ရန်ကုန်၊ ဖေဖော်ဝါရီ ၄
အမေရိကန်သမ္မတ ဒေါ်နယ်ထရမ့်က အမေရိကန်အစိုးရ၏ ၂၀၂၆ ဘဏ္ဍာရေးနှစ် အသုံးစရိတ် ဥပဒေကို ဖေဖော်ဝါရီလ ၃ ရက်နေ့ တွင် လက်မှတ်ရေးထိုး အတည် ပြုလိုက်ခြင်းဖြင့် မြန်မာနိုင်ငံအတွက် ဒေါ်လာ ၁၂၁ သန်း အကူအညီပေးရေး အစီအစဉ်သည် တရားဝင် အသက်ဝင်လာကြောင်း သိရသည်။
အမေရိကန်အစိုးရ အသုံးစရိတ် ဥပဒေဖြစ်သည့် Consolidated Appropriations Act, 2026 (၂၀၂၆ ဘဏ္ဍာရေးနှစ် အစိုးရအသုံးစရိတ် ပေါင်းစည်းဥပဒေ) ကို လက်မှတ်ရေးထိုးလိုက်မှုနှင့်အတူ ယင်းဥပဒေတွင် သေးငယ်သော အစိတ်အပိုင်းတစ်ခု အဖြစ် ပါဝင်နေသည့် မြန်မာနိုင်ငံသို့ လူသားချင်းစာနာရေးနှင့် ဒီမိုကရေစီပံ့ပိုးရေး အစီအစဉ်များလည်း အသက် ဝင်လာခြင်းဖြစ်သည်။
အမေရိကန်အောက်လွှတ်တော်က Consolidated Appropriations Act, 2026 (၂၀၂၆ ဘဏ္ဍာရေးနှစ် အစိုးရအသုံး စရိတ် ပေါင်းစည်းဥပဒေ)ကို ထောက်ခံ မဲ ၂၁၇ မဲ ၊ ကန့်ကွက်မဲ ၂၁၄ မဲ ဖြင့် အတည်ပြုခဲ့ခြင်းဖြစ်သည်။
ဥပဒေအရ အသက်ဝင်လာသော်လည်း မြန်မာနိုင်ငံအတွက် အကူအညီပေးရေး ဒေါ်လာ ၁၂၁ သန်း မည်သို့မည်ပုံ ဖြန့်ဝေမည်ကို မသိရှိရသေးဘဲ မြန်မာစစ်တပ်ထံသို့ မည်သည့်အခြေအနေမျှ ယင်းအကူအညီများ ပေးပို့မည်မဟုတ်ကြောင်း ဥပဒေထဲတွင် တင်းကျပ်စွာ တားမြစ်ထားသည်။
မြန်မာနိုင်ငံအတွက် ပေးအပ်မည့် အကူအညီများတွင် ထိုင်းနှင့် အိန္ဒိယမှတဆင့် နယ်စပ်ဖြတ်ကျော် လူသားချင်းစာနာ အကူအညီပေးရေး၊ နိုင်ငံရေးအကျဉ်းသားများ ထောက်ပံ့ရေး ၊စစ်ရာဇဝတ်မှုနှင့် လူ့အခွင့်အရေးချိုးဖောက်မှု အထောက်အထား စုဆောင်းရေး၊ ဒေသန္တရအုပ်ချုပ်ရေး၊ ဖက်ဒရယ်ဒီမိုကရေစီ အခြေခံအုတ်မြစ် တည် ဆောက်ရေး၊ စစ်တပ်မှ CDM လုပ်လာသူများကို ကူညီရေး စသည့် လုပ်ငန်းများတွင် အသုံးပြုသွားမည်ဖြစ်ကြောင်း ဥပဒေတွင် တိကျစွာ ဖော်ပြထားသည်။
