ရန်ကုန်၊ ဇန်နဝါရီ ၂၉
ဗီယက်နမ်နိုင်ငံ၊ ဟိုချီမင်းမြို့ရှိ Vanlang Saigon College တွင် တက်ရောက်နေသော မြန်မာကျောင်းသားတစ်ဦးက ငွေလဲလှယ်လုပ်ငန်း အကြောင်းပြကာ အခြားမြန်မာကျောင်းသားများထံမှ မြန်မာကျပ်ငွေ သိန်း ၁၅၀၀ ဝန်းကျင် လိမ်လည်သွားကြောင်း ကိုယ်တိုင် ငွေကြေးလိမ်လည်ခံရသူများက ရန်ကုန် ခေတ်သစ်သတင်းဌာနသို့ ပြောကြားသည်။
ငွေကြေးလိမ်လည်သူမှာ ဝင်းမင်းသန့် ဆိုသူ ဖြစ်ပြီး ငွေလဲလုပ်ငန်း လုပ်ကိုင်နေသည်မှာ တစ်နှစ်ကျော်ခန့်ရှိပြီဖြစ်ပြီး လတ်တလောတွင် ကျောင်းသားများ၏ ယုံကြည်မှုကို အသုံးချကာ ကျောင်းလခပေးသွင်းရန်နှင့် နေထိုင်စားသောက်စရိတ်များအတွက် လိမ်လည် ထွက်ပြေးသွားခြင်း ဖြစ်ကြောင်း သိရှိရသည်။
“တချို့ဆို စားစရာမရှိ သူများနိုင်ငံမှာ သတ်သေမယ်ပဲ ပြောနေတဲ့ သူတွေ ရှိပါတယ်။ ငွေလိမ်ခံရသူတွစာရင်း စုစည်းနေတုန်းပဲ”ဟု ကိုယ်တိုင်ငွေလိမ်ခံခဲ့ရသူ ကျောင်းသားတစ်ဦးက ရန်ကုန်ခေတ်သစ်သတင်းဌာနသို့ ပြောကြားသည်။
လက်ရှိတွင် ငွေကြေးအလိမ်ခံရသည့် နစ်နာသူ ကျောင်းသားကျောင်းသူ ၂၈ ဦးခန့်ရှိကြောင်း သိရှိရပြီး အလိမ်ခံရသူ အရေအတွက် ပိုမိုများပြားနိုင်ကြောင်း ငွေကြေးလိမ်လည်ခံရသူများက ပြောဆိုသည်။
“အခုသိရသလောက်ကတော့ သိန်း ၁၅၀၀ လောက် ရှိနေပါပြီ။ အဲဒါက အကုန်မဟုတ်သေးပါဘူး၊ တခြားလူတွေ အများကြီး ကျန်ပါသေးတယ်။ စုစည်းနေတုန်းပါပဲ။ သူက ကျောင်းသားပဲလေ၊ ငွေလဲလုပ်တာ။ တစ်နှစ်ကျော်လောက် ယုံယုံကြည်ကြည်နဲ့ သူ့ဆီမှာ ပိုက်ဆံလဲခဲ့ကြတာ၊ အခုမှ သူက လိမ်သွားတာပါ” ဟု ကိုယ်တိုင်ငွေလိမ်ခံခဲ့ရသူ ကျောင်းသားတစ်ဦးက ရန်ကုန်ခေတ်သစ်သတင်းဌာနသို့ ပြောကြားသည်။
လိမ်လည်ခံရသူအများစုမှာ Vanlang Saigon College မှ ကျောင်းသားများဖြစ်ပြီး အခြားမေဂျာနှင့် အခြားကျောင်းများမှ ကျောင်းသားအချို့လည်း ပါဝင်ကြောင်း ၊ ဇန်နဝါရီလ ၂၆ ရက်နေ့တွင် ကျောင်းသားများသည် လိမ်လည်ခံရကြောင်း စတင်သတိထားမိကြခြင်း ဖြစ်ပြီးဝင်းမင်းသန့်သည် လက်ရှိတွင် ငွေလိမ်သူ ဝင်းမင်းသန့်မှာ အခြားနိုင်ငံတစ်ခုသို့ ထွက်ပြေးတိမ်းရှောင်သွားကြောင်း သိရှိရသည်။
“တချို့က မိသားစုဆီ တိုက်ရိုက်ပို့ခိုင်းသလို၊ တချို့က သူတို့အကောင့်ထဲကနေ သူ့ကို ပိုက်ဆံပြန်လဲခိုင်းတာတွေ ရှိပါတယ်။ အဓိကက ကျောင်းလခတွေ၊ နေထိုင်စားသောက်စရိတ်တွေပါ။ သူက ဒီ ဟိုချီမင်းမှာဆိုရင် နည်းနည်းလက်ကြီးတဲ့ အနေအထားရှိတယ်။ အခုလောလောဆယ် ကျောင်းသားတွေကတော့ တရားစွဲဆိုမှုတွေ လုပ်နိုင်ဖို့ တတ်နိုင်သလောက် လိုက်လံစုံစမ်းနေကြပါတယ်” ဟု ကိုယ်တိုင်ငွေလိမ်ခံခဲ့ရသူ ကျောင်းသားတစ်ဦးက ရန်ကုန်ခေတ်သစ်သတင်းဌာနသို့ ပြောဆိုသည်။
လက်ရှိတွင် နစ်နာသူများက လိမ်လည်သူ၏ အချက်အလက်များနှင့် လိမ်လည်ခံရသည့် ငွေပမာဏစာရင်းများကို စုဆောင်းနေကြပြီး ဥပဒေကြောင်းအရ အရေးယူနိုင်ရန် ကြိုးပမ်းလျက်ရှိကြောင်း သိရှိရသည်။
