အကြမ်းဖက်စစ်အာဏာရှင်စနစ်ကို ဆန့်ကျင်ပြီး မြန်မာပြည်သူများနှင့်အတူ ရပ်တည်လျက်ရှိသော ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း၏ နေရာ အပြောင်းအလဲမရှိဘဲ ဆက်လက် တာဝန်ယူခွင့်ရရှိထားကြောင်း အမေရိကန်ပြည်ထောင်စု၊ နယူးယောက်မြို့ အခြေစိုက် ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်ရုံးထံမှ သိရှိရသည်။
အကြိမ် ၈၀ မြောက် ကုလသမဂ္ဂအထွေထွေညီလာခံတွင် အဖွဲ့ဝင် ၉ နိုင်ငံပါဝင်သော ကုလသမဂ္ဂ Credentials Committeeကို ဖွဲ့စည်းခဲ့ပြီး ယင်းကော်မတီတွင် အန်ဒိုရာ၊ ဘော့စ်ဝါနာ၊ တရုတ် ၊ ဒိုမီနီကန်သမ္မတနိုင်ငံ၊ မလေးရှား၊ ရုရှားဖယ်ဒရေးရှင်း၊ ဆီနီဂေါ၊ ထရီနီဒက်၊ တိုဘာဂို နှင့် အမေရိကန်ပြည်ထောင်စုတို့ ပါဝင်ကြောင်း၊ အဆိုပါ ကုလသမဂ္ဂ Credentials Committeeက သံအ မတ် ကြီး ဦးကျော်မိုးထွန်းနေရာကို ဆက်လက်အတည်ပြုထားကြောင်း သိရှိရသည်။
“သံအမတ်ကြီးရဲ့ နေရာကိုတော့ ကုလသမဂ္ဂ Credentials Committeeက အတည်ပြုထားပြီ။ ညီလာခံကို ဆက်ပြီး တင်ပြ အတည်ပြုဖို့ပဲရှိတော့တယ်။ သံအမတ်ကြီးပဲ ဆက်ပြီး တာဝန်ယူခွင့်ရသွားတာပါ” ဟု ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်ရုံးမှ သတင်းရင်းမြစ်က ပြောဆို သည်။
သံအမတ်ကြီး ဦးကျော်မိုးထွန်းသည် မြန်မာနိုင်ငံတွင် စစ်အာဏာသိမ်းခဲ့သော ၂၀၂၁ ခုနှစ်မှစတင်၍ ကုလသမဂ္ဂတွင် မြန်မာနိုင်ငံကိုယ်စားပြု သံအမတ်ကြီးအဖြစ် ဆက်လက် ရပ်တည်နေပြီး အကြမ်းဖက်စစ်ကောင်စီကို နိုင်ငံတကာနှင့် ကုလသမဂ္ဂလုံခြုံရေးကောင်စီက ချက်ချင်း အရေးယူရန် တစိုက်မတ်မတ် တင်ပြတောင်းဆိုလျက်ရှိသည့် ပြည်သူ့ဘက်တော်သား သံအမတ်ကြီးဖြစ်သည်။
အကြမ်းဖက်စစ်ကောင်စီက သံအမတ်ကြီး ဦးကျော်မိုးထွန်း၏ နေရာတွင် ၎င်းတို့၏ ကိုယ်စား လှယ်ဖြင့် အစားထိုးနိုင်ရေး ၂၀၂၁ ခုနှစ်မှ စတင်၍ နည်းလမ်းမျိုးစုံဖြင့် ကြိုးစားခဲ့သော်လည်း အောင်မြင်မှုမရရှိဘဲ ကုလသမဂ္ဂတွင် သံအမတ်ကြီး ဦးကျော်မိုးထွန်းကသာ မြန်မာပြည်သူများနှင့် မြန်မာနိုင်ငံကို ကိုယ်စားပြုသော တစ်ဦးတည်းသော သံအမတ်ကြီးအဖြစ် ပြည်သူ့ဘက်မှ ဆက်လက်အမြဲ ရပ်တည်နေခြင်းဖြစ်သည်။
