ပဲခူးတိုင်း၊ ပေါင်းတည်မြို့နယ်၊ ကျောက်ကြီးတောင် အကြမ်းဖက် စစ်တပ် ဂိတ်စခန်းကို စနိုက်ပါ၊ လက်နက်ငယ်များဖြင့် ပစ်ခတ်တိုက်ခိုက်ရာ စစ်သား ၂ ဦးသေဆုံးခဲ့ကြောင်း ၃၆၀၁ တပ်ရင်း စစ်ထောက်လှမ်းရေးနှင့် သတင်းပြန်ကြားရေး တာဝန်ခံ ရဲဘော်Shadow က ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၂ ရက်နေ့ နံနက် ၁၀ နာရီ ၃၅ မိနစ်ခန့်တွင် ပေါင်းတည်မြို့နယ်၊ ကျောက်ကြီးတောင် အကြမ်းဖက် စစ်တပ် အထိုင်ဂိတ်စခန်းကို တော်လှန်ရေးတပ်ဖွဲ့များက စနိုက်ပါ၊ လက်နက်ငယ်များဖြင့် ပစ်ခတ်တိုက်ခိုက်ခဲ့ကြောင်း သိရသည်။
ထို တိုက်ခိုက်မှုအတွင်း အကြမ်းဖက် စစ်တပ်ဘက်မှ စစ်သား ၂ ဦး သေဆုံးခဲ့ပြီး သေဆုံးသွားသော စစ်သား အလောင်းများကို ကျောက်ကြီးတောင် စစ်တပ် အထိုင်ဂိတ်စခန်းအနီးတွင် မြေမြုပ်ခဲ့ကြောင်း သိရှိရသည်။
ယင်းတိုက်ခိုက်မှုအတွင်း အကြမ်းဖက် စစ်တပ်ဘက်မှလည်း လက်နက်ကြီး၊ လက်နက်ငယ်များဖြင့် ပြန်လည် ပစ်ခတ်တိုက်ခိုက်ခဲ့ရာ တော်လှန်ရေး ရဲဘော်များ အနီးရှိတဲများ၊ ကျေးရွာများကို ကျရောက် ပေါက်ကွဲခဲ့သော်လည်း တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
“ကျနော်တို့ တော်လှန်ရေး ရဲဘော်တွေက စနိုက်ပါ ၊ လက်နက်ငယ်တွေနဲ့ သွားရောက် ပစ်ခတ် တိုက်ခိုက်ခဲ့တာပါ။ စစ်ခွေး ၂ ကောင်ကတော့ နေရာမှာတင် ပွဲချင်းပြီးသေဆုံးတယ်။ သေဆုံးသွားတဲ့ စစ်ခွေး အလောင်းတွေကို ကျောက်ကြီးတောင် သူတို့ အထိုင်ဂိတ်စခန်းအနီးမှာ မြေမြုပ် လိုက်တယ်လို့ သိရတယ်” ဟု ၃၆၀၁ တပ်ရင်း စစ်ထောက်လှမ်းရေးနှင့် သတင်းပြန်ကြားရေး တာဝန်ခံ ရဲဘော် Shadow က ပြောဆိုသည်။
အဆိုပါ တိုက်ခိုက်မှုကို ဗျူဟာ ၂၁ မှ ရဲဘော်များ နှင့် ၃၆၀၁ တပ်ရင်းရုံးမှ ရဲဘော်များက ပူးပေါင်း လုပ်ဆောင်ခဲ့ခြင်းဖြစ်ကြောင်း သိရသည်။
