ရန်ကုန်၊ နိုဝင်ဘာ ၂၃
ပဲခူးတိုင်း၊ ဇီးကုန်းမြို့၊ ရန်ကုန်-ပြည် ကားလမ်းဘေးရှိ ကောင်းကင်ဘုံ-HEAVEN KTV တွင် ပျူစောထီးအဖွဲ့က လာရောက် မူးယစ်သောက်စား ပျော်ပါးနေစဉ် တော်လှန်ရေးတပ်ဖွဲ့ဝင်တချို့က ရဲဝတ်စုံဖြင့် ဝင်ရောက် ပစ်ခတ်ခဲ့ရာ ပျူစောထီး (ပလကဖအဖွဲ့ဝင်) ၅ ဦးနှင့် KTV မှ အမျိုးသမီး ၂ ဦး သေဆုံးသွားကြောင်း ရဲကြေးနန်းအရ သိရှိရသည်။
နိုဝင်ဘာလ ၂၃ ရက်နေ့ နံနက် ၀၀ နာရီ ၃၀ မိနစ်ခန့်အချိန် ဇီးကုန်းမြို့ ၊ အမှတ် ၃ ရပ်ကွက်၊ စမ်းရွာရပ် ၊ ရန်ကုန်-ပြည် ကားလမ်းဘေးရှိ HEAVEN KTV ကို ရဲယူနီဖောင်း ဝတ်ဆင်ထားသော PDF အဖွဲ့ ၇ ဦးက ဆိုင်ကယ်များဖြင့် ရောက်ရှိလာပြီး KTV အခန်းအမှတ် ၃ ၌ သီချင်းဆိုနေသော စစ်တပ်လက်အောက်ခံ ပျူစောထီး ခေါ် ပြည်သူ့လုံ ခြုံရေးနှင့်အကြမ်းဖက်နှိမ်နင်ရေးအဖွဲ့ (ပလကဖ)ဝင်များ နှင့် ပြည် သူ့စစ်များကို ဝင်ရောက် ပစ်ခတ်တိုက်ခိုက်ခဲ့ခြင်းဖြစ်ကြောင်း သိရသည်။
ထိုပစ်ခတ် တိုက်ခိုက်မှုအတွင်း ပျူစောထီး (ပလကဖ အဖွဲ့) အဖွဲ့ဝင် မြင့်နိုင်ဦး၊ ခိုင်ဇော်မြင့်ဦး၊ မျိုးလွင် ၊ မျိုးမင်းအောင် နှင့် ဇော်ကြီး အပါအဝင် KTV မှ မနှင်းနွယ်အောင် နှင့် မသင်းသင်းအေး တို့ သေဆုံးခဲ့ကြောင်း၊ ထို့ပြင် ပြည်သူ့စစ် အဖွဲ့ဝင် အောင်သိန်းဦး ယာဝမ်းဗိုက်ရှပ်ထိ ဒဏ်ရာ ၁ ချက် ၊ ဝဲပေါင်ရှပ်ထိဒဏ်ရာ ၁ ချက် ရရှိခဲ့ကြောင်း သိရှိရသည်။
ပစ်ခတ်မှုဖြစ်ပွားပြီးနောက် ကပစ ၆ မှ ဗိုလ်မှူး ကျော်လင်းသူ ဦးစီးသော အင်အား ၂၇ ဦးက နံနက်အစောပိုင်း ၃ နာရီခန့်တွင် ရောက်ရှိလာပြီး ရုပ်အလောင်းများကိုလာရောက် ကောက်ယူသွားကြောင်း၊ တိုက်ခိုက်မှုအတွင်း ဇီးကုန်း မနရ မှ ထုတ်ပေးထားသော ဘီအေ-၆၃ သေနတ် ၁ လက်လည်း PDF တပ်ဖွဲ့များက ယူဆောင်သွားကြောင်း သိရသည်။
ထို့နောက် ကပစ ၃ ဗိုလ်မှူး မျိုးသန့်ဇော် ဦးစီးသော အင်အား ၃၁ ဦးက ကြို့ပင်ကောက်မြို့တွင် စုဖွဲ့ပြီး ထန်းတပင်ကျေးရွာကို နံနက် ၆ နာရီ ၃၀ မိနစ်ခန့်မှ စတင်ပြီး ရှင်းလင်းရေး လုပ်ဆောင်နေကြောင်း သိရှိရသည်။
“ပလကဖ ဆိုတဲ့ ကောင်တွေက သေနတ် တကာကာနဲ့ ရမ်းကားပျော်ပါးနေလို့ ဝင်လုပ်သွားတာဖြစ်နိုင်တယ်။ အခုအဲကောင်တွေကြောင့် စစ်ခွေးတွေလည်း အငြိမ်မနေရဘဲ အထက်က ဖိခိုင်းနေလို့ တော်တော်ဒေါသထွက်နေတယ်။ နယ်မြေရှင်းလင်းရင်းနဲ့ အဲကောင်တွေကို အော်အော်ဆဲနေတယ်လို့သိရတယ်” ဟု ရဲသတင်းရင်းမြစ်က ပြောဆိုသည်။
အဆိုပါ တိုက်ခိုက်မှုကို နတ်စစ်သည်တပ်ဖွဲ့နှင့်ကြို့ပင်ကောက် BTZM တို့က ပူးပေါင်း လုပ်ဆောင်ခဲ့ခြင်းဖြစ်ပြီး G3 သေနတ် ၁ လက်၊ ကျည်ဘောက် ၄ ခု ၊ကျည်တောင့် ၈၀ ၊ ၊အီကွေ့မန့် ၂ ခု၊ ဓား ၃ လက်၊ လက်ထိပ် ၁ ခုတို့ကို သိမ်းဆည်းရရှိခဲ့ကြောင်း ထုတ်ပြန်ထားသည်။
ဓာတ်ပုံ- ပစ်ခတ်မှုဖြစ်ပွားခဲ့သော ဇီးကုန်းမြို့နယ်မှ ကောင်းကင်ဘုံ KTV ။
