ရန်ကုန်၊ နိုဝင်ဘာ ၃၀
မကွေးတိုင်း၊ ရေစကြိုမြို့နယ်ရှိ ကျေးရွာများကို စစ်ကြောင်းထိုး မီးရှို့နေသော အကြမ်းဖက် စစ်တပ်ကို ၃ ရက်ဆက် ကြားဖြတ် တိုက်ခိုက်မှု စစ်ကြောင်းမှူး ဗိုလ်ကြီး မင်းတေဇ အပါဝင် စစ်သား ၄ ဦးသေဆုံးပြီး အလောင်းများကို မီးရှို့ဖျောက်ဖျက်သွားကြောင်း ပြည်သူ့ကာကွယ်ရေးတပ်ဖွဲ့ ရေစကြိုမြို့နယ် ပကဖ မှ သတင်းတာဝန်ခံက ရန်ကုန်ခေတ်သစ်သတင်းဌာနထံသို့ပြောဆိုသည်။
နိုဝင်ဘာလ ၂၅ ရက်နေ့ နံနက် ၁၀ နာရီခန့်တွင် ရေစကြိုမြို့နယ်ရှိ ခလရ ၂၅၆ တပ်ရင်း ၊ ခလရ ၂၅၇ တပ်ရင်းနှင့် ခလရ ၂၅၈ တပ်ရင်းတို့မှ ထွက်လာသော အင်အား ၁၀၀ ကျော်ပါ အကြမ်းဖက် စစ်တပ် စစ်ကြောင်းသည် ထန်းဆယ်ဆင်ပင်ကျေးရွာ တောင်ဘက်သို့ ထွက်ခွာလာစဉ် တော်လှန်ရေး တပ်ဖွဲ့များက ရွာသစ်ကျေးရွာနှင့် ထန်းဆယ်ပင်ကျေးရွာ အကြားသို့အရောက်အတွင် ကြားဖြတ် တိုက်ခိုက်ခဲ့ကြောင်း သိရသည်။
ထိုထိတွေ့ တိုက်ပွဲသည် ၂ နာရီခန့် ကြာမြင့်ခဲ့ပြီး အကြမ်းဖက် စစ်တပ်ဘက်မှ စစ်ကြောင်းမှူး ဗိုလ်ကြီး မင်းတေဇ အပါဝင် ၃ ဦးသေဆုံးပြီး ၅ ဦး ဒဏ်ရာရရှိခဲ့ကြောင်း၊ တိုက်ပွဲအတွင်း အထိနာခဲ့သော စစ်တပ် စစ်ကြောင်းသည် ရွာသစ်ကျေးရွာထဲသို့ ဝင်ရောက်သွားပြီး ပြည်သူ့ပိုင် ပစ္စည်းများကို ခိုးယူခြင်း ဖျက်စီးခြင်းများ ပြုလုပ်ခဲ့ကြောင်း သိရှိရသည်။
နိုဝင်ဘာလ ၂၇ ရက်နေ့တွင် အထိနာနေသော စစ်တပ် စစ်ကြောင်းသည် ရွာသစ်ကျေးရွာမှ ညောင်စောက်ကျေးရွာဘက်သို့ ကူးလာပြီး ပြည်သူ့ပိုင်နေအိမ် ၁၀ လုံးကို မီးရှို့ကာ ပြည်သူပိုင် ပစ္စည်းများကိုခိုးယူပြီး ရေစကြိုမြို့ပေါ်စီမံရုံးပေါင်းစုံထဲသို့ သယ်ဆောင်နေကြောင်းသိရှိရ၍ တော်လှန်ရေး တပ်ဖွဲ့များက ညောင်စောက်ကျေးရွာအတွင်း အနီးကပ် ဝင်ရောက် တိုက်ခိုက်ခဲ့ရာ မိနစ် ၂၀ ခန့် တိုက်ပွဲဖြစ်ပွားခဲ့ပြီး စစ်သား ၁ ဦးသေဆုံးကာ ၂ ဦး ထိခိုက် ဒဏ်ရာရရှိခဲ့ကြောင်း သိရသည်။
နိုဝင်ဘာလ ၂၉ ရက်နေ့၌ စစ်တပ် စစ်ကြောင်းသည် ညောင်စောက်ကျေးရွာမှ တစ်ဆင့် ရွှေကျောင်းကျေးရွာနှင့် ပေါက်တောကျေးရွာများသို့ ဝင်ရောက်ကာ ပြည်သူပိုင်ပစ္စည်းများကို ယူဆောင်သွားပြီး ရေစကြိုမြို့နယ် စီမံရုံးပေါင်းစုံထဲသို့ ဝင်ရောက်ကာ ထိုမှတဆင့် ခလရ ၂၅၈ တပ်ရင်းထဲ ဝင်ရောက်သွားကြောင်းသိရှိရသည်။
“ကျွန်တော်တို့ ပထမနေ့ တိုက်ပွဲ ဖြစ်ပွားတဲ့ အချိန်မှာတော့ စစ်ကြောင်းမှူး ဗိုလ်ကြီး မင်းတေဇ အပါအဝင် တပ်သား ၂ ယောက်သေဆုံးတယ်။ အားလုံးပေါင်း ၃ ဦးသေဆုံးတယ်။ ဒုတိယနေ့ တစ်ရက်မှာ တိုက်ပွဲဖြစ်တဲ့နေရာမှာ ၁ ယောက်သေဆုံးတယ်။ စုစုပေါင်း ၄ယောက်သေဆုံးတယ်။ ကျွန်တော်တို့ နယ်မြေ ရှင်းလင်းတဲ့နေရာမှာတော့ လက်နက်ခဲယမ်း သိမ်းဆည်းရမိတာမျိုးတော့ မတွေ့ခဲ့ဘူး။ ကျွန်တော်တို့ သိမ်းဆည်းရမိခဲ့တဲ့ လက်နက်ခဲယမ်းတော့မရှိခဲ့ဘူး။ ပြည်သူတွေ ဖမ်းဆီးတာမျိုးတော့ရှိတယ်။ ညောင်စောက်ကျေးရွာကတော့ အများဆုံးမိတာပေါ့။ အားလုံးပေါင်း ၅၀၀ လောက်ကို ခန့်မှန်းမိတယ်။ တစ်ရွာလုံးနီးပါး ဘုန်းကြီးကျောင်းထဲကို ထည့်ထားတာပါ။ ပြည်သူပိုင် ပစ္စည်းတွေ ရွှေတွေဖြုတ်ခိုင်းတယ် နားကပ်ပါရင် နားကပ် ဆွဲကြိုးပါရင် ဆွဲကြိုးတွေ ဖြုတ်ခိုင်းပြီး အဲဒါတွေကို ယူသွားတယ်” ဟု ပြည်သူ့ကာကွယ်ရေးတပ်ဖွဲ့ ရေစကြိုမြို့နယ် ပကဖ အဖွဲ့မှ သတင်းတာဝန်ခံက ပြောဆိုသည်။
အဆိုပါ တိုက်ခိုက်က်မှုကို ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် (ပ.က.ဖ)နှင့် အတူ ပခုက္ကူခရိုင်တပ်ရင်းအမှတ်(၉) ၊ နွေဦးစစ်သည် ရေလယ်ကျွန်းဒေသစစ်ကြောင်းတို့က ပူးပေါင်း လုပ်ဆောင်ခဲ့ကြောင်း သိရသည်။
