ထိုင်းနိုင်ငံ၊ Samut Prakan ရှိ The One စားသောက်ဆိုင်ရှေ့တွင် ထိုင်းပါဆယ်ပို့သမားကို ရန်ဖြစ် ထိုးကြိတ်ခဲ့သော မြန်မာအလုပ်သမား ၆ ဦးမှာ ထိုင်းရဲထံတွင် အဖမ်းခံလိုက်ပြီး ရန်ဖြစ်သော နှစ်ဖက်စလုံးကို ဒဏ်ငွေချမှတ်ကာ ပြန်လွှတ်ပေးလိုက်ကြောင်း ထိုင်းသတင်းများအရ သိရှိရသည်။
၂၀၂၆ ခုနှစ်၊ ဇန်နဝါရီလ ၁၁ ရက်နေ့ ညနေပိုင်း ထိုင်းပါဆယ်ပို့သမားများနှင့် မြန်မာအလုပ် သမားတစ်စုအကြား ခိုက်ရန်ဖြစ်ပွားခဲ့ကြောင်း၊ ယနေ့ ဇန်နဝါရီလ ၁၃ ရက်နေ့ နံနက်ပိုင်းတွင် ထိုင်းပါဆယ်ပို့သမားကို တိုက်ခိုက်ခဲ့သော မြန်မာအလုပ်သမား ၆ ဦးက The One စားသောက်ဆိုင်မန်နေဂျာ အမျိုးသမီးနှင့်အတူ ရဲတပ်ဖွဲ့ထံ လာရောက်အဖမ်းခံခဲ့ကြောင်း သိရှိရသည်။
မြန်မာအလုပ်သမား ၆ ဦးက ရဲစခန်းတွင် ဝန်ခံထွက်ဆိုချက်ပေးခဲ့ကြပြီး ၎င်းတို့လုပ်ရပ်အတွက် နောင်တရကြောင်း ပြောဆိုခဲ့ကြောင်း၊ ယင်းအပြင် အထိုးခံခဲ့ရသော ထိုင်းနိုင်ငံသား ပါဆယ်ပို့သမားနှင့် ထိုင်းပြည်သူများကို ဝန်ချတောင်းပန်ခဲ့ကြောင်း၊ စိတ်တို ဒေါသဖြစ်ပွားပြီး ရန်ဖြစ်မှုအတွက် နောင်တရကြောင်းနှင့် နောက်နောင် ထိုကဲ့သို့သော ဖြစ်ရပ် မဖြစ်စေရန် ဝန်ခံကတိပြုခဲ့ကြောင်း သိရှိရသည်။
ထိုင်းရဲတပ်ဖွဲ့ ဥပဒေအရ နှစ်ဖက်စလုံးကို ရန်ဖြစ်မှုအတွက် ကနဦးတရားစွဲဆိုကာ ဒဏ်ငွေ ချမှတ်ခဲ့ကြောင်း၊ မြန်မာအလုပ်သမားများက ထိုင်းပါဆယ်ပို့သမား၏ ဆိုင်ကယ် ပျက်စီးမှုအတွက် လျှော်ကြေးငွေ ဘတ် ၁ သောင်း ပေးရန် သဘောတူညီခဲ့ကြောင်း သိရှိရသည်။
လတ်တလော အခင်းဖြစ်ပွားခဲ့ရာ The One စားသောက်ဆိုင်ကို ထိုင်းပိုင်ရှင်က ပိုင်ဆိုင်ခြင်း ဟုတ်၊ မဟုတ် ဆက်လက်စိစစ်လျက်ရှိကြောင်း သိရှိရသည်။
