ကရင်ပြည်နယ်၊ ထိုင်း-မြန်မာနယ်စပ်၊ မြဝတီမြို့နယ်အတွင်းရှိ ကျားဖြန့် အွန်လိုင်း ငွေလိမ်စင်တာများတွင် စတားလင့်အင်တာနက်များကို ပိုမိုတိုးချဲ့ အသုံးပြုလာမှုအပေါ် အမေရိကန်ကွန်ကရက်က စတင် စုံစမ်းစစ်ဆေးနေကြောင်း AFP သတင်းတစ်ရပ်အရ သိရှိရသည်။
ထိုင်းနိုင်ငံက မြဝတီမြို့နယ်ရှိ ကျားဖြန့်အွန်လိုင်းငွေလိမ်စင်တာများထံသို့ လျှပ်စစ်ဓာတ်အားနှင့်အင်တာနက်လိုင်းများ ဖြတ်တောက်ပြီးနောက် စတားလင့်အင်တာနက်များကို အဓိက သုံးစွဲလာကြောင်း၊ ကျားဖြန့် အွန်လိုင်း ငွေလိမ်စင်တာအဆောက်အအုံ များပေါ်တွင် စတားလင့်အင်တာနက်ဗန်းများ အများအပြား တင်ထားသည်ကိုတွေ့ရကြောင်း၊ ကျားဖြန့် အွန်လိုင်းငွေလိမ်စင်တာဖြစ်သော KK Park ၏ အဆောက်အအုံတစ်ခုပေါ်တွင် စတားလင့် အင်တာနက်ဗန်း ၈၀ နီးပါးမြင်တွေ့ရကြောင်း သိရှိရသည်။
အမေရိကန်ပြည်ထောင်စု၊ ကယ်လီဖိုးနီးယားပြည်နယ်မှ အစိုးရရှေ့နေများက စတားလင့်အင်တာနက်စနစ်ကို အသုံးပြု၍ ငွေလိမ်လည်မှုများ ကျူးလွန်ကြောင်း စတားလင့်ကို ၂၀၂၄ ခုနှစ် ဇူလိုင်လတွင် တရားဝင် သတိပေးခဲ့သော်လည်း စတားလင့်က တစ်စုံတစ်ရာ တုံ့ပြန်ခြင်းမရှိပေ။
စိုးရိမ်ပူပန်နေကြသော ထိုင်းနှင့် အမေရိကန် နိုင်ငံရေးသမားများကလည်း စတားလင့်ဂြိုလ်တုအင်တာနက်ပိုင်ရှင် အီလွန်မတ်ကို သတိပေးနှိုးဆော်မှုများ လုပ်ဆောင်နေကြပြီး အမေရိကန် အထက်လွှတ်တော်အမတ် Maggie Hassan က အီလွန်မတ်ကို စတားလင့်အင်တာနက်ကို ကျားဖြန့် အွန်လိုင်းငွေလိမ်ဂိုဏ်းများက အသုံးပြုနေမှုကို အရေးယူဆောင်ရွက်ရန် တိုက်တွန်းသည်။
ယခုအခါ အမေရိကန်ကွန်ဂရက်လွှတ်တော်ပူးတွဲစီးပွားရေးကော်မတီက ကျားဖြန့်အွန်လိုင်းငွေလိမ်လည်စင်တာများနှင့် စတားလင့်အင်တာနက်တို့ ပတ်သက်နေမှုများကို စတင် စုံစမ်းစစ်ဆေးနေပြီဖြစ်ကြောင်း သိရှိရသည်။
အမေရိကန် ဆိုက်ဘာရာဇဝတ်မှုဆိုင်ရာ အစိုးရရှေ့နေဟောင်း Erin West က “အမေရိကန်ကုမ္ပဏီတစ်ခုက ဒီလိုတွေ ဖြစ်နေဖို့အတွက် ပါဝင်ဆောင်ရွက်ပေးနေတာဟာ ရွံရှာစရာပါပဲ” ဟု ပြောကြားခဲ့သည်။
ကျားဖြန့် ငွေလိမ်လည်ဂိုဏ်းများ၏ ပစ်မှတ်ထားများတွင် အမေရိကန်ကလည်း ပါဝင်နေပြီး ၂၀၂၄ ခုနှစ်အတွင်း အမေရိကန် ဒေါ်လာ ၁၀ ဘီလီယံခန့် ဆုံးရှုံးခဲ့ပြီး ၁၂ လအတွင်း ၆၆ ရာခိုင်နှုန်း မြင့်တက်လာခဲ့ကြောင်း အမေရိကန်အစိုးရဘဏ္ဍာရေးဌာနက ခန့်မှန်းထားသည်။
အမေရိကန်က ယခင်လများအတွင်း ကျားဖြန့် ငွေလိမ်ဂိုဏ်းများ၏ အဓိက မြို့ဖြစ်သော ရွှေက္ကိုလ်မြို့နှင့် ပတ်သက်ဆက်စပ်နေသော လူပုဂ္ဂိုလ်များနှင့် ကုမ္ပဏီ ၉ ခုကို ပိတ်ဆို့အရေးယူခဲ့သည်။ သို့ရာတွင် ရွှေက္ကိုလ်တွင် အဆောက်အအုံ တည်ဆောက်မှုများမှာ အလျှင်အမြန်တိုးတက်နေဆဲဖြစ်သည်။
ဓာတ်ပုံ- AFP ။
