်ပြုလုပ်လာကြောင်း၊ စက်တင်ဘာလ ၁၂ ရက်နေ့ ညသန်းခေါင်ယံအချိန် ၁ နာရီ ၅ မိနစ်အချိန် ကျောက်တော်မြို့၊ သရက်တပင်ကျေးရွာရှီ ပညာပန်းခင်းနှင့် အမြင်သစ် စာသင်ကျောင်းတို့ကို တိုက်လေယာဉ်ဖြင့် ပေါင် ၅၀၀ ဗုံး ၂ လုံးကျဲချတိုက်ခိုက်ခဲ့ကြောင်း၊ ယင်းဗုံး ၂ လုံးမှာ ပညာပန်းခင်း ကိုယ်ပိုင် အထက်တန်းစာသင်ကျောင်းရှေ့တည့်တည့်တွင် ကျရောက်ပေါက်ကွဲပြီး ကျောင်းသားကျောင်းသူ ၁၉ ဦး ရှေ့ဆင့်နောက်ဆင့် သေဆုံးသွားခဲ့ကြောင်း၊ ဒဏ်ရာရရှိသူ ၂၂ ဦးရှိကြောင်း သိရှိရသည်။
စစ်တပ်က ၂၀၂၅ ခုနှစ်အတွင်း လေကြောင်းတိုက်ခိုက်မှုများ ဆက်တိုက်ပြုလုပ်ခဲ့ရာ ဇန်နဝါရီလ ၈ ရက်နေ့ ရမ်းဗြဲမြို့နယ်၊ ကျောက်နီမော်ကျေးရွာကို လေယာဉ်ဖြင့် ဗုံးကျဲမှုကြောင့် ပြည်သူ ၂၆ ဦးသေဆုံးခဲ့ကြောင်း၊ ဇန်နဝါရီ ၁၈ ရက်နေ့ မြောက်ဦးမြို့နယ်၊ ရမ်းချောင်းရွာအနီးတ၀ိုက်ကို လေယာဉ်ဖြင့် ဗုံးကျဲချခဲ့ရာ ကလေးနှင့်အမျိုးသမီး စုစုပေါင်း ၂၈ ဦးသေဆုံးခဲ့ကြောင်း၊ မေလ ၁၃ ရက်နေ့ ရသေ့တောင်မြို့နယ်၊ ထွန်းရဝေရွာဟောင်းကို စစ်တပ်က လေယာဉ်ဖြင့် ဗုံးကျဲသဖြင့် ပြည်သူ ၁၂ ဦးသေဆုံးခဲ့ရကြောင်း၊ မေလ ၁၄ ရက်နေ့နှင့် ၁၅ ရက်နေ့ ကျောက်တော်မြို့၊ ရွာမရပ်ကွက်ကို လေယာဉ်ဖြင့် ဗုံးကျဲသဖြင့် ပြည်သူ ၈ ဦးသေဆုံးခဲ့ကြောင်း၊ ဩဂုတ်လ ၂၅ ရက်နေ့ မြောက်ဦးမြို့၊ ဒိုင်းကျီရပ်ကွက်ကို လေယာဉ်ဖြင့် ဗုံးကျဲသဖြင့် ပြည်သူ ၁၅ ဦးသေဆုံးခဲ့ရကြောင်း သိရှိရသည်။
နိုင်ငံတကာအဖွဲ့အစည်းများနေဖြင့် စစ်တပ်၏ ယခုကဲ့သို့ နေ့စဉ် ရက်ဆက် စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်မှုများကို လက်ပိုက်ကြည့်မနေဘဲ ထိရောက်အားပါသော အရေးယူမှုများ လုပ်ဆောင်ရန် အထူးလိုအပ်ရှိကြောင်း၊ AA အနေဖြင့် စစ်တပ်၏ ယခုကဲ့သို့ လူမဆန်သည့် ယုတ်မာပက်စက်သော လုပ်ရပ်များ၊ စစ်ရာဇဝတ်မှုကျူးလွန်သော အချက်အလက်များကို သက်ဆိုင်ရာ နိုင်ငံတကာအဖွဲ့အစည်းများထံသို့ ပေးပို့သွားမည်ဖြစ်ကြောင်း သိရှိရသည်။
ထို့ပြင် AA အနေဖြင့် တရားမျှတမှုကို ချစ်ခင်မြတ်နိုးသော လူပုဂ္ဂိုလ်၊ အဖွဲကအစည်းများနှင့် ပူးပေါင်းကာ တရားမျှတမှု ရရှိသည်အထိ ဆောင်ရွက်သွားမည်ဖြစ်သကဲ့သို့ ပြစ်မှုကျူးလွန်သူ၊ ကျူးလွန်ရန် စေခိုင်းသူများနှင့်ပါဝင်ပတ်သက်သူများကို ပြင်းထန်စွာ လက်တုံ့ပြန်သွားမည်ဖြစ်ကြောင်း AA က ကြေညာသည်။
