ရန်ကုန်၊ ဖေဖော်ဝါရီ ၂၈
စစ်ကိုင်းတိုင်း၊ စစ်ကိုင်းမြို့ ကံတလူတိုးဂိတ်တွင် ဆက်ကြေးကောက်နေသော အကြမ်းဖက် စစ်တပ်ကို ဒရုန်းဖြင့် ဗုံးကျဲတိုက်ခိုက်ခဲ့ရာ စစ်သားများ ထိခိုက်သေဆုံးမှုရှိနိုင်ကြောင်း လင်းယုန်ညီနောင် ပျောက်ကြားတပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဖေဖော်ဝါရီလ ၂၅ ရက်နေ့ ညနေ ၄ နာရီ ၁၈ မိနစ်ခန့်အချိန် စစ်ကိုင်းမြို့ ကံတလူတိုးဂိတ်တွင် ပြည်သူများထံမှ အတင်း အဓမ္မ ဆက်ကြေး ကောက်ခံနေသော အင်အား ၅၀ ခန့်ပါ အကြမ်းဖက် စစ်တပ် စစ်ကြောင်းကို လင်းယုန်ညီနောင် ပြောက်ကျားတပ်ဖွဲ့က ၄၀ မမ ဗုံးများ၊ ဒရုန်း ဗုံးသီးများဖြင့် ဗုံးကျဲ တိုက်ခိုက်ခဲ့ကြောင်း ၊ ထိုတိုက်ခိုက်မှုအတွင်း ၄၀ မမ ဗုံးများက စစ်တပ် ဘန်ကာအနီး ကျရောက် ပေါက်ကွဲခဲ့ပြီး ဒရုန်းဗုံးများသည်လည်း ရွှေတောင်ရုံးဝင်းအတွင်း ကျရောက်ပေါက်ကွဲကာ စစ်သားများ ထိခိုက်သေဆုံးမှုရှိနိုင်ကြောင်း သိရှိရသည်။
“စစ်ခွေးသေစာရင်းကတော့ မသိရသေးဘူး။ စစ်ခွေးတွေ ထိခိုက်သေဆုံးမှုရှိနိုင်တယ်။ ပြည်သူတွေလည်းအားတင်းထားကြဖို့ရယ်။ ပေါ်တာတွေလည်း တ အား ဆွဲနေလို့ မလိုအပ်ဘဲ လမ်းပေါ်မထွက်ကြဖို့နဲ့ ပြည်သူကို နှိပ်စက်နေတဲ့ မည်သည့်အဖွဲ့အစည်းကိုမဆို အချိန်မရွေး တိုက်ခိုက်သွားမယ် ဆိုတဲ့အ ကြောင်းလေး ပြောချင်ပါတယ် “ဟု လင်းယုန်ညီနောင် ပြောက်ကျားတပ်ဖွဲ့ မှ တာဝန်ရှိသူကပြောဆိုသည်။
အဆိုပါ ကံတလူ စစ်ဆေးရေးဂိတ်ကို ဇန်နဝါရီလ ၁၅ ရက်နေ့တွင် လင်းယုန်ညီနောင်ပြောက်ကျားတပ်ဖွဲ့က ဝင်ရောက်တိုက်ခိုက်သိမ်းပိုက်ကာ ဖောက်ခွဲဖျက်ဆီးနိုင်ခဲ့ပြီး အချိန်အတန်ကြာ ပြည်သူလူထုအပေါ်တွင် ငွေကြေးကောက်ခံနိုင်ခြင်းမရှိဘဲ ရပ်တန့်သွားခဲ့ကြောင်း သိရှိရသည်။
သို့ရာတွင် လက်ရှိချိန်တွင် ပြည်သူများအပေါ် အဓမ္မ ဆက်ကြေးကောက်ခံမှုများ ထပ်မံ လုပ်ဆောင်နေ၍ တိုက်ခိုက်ခြင်းဖြစ်ကြောင်း လင်းယုန်ညီနောင် ပြောက်ကျားတပ်ဖွဲ့က အသိပေး ပြောဆိုထားသည်။
