ရန်ကုန်၊ နိုဝင်ဘာ ၂၉
ကရင်ပြည်နယ် မြဝတီမြို့ရှိ အကြမ်းဖက်စစ်တပ်က မတရားချိတ်ပိတ်ခဲ့သည့် ပြည်သူပိုင်နေအိမ်များတွင် မင်းလက်ပံရွာမှ ထွက်ပြေးလာသည့် ကျားဖြန့်တရုတ်များကို ထားရှိပြီး ပြည်သူများက တိုင်ကြားသောအခါမှ ကျားဖြန့်များကို ဟန်ပြန် ဖမ်းဆီးမှုများ လုပ်ဆောင်နေကြောင်း ဒေသပြည်သူများနှင့် နေအိမ်ချိတ်ပိတ်ခံခဲ့ရသော မြ၀တီမြို့ခံ အေအေစီ ကိုရဲမင်းက ရန်ကုန် ခေတ်သစ်သတင်းဌာနသို့ ပြောကြားသည်။
အေအေစီ ကိုရဲမင်း၏ မြ၀တီမြို့ရှိ နေအိမ်ကို စစ်တပ်က ၂၀၂၁ ခုနှစ် စစ်အာဏာရှင်ဆန့်ကျင်ရေး သပိတ်တွင် ပါဝင်သဖြင့် ချိတ်ပိတ်ခဲ့ပြီး အဆိုပါ ချိတ်ပိတ်ထားသော ကိုရဲမင်း၏ နေအိမတွင် ကျားဖြန့် တရုတ်များကို စစ်တပ်လက်အောက်ခံ ကရင်လက်နက်ကိုင်အဖွဲ့က လာထားကြောင်း ၊ ယင်းနောက် ပတ်ဝန်းကျင်မှ ပြည်သူများက တိုင်ကြားသောအခါမှ ကိုရဲမင်း၏ နေအိမ်မှ ကျားဖြန့်တရုတ်များကို စစ်တပ်က အယောင်ပြ ဖမ်းဆီးသွားခဲ့ကြောင်း သိရှိရသည်။
“သတင်းထဲမှာ တက်လာတော့ အံ့ဩသွားတယ်။ ကျားဖြန့်တွေ ဝင်ဖမ်းသွားတယ်ဆိုတော့။ ကိုယ့်အိမ် ကိုယ် မှတ်မိတာပေါ့။ ၂၀၂၁ အစပိုင်းကတည်းက ချိတ်ပိတ်ခံထားရတဲ့ အိမ်။ အဲဒီအိမ်လေးမှာ ဒီလို ကျားဖြန့်တွေ အကြမ်းဖက် စစ်အုပ်စုရဲ့ လက်ဝေခံ လက်ပါးစေ လက်နက်ကိုင်တပ်ဖွဲ့တွေက ဒီကျားဖြန့် တရုတ်တွေကို သွားထားတယ်။ ရပ်ကွက်အုပ်ချုပ်ရေးမှူးတွေနဲ့ ပူးပေါင်းပြီးတော့ ။ ပြီးတော့ စစ်ကောင်စီက ဝင်ပြီးတော့ ဖမ်းပြတယ်။ တော်လှန်ရေးထဲမှာ ပါလို့ ချိတ်ပ်တ်ခံထားရတဲ့ ပြည်သူတွေရဲ့ အိမ်တွေကိုတောင်မှ ကျားဖြန့်တွေ ထားပြီးတော့ ဝင်ဖမ်းတဲ့ အကွက်တွေဆိုတော့ ကျနော်တို့ ချိတ်ပိတ်ခံထားရတဲ့ အိမ်ပိုင်ရှင်တွေ အနေနဲ့ နှစ်ကြိမ် ရင်နာခံစားရတယ် စိတ်မကောင်း ဖြစ်ရတယ်”ဟု အေအေစီကိုရဲမင်းက ရန်ကုန် ခေတ်သစ်သတင်းဌာနသို့ ပြောကြားသည်။
မြ၀တီမြို့နယ်ရှိ ချိတ်ပိတ်ခံထားရသည့် အိမ်များကို နိုင်ငံတော်ပိုင်ဖြစ်၍ မည်သူမှ ကျူးကျော်ဝင်ရောက်ခွင့်မရှိဟု အကြမ်းဖက်စစ်အုပ်စုက စည်းကမ်းထုတ်ထားသော်လည်း ၎င်းတို့ စည်းကမ်းကို ၎င်းတို့ဘာသာ ချိုးဖောက်နေခြင်း ဖြစ်ကြောင်း ၎င်းက ဆက်ပြောသည်။
“ချိတ်ပိတ်ခံထားရတဲ့ အိမ်လေးကို လွန်ခဲ့တဲ့ ၃၊၄ ရက်က မင်းလက်ပံကျားဖြန့်က ထွက်ပြေးတဲ့ လူတွေရော မြဝတီတောင်ဘက်ခြမ်းက ရှောင်တိမ်းထွက်ပြေးတဲ့ လူတွေရော ကျားဖြန့်တွေကို အမှတ် ၄ ရပ်ကွက်ရေးမှူးနဲ့ အတူ DKBA က ဗိုလ်မှူးအဆင့်ရှိတဲ့ အရာရှိတစ်ဦးက လာထားတယ်တဲ့။ ရပ်ကွက်ထဲက သိတဲ့ လူတွေက ပြန်ပြောပြတယ်။ မနေ့ ၂၇ ရက်နေ့ညက ဒီအိမ်ထဲကို စစ်ကောင်စီနဲ့ ပူးပေါင်းအဖွဲ့တွေက ကျားဖြန့်တွေ ရှိတယ် ရပ်ကွက်က တိုင်တယ်ဆိုပြီး ဝင်ဖမ်းတယ်။ သတင်းဌာနတွေက သတင်းတက်လာမှ သိရတယ်။ အင်မတန်စိတ်မကောင်း ဖြစ်ရတယ်။ ကျွန်တော်တို့ အိမ်ကို ပစ်ပြီး ပြေးခဲ့ရတယ်။ ကျွန်တော်တို့ အိမ်လေး ချိတ်ပိတ်ခံရတယ်။ ချိတ်ပိတ်ခံရတဲ့ အိမ်မှာ ကျားဖြန့်တွေ ထပ်ထားပြီး ဒီလို ရုပ်ရှင် ရိုက်ပြတဲ့ အကွက်မျိုးတွေကို ရင်တွေ ပိုနာရတယ်။ စိတ်မကောင်း ဖြစ်ရတယ်ဗျ” ဟု အေအေစီကိုရဲမင်းက ဖြစ်စဉ်ကို ပြောပြသည်။
လက်ရှိအချိန်တွင် ကျားဖြန့်များသည် ထိုင်းမြန်မာ နယ်စပ် ကရင်ပြည်နယ်ထဲမှ ထွက်ပြေးနေကြပြီး ဘားအံမှတစ်ဆင့် ရန်ကုန်၊ မန္တလေးသို့ အလုံးအရင်းဖြင့် ဝင်ရောက်နေကြကြောင်း၊ မြန်မာနိုင်ငံအနှံ့ တော်လှန်ရေးလုပ်၍ ချိတ်ပိတ်ခံထားရသူများ၏ အိမ်များတွင် ကျားဖြန့်များ ဝင်ရောက်နေရာယူခြင်း နေရာပေးခြင်းများ ဖြစ်လာနိုင်ကြောင်း၊ အကြမ်းဖက်ဖက်စစ်အုပ်စုနှင့် ဆက်နွှယ်နေသူများက ထိုကဲ့သို့ လုပ်ဆောင်လာနိုင်ကာ တော်လှန်ပြည်သူများ၏ ချိတ်ပိတ်ခံ နေအိမ်များတွင် ကျားဖြန့်တရုတ်များက ဝင်ရောက် အလုပ်လုပ်မှုများ ဖြစ်ပေါ်လာနိုင်ကြောင်း အေအေစီကိုရဲမင်းက ပြောဆိုသည်။
အလားတူ မွန်ပြည်နယ်၊ ပေါင်မြို့နယ်၊ ရန်ကုန်-မော်လမြိုင်ရထားလမ်းပိုင်းရှိ ရင်းငြိမ်ဘူတာတွင် မြန်မာနိုင်ငံသားမှတ်ပုံတင် ၁၃/ ကိုင်ဆောင်ထားသော ကျားဖြန့် တရုတ် ၁၀၀ ကျော်ကို ဖမ်းဆီးရမိခဲ့ကြောင်း ဒေသပြည်သူများနှင့် စစ်တပ်သတင်းရင်းမြစ်ထံမှ သိရှိရသည်။
နိုဝင်ဘာလ ၂၆ ရက်နေ့ နံနက် ၁၀ နာရီအချိန် မြ၀တီမြို့နယ်အတွင်းရှိ ကျားဖြန့် လုပ်ငန်းများမှ ထွက်ပြေးလာသော တရုတ်နိုင်ငံသား ၁၀၁ ဦးမှာ ရင်းငြိမ်ဘူတာသို့ အိမ်စီးယာဥ်၊ ဟိုက်ဂျက်ယာဥ်များဖြင့် ရောက်ရှိလာကြောင်း၊ အဆိုပါ ကျားဖြန့် တရုတ်များက ရထားဖြင့် ဆက်လက် ခရီးထွက်ရန် ပြင်ဆင်နေစဉ် ပြည်သူများက တိုင်ကြားသဖြင့် စစ်တပ်က ဖမ်းဆီးခဲ့ခြင်းဖြစ်ကြောင်း၊ ဖမ်းဆီးခံရသူအများစုမှာ ရှမ်းပြည်နယ် မှတ်ပုံတင် ၁၃ မျဉ်းစောင်း ကိုင်ဆောင်ထားကြကြောင်း သိရှိရသည်။
ဖမ်းဆီးခံရသော ကျားဖြန့်တရုတ်များတွင် အမျိုးသမီး ၃၉ ဦးနှင့် အမျိုးသား ၆၂ ဦး ပါဝင်ပြီးပေါင်မြို့နယ် ရဲစခန်းက အမှုဖွင့် စစ်ဆေးနေကြောင်း သိရှိရသည်။
