မြန်မာတစ်နိုင်ငံလုံးအတိုင်းအတာဖြင့် ရွေးကောက်ပွဲကို ရာနှုန်းပြည့် ကျင်းပနိုင်တော့မည်မဟုတ်ကြောင်း အကြမ်းဖက် မင်းအောင်လှိုင်က ဝန်ခံပြောဆိုလိုက်သည်။
ယနေ့ နေပြည်တော်တွင် ပြုလုပ်သည့် ၁၀ နှစ်ပြည့် NCA နှစ်ပတ်လည် အခမ်းအနားတွင် အကြမ်းဖက် မင်းအောင်လှိုင်က ထိုသို့ ပြောဆိုခြင်းဖြစ်သည်။
လာမည့် ဒီဇင်ဘာလ ၂၈ ရက်နေ့မှစတင်၍ ရွေးကောက်ပွဲကို အပိုင်းလိုက်ကျင်းပမည်ဖြစ်ကြောင်း၊ သို့ရာတွင် ရွေးကောက်ပွဲကို ရာနှုန်းပြည့် ကျင်းပနိုင်တော့မည်မဟုတ်ကြောင်း၊ ပထမအဆင့်အနေဖြင့် မြို့နယ်ပေါင်း ၁၀၂ မြို့နယ်တွင် ရွေးကောက်ပွဲပြုလုပ်မည်ဖြစ်ပြီး ဒုတိယအဆင့်တွင် မြို့နယ်ပေါင်း ၁၀၀ ရွေးကောက်ပွဲ ပြုလုပ်မည်ဖြစ်ကြောင်း၊ တတိယအဆင့်တွင် ကျန်ရှိနေသော မြို့နယ်များတွင် ရွေးကောက်ပွဲ ပြုလုပ်မည်ဖြစ်ကြောင်း မင်းအောင်လှိုင်က ဆိုသည်။
“ရာနှုန်းပြည်တော့ မရဘူးဆိုတာ ကျနော် ကြိုတင် ဝန်ခံထားပါတယ်။ ရာနှုန်းပြည့်ကတော့ ရွေးကောက်ပွဲ ၃ ရပ်စလုံးမှာလည်း ရာနှုန်းပြည့် မလုပ်နိုင်ခဲ့ပါဘူး။ အကြောင်းအမျိုးမျိုးကြောင့် မလုပ်နိုင်တဲ့ ရွေးကောက်ပွဲကိုလည်း နောင်လာမယ့် အစိုးရနဲ့ ရွေးကောက်ပွဲကော်မရှင်က ကြားဖြတ်ရွေးကောက်ပွဲကို ဖြည့်ဆည်းပြီးတော့မှ အားလုံးပြည့်စုံအောင်လုပ်ဖို့ ကျနော်တို့ စဉ်းစားထားတယ်ဆိုတာလည်း ပြောလိုပါတယ်” ဟု မင်းအောင်လှိုင်က ပြောဆိုသည်။
လက်ရှိ ရွေးကောက်ပွဲတွင် နိုင်ငံရေးပါတီ ၅၇ ပါတီမှ ကိုယ်စားလှယ်လောင်း ၅၀၀၀ ကျော်က စာရင်းပေးသွင်းထားပြီး တစ်နိုင်ငံလုံးအတိုင်းအတာဖြင့် ၆ ပါတီက ယှဉ်ပြိုင်မည်ဖြစ်ကာ ယင်းပါတီများတွင် ကြံ့ဖွတ်ပါတီက ကိုယ်စားလှယ်အရေအတွက် ၁၀၀၀ ကျော်ဖြင့် အများဆုံးယှဉ်ပြိုင်မည်ဖြစ်သည်။
