ရန်ကုန်၊ နိုဝင်ဘာ ၁၄
ထိုင်းနိုင်ငံတွင် မည်သူမည်ဝါဖြစ်ကြောင်း သက်သေခံလက်မှတ်-CI စာအုပ်မှ နိုင်ငံကူးလက်မှတ် ပြောင်းရန် ဆောင်ရွက်ပေးနေသည့် မဟာချိုင် TDCC ရုံးကို စစ်တပ်က အကြောင်းပြချက်မရှိဘဲ ပိတ်သိမ်းလိုက်ကြောင်း သိရှိရသည်။
ထိုင်းနိုင်ငံအတွင်း မည်သူ မည်ဝါဖြစ်ကြောင်း သက်သေခံလက်မှတ် CI စာအုပ်မှ နိုင်ငံကူးလက်မှတ်ထုတ်ပေးရန် ကိုယ်ရေးအချက်အလက် ကောက်ယူရေးဆောင်ရွက်ပေးနေသည့် မဟာချိုင်မြို့ရှိ ယာယီအချက်အလက်ကောက်ယူရေးဌာနခွဲ TDCC ကို ခေတ္တပိတ်သိမ်းလိုက်ကြောင်း၊ ထိုင်းနိုင်ငံတွင်း ရောက်နေသည့် မြန်မာနိုင်ငံသားများ၏ ကိုယ်ရေးအချက်အလက်များကို ပို၍ တင်းတင်းကျပ်ကျပ် ကိုယ်တွယ်ရန် အချိန်ယူလုပ်ဆောင်နေခြင်းဖြစ်နိုင်ကြောင်း ထိုင်းရောက် မြန်မာအလုပ်သမားအရေး ကူညီပေးနေသူများက ရန်ကုန်ခေတ်သစ်သတင်းဌာနသို့ ပြောကြားသည်။
TDCC ရုံးကို နိုဝင်ဘာလ ၁၅ ရက်နေ့မှ စ၍ ခေတ္တရပ်ဆိုင်းသွားမည်ဟု ကြေညာထားပြီး ပြန်လည် ဖွင့်မည့် ရက်ကိုလည်း အတိအကျ မပြောဘဲ ပြန်လည် အသိပေးသွားမည်ဟု ကြေညာထားသည်။
“ပုံမှန်ဖွင့်ထားတဲ့ ရုံးတစ်ခုကို ပိတ်လိုက်ခြင်းက ထိုင်းထဲမှာ ရောက်နေတဲ့ လူတွေရဲ့ ကိုယ်ရေးအချက်အလက်ကို ဒီထက်ကို ပိုပြီးတော့ စနစ်တကျနဲ့ ပိုပြီးတော့ လိုချင်လို့ ပြန်လည် ပြင်ဆင်မှုပိုင်းတွေ လုပ်လိမ့်မယ်လို့ သုံးသပ်တယ်။ ပတ်စ်ပို့အနီ ထုတ်ပေးရေးကိစ္စကို ယခင်ထက်ပိုပြီး တင်းတင်းကျပ်ကျပ် ကိုယ်တွယ်မယ်လို့ ထင်တယ်။ မြန်မာသံရုံးလို ဧရိယာမှာပဲ ထုတ်ပေးလိမ့်မယ်ထင်တယ်။ ဒါကကျတော့ မြန်မာသံရုံးနဲ့ ဝေးတယ်။ မဟာချိုင်က ရုံးကို ပိတ်တာဆိုတော့” ဟု မြန်မာအလုပ်သမားအရေး ကူညီပေးနေသူ အေအေစီ ကိုရဲမင်းက ရန်ကုန်ခေတ်သစ်သတင်းဌာနသို့ ပြောဆိုသည်။
ထိုင်းရောက် မြန်မာအလုပ်သမားများအနေဖြင့် CI စာအုပ်ဖြင့် ထိုင်းနိုင်ငံအတွင်း ၄ နှစ် နေထိုင်ခွင့်ရှိပြီး လက်ရှိအချိန်အထိ CI အဟောင်းမှ အသစ်သို့ လဲပေးနေဆဲ ဖြစ်ကြောင်း၊ အကြမ်းဖက်စစ်အုပ်စုအနေနှင့် စာအုပ်အနီဟု ခေါ်သည့် Passport စာအုပ်ပြောင်း၍ ထိုင်းနိုင်ငံမှ အခြားနိုင်ငံသို့ ပြောင်းရွှေ့ချင်သူများကို ကန့်သတ် ထိန်းချုပ်လိုသည့် သဘောရှိကြောင်း သုံးသပ်ကြသည်။
လတ်တလော ရုံးပိတ်ရန် စာထုတ်ထားသော်လည်း ပြန်လည် ဖွင့်လှစ်ချိန်တွင် မြန်မာသံရုံးလို နေရာမျိုးတွင်ပင်သာ ဖွင့်လှစ်၍ ကိုယ်ရေးအချက် အလက်များကို ပို၍ တင်းတင်းကျပ်ကျပ် ကိုယ်တွယ်ရန် အချိန်ယူလုပ်ဆောင်နေခြင်းဖြစ်နိုင်ကြောင်း ထိုင်းရောက် မြန်မာအလုပ်သမားအရေး ကူညီပေးနေသူများက သုံးသပ်သည်။
ဓာတ်ပုံ- ထိုင်းနိုင်ငံ၊ ချင်းမိုင်ရှိ CI ထုတ်ပေးရေးစခန်း။
