ရန်ကုန်၊ ဖေဖော်ဝါရီ ၁၆
ရန်ကုန်တိုင်း၊ မင်္ဂလာဒုံမြို့နယ် ရဲစခန်းဂိတ်ကင်းတွင် အရက်သောက်နေသည့် ရဲများကို မိုင်းခွဲ တိုက်ခိုက်ရာ ရဲများ ထိခိုက်မှုရှိနိုင်ကြောင်း Yangon Army (YA) အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၁၅ ရက်နေ့ ညနေ ၆ နာရီ ၄၅ မိနစ်ခန့်တွင် မင်္ဂလာဒုံမြို့နယ် ရဲစခန်း ဂိတ်ကင်းတွင် မူးရူးနေသော ရဲများကို တော်လှန်ရေး ရဲဘော်များက ပြင်းအားမြင့် မိုင်း ၂ လုံးဖြင့် ဖောက်ခွဲတိုက်ခိုက်ခဲ့ကြောင်း၊ ထိုတိုက်ခိုက်မှု ရဲများထိခိုက်မှုရှိသော်လည်း အရေအတွက်ကို အတည်ပြုနိုင်ခြင်းမရှိသေးကြောင်း သိရသည်။
“ရဲစခန်းဂိတ်ကင်းမှာ မူးရူးနေတဲ့ ရဲတွေကို ပြင်းအားမြင့် မိုင်း ၂ လုံးနဲ့ ဖောက်ခွဲ တိုက်ခိုက်တာပါ။ ရဲတွေ ထိခိုက်မှုရှိနိုင်ပါတယ်။ ကျနော်တို့ YA အနေနဲ့က လုပ်စရာရှိတာဆက်တိုက်လုပ်နေမှာပါ။ တိုက်ခိုက်ရေးတပ်ဖွဲ့ ၇ နဲ့ ပူးပေါင်းပြီး လုပ်ဆောင်သွားပါမယ်။ တရားမဝင် ရွေးကောက်ပွဲကနေ တရားမဝင်တက်လာတဲ့အစိုးရနဲ့ ပတ်သက်တဲ့ ပစ်မှတ်တွေကိုလည်း တိုက်ခိုက်သွားမှာပါ” ဟုYangon Army (YA) အဖွဲ့မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို Yangon Army (YA) နှင့် ရန်ကုန်တိုင်း (ပကဖ) အထူးတိုက်ခိုက်ရေးတပ်ဖွဲ့ (၇) မှ ရဲဘော်များက ပူးပေါင်း လုပ်ဆောင်ခဲ့ခြင်းဖြစ်ကြောင်း၊ အကြမ်းဖက် စစ်ကောင်စီနှင့် ပတ်သက်သော ပစ်မှတ်များ၊ အကြမ်းဖက် စစ်ကောင်စီ ပြုလုပ်သည့် တရားမ၀င်ရွေးကောက်ပွဲမှ တက်လာသော အစိုးရ ဆိုသူများကိုလည်း ဆက်လက်၍ အပြင်းအထန်တိုက်ခိုက်သွားမည်ဖြစ်ကြောင်း Yangon Army (YA) ကအသိပေး ပြောဆိုထားသည်။
“ရဲစခန်းဘက်ကနေ ညနေပိုင်းက ပေါက်ကွဲသံထွက်လာတာတော့ ကြားမိတယ်။ လူနာတင် ပရဟိတကားတွေက ပေါက်ကွဲသံထွက်ပြီး မကြားဘူး။ ရဲစခန်းဘက်ကို မောင်းသွားတာတော့ တွေ့လိုက်တယ်” ဟု မင်္ဂလာဒုံမြို့နယ်အတွင်း နေထိုင်သော ပြည်သူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
