မြန်မာစစ်တပ်က ပြုလုပ်မည့် ရွေးကောက်ပွဲမှာ ပွင့်လင်းမြင်သာမှု၊ လွတ်လပ်မှုနှင့် အားလုံးပါဝင်မှု စံချိန်စံနှုန်းများနှင့်မကိုက်ညီဟု ပြင်သစ်အစိုးရက ကြေညာ၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့်သမ္မတ ဦးဝင်းမြင့်ကို ချက်ချင်းလွှတ်ရန် တောင်းဆို

ရန်ကုန်၊ နိုဝင်ဘာ ၉

မြန်မာစစ်တပ်က ပြုလုပ်မည့် ရွေးကောက်ပွဲမှာ ပွင့်လင်းမြင်သာမှု၊ လွတ်လပ်မှုနှင့် အားလုံးပါဝင်မှု စံချိန်စံနှုန်းများနှင့်မကိုက်ညီဟု ပြင်သစ်အစိုးရက ကြေညာချက် ထုတ်ပြန်သည်။

ယမန်နေ့ ကျရောက်ခဲ့သည့်” ၂၀၂၀ ပြည့်နှစ် မြန်မာ့အထွေထွေရွေးကောက်ပွဲ၊ ပဉ္စမမြောက် နှစ်ပတ်လည်နေ့” ဆိုင်ရာ ထုတ်ပြန်ကြေညာချက်တွင် အထက်ပါအတိုင်း ပြင်သစ်အစိုးရက ပြောဆိုကြေညာလိုက်ခြင်းဖြစ်သည်။

၂၀၂၅ ခုနှစ်၊ နိုဝင်ဘာလ ၈ ရက်နေ့သည် မြန်မာနိုင်ငံတွင် ကျင်းပခဲ့သော အထွေထွေရွေးကောက်ပွဲ၏ ပဉ္စမမြောက်နှစ်ပတ်လည်နေ့ဖြစ်ပြီး၊ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့တွင် ဖြစ်ပေါ်ခဲ့သည့် စစ်အာဏာသိမ်းမှုနှင့်အတူ ထိုရွေးကောက်ပွဲ၏ ရလဒ်များ ခိုးယူခြင်းခံခဲ့ရကြောင်း၊

စစ်အစိုးရက ၎င်းတို့ထိန်းချုပ်ထားသော နယ်မြေဒေသများတွင် ၂၀၂၅ ခုနှစ်၊ ဒီဇင်ဘာလ ၂၈ ရက်နေ့တွင် စတင်ကျင်းပမည့် ရွေးကောက်ပွဲသည် ပွင့်လင်းမြင်သာမှု၊ လွတ်လပ်မှု၊ အားလုံးပါဝင်မှုနှင့် အသိအမှတ်ပြုခံရမှုဆိုင်ရာ စံနှုန်းများနှင့် မကိုက်ညီကြောင်း ပြင်သစ်အစိုးရက ကြေညာသည်။

စစ်အာဏာသိမ်းအဖွဲ့က တရားမဝင် အာဏာသိမ်းခဲ့ချိန်မှစ၍ နိုင်ငံရေးအကြောင်းပြချက်ဖြင့် ဖမ်းဆီးကာ ပြစ်ဒဏ်ချမှတ်ခဲ့သည့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတ ဦးဝင်းမြင့်တို့ အပါအဝင် နိုင်ငံရေးအကျဉ်းသားများ အားလုံးကို ပြန်လွှတ်ပေးပါရန် ပြင်သစ်နိုင်ငံက ထပ်မံ တောင်းဆိုသည်။

စစ်တပ်က အရပ်သားများ အဓိက ထိခိုက်နစ်နာရသည့် လေကြောင်းတိုက်ခိုက်မှုများအပါအဝင် ဆက်လက်ဖြစ်ပွားနေသော အကြမ်းဖက်မှုများကို ပြင်သစ်နိုင်ငံက ရှုတ်ချပြီး၊ မြန်မာပြည်သူများ ရင်ဆိုင်နေကြရသည့် ဆိုးရွားသော လူမှုဒုက္ခများနှင့် သိသာထင်ရှားသည့် ဒေသဆိုင်ရာ အကျိုးဆက်များအပေါ် အလွန်အမင်း စိုးရိမ်မကင်း ဖြစ်မိကြောင်း ပြင်သစ်အစိုးရ၏ ထုတ်ပြန်ချက်တွင် ဖော်ပြထားသည်။

ပဋိပက္ခအား ငြိမ်းချမ်းစွာနှင့် ရေရှည်တည်တံ့စွာ ဖြေရှင်းပေးနိုင်ရေးကို ရည်ရွယ်သည့် အာဆီယံ ဘုံသဘောတူညီချက် ၅ ရပ်အား ပြင်သစ်နိုင်ငံက ထောက်ခံကြောင်း၊ ယင်းသဘောတူညီချက်ပါ အချက်အလက်များ၊အထူးသဖြင့် အကြမ်းဖက်မှု လျှော့ချရေးနှင့် အားလုံးပါဝင်သည့် နိုင်ငံရေးဆွေးနွေးပွဲများ ပြုလုပ်ပေးရန် အတွက်လည်း ပြင်သစ်က ထပ်မံတောင်းဆိုသည်။

မြန်မာနိုင်ငံတွင် ရေရှည်တည်တံ့မည့် နိုင်ငံရေးပြေလည်မှုနှင့် တည်မြဲနိုင်သည့် ငြိမ်းချမ်းရေး ရရှိစေရန် ကြားဝင်ညှိနှိုင်းပေးနေကြသည့် အာဆီယံဥက္ကဋ္ဌ မလေးရှားနိုင်ငံ၏ အထူးကိုယ်စားလှယ် Othman Hashim နှင့် ကုလသမဂ္အထွေထွေအတွင်းရေးမှူးချုပ်၏ မြန်မာနိုင်ငံဆိုင်ရာ အထူးသံတမန် Julie Bishop တို့၏ ကြိုးပမ်းအားထုတ်မှုများကို ပြင်သစ်နိုင်ငံက ကြိုဆိုထားသည်။

အောက်တိုဘာလ ၁ ရက်နေ့ကလည်း ပြင်သစ်သမ္မတ မက်ခရွန်က ဒေါ်အောင်ဆန်းစုကြည်ထံသို့ စာရေးသားပေးပို့၍ ပြင်သစ်နိုင်ငံအနေဖြင့် ဒေါ်အောင်ဆန်းစုကြည်ကို မမေ့ကြောင်း ထုတ်ဖော်ပြောဆိုထားသည်။