ရန်ကုန်၊ ဧပြီ ၂၃
တနင်္သာရီတိုင်း၊ မြိတ်မြို့နယ်တွင် ကိုရင်ငယ်ကို လူမဆန်စွာ ရိုက်နှက်ခဲ့သည့် ပဋိပတ္တိတောရကျောင်း၏ ကျောင်းထိုင်ဘုန်းကြီး ဦးတေဇကို လူဝတ်လဲပြီး ထောင်ဒဏ် ၂ နှစ်ချမှတ်နိုင်သောပုဒ်မ ၂၉၅ (က) ဖြင့် အမှုဖွင့်ဖမ်းဆီးလိုက်ကြောင်း အဆိုပါအမှုကို လိုက်ပါကူညီဆောင်ရွက်နေသော ဆရာတော် ဦးသုနန္ဒက ပြည်သူများသို့ အသိပေးသည်။
ဧပြီလ ၂၁ ရက်နေ့ ညနေပိုင်း ကိုရင်ငယ်ကို ဦးတေဇက ရက်ရက်စက်စက် လူမဆန်စွာ ရိုက်နှက်ခဲ့သည့် ဗီဒီယိုသည် လူမှုကွန်ရက်မှတစ်ဆင့် ပျံ့နှံ့လာခဲ့သဖြင့် ပြည်သူများအကြား ဝေဖန်မှုများ အလွန်မြင့်တက်ခဲ့ကြောင်း၊ ယင်းနောက် သာသနာရေးဦးစီးဌာန၊ ထွေ/အုပ်နှင့်ရဲများက ကိုရင်ငယ်ကို ရိုက်နှက်ခဲ့သော ကျောင်းထိုင်ဘုန်းကြီး ဦးတေဇကို ခေါ်ယူ မေးမြန်း စစ်ဆေးခဲ့ကြောင်း၊ ယင်းနောက် ယမန်နေ့ ညပိုင်းတွင် ဦးတေဇကို လူဝတ်လဲ၍ သာသနာတော်ကို စိတ်နာစေရန် ပြုလုပ်သော ပုဒ်မ ၂၉၅ (က) ဖြင့် အမှုဖွင့် ဖမ်းဆီးလိုက်ခြင်းဖြစ်ကြောင်း၊ လတ်တလော အရေးယူအမှုဖွင့်ရာတွင် ပုဒ်မတစ်ခုတည်းဖြစ်သော်လည်း စစ်ဆေးမှုအပေါ် မူတည်၍ ပုဒ်မများ ထပ်တိုးလာနိုင်ကြောင်း သိရှိရသည်။
“လူဝတ်လဲပြီး ရာဇသတ်ကြီးပုဒ်မ ၂၉၅-(က)နဲ့အရေးယူဆောင်ရွက်ထားပါကြောင်း အများပြည်သူ သိစေအပ်ပါသည်” ဟု ဆရာတော်ဦးသုနန္ဒက သတင်းထုတ်ပြန်ထားသည်။
ရိုက်နှက်မှု ကျူးလွန်သူ ဘုန်းကြီး ဦးတေဇကို အမှုဖွင့်ထားသော ပုဒ်မ၂၉၅(က)မှာ လူတစ်စားကိုးကွယ်သည့် ဘာသာ သာသနာကိုဖြစ်စေ ဘာသာရေးယုံကြည်မှုကိုဖြစ်စေ စော်ကားခြင်းဖြင့် ထို လူတစ်စား ၏ ကိုးကွယ်ရာ ဘာသာရေးစိတ်ဓါတ်ကို နာကျဉ်းစေရန်ကြံရွယ်၍ မသမာစိတ်ဖြင့် တမင်ကျူးလွန်သော ပြုလုပ်မှုဖြစ်ပြီး ယင်းအမှုကို ကျူးလွန်ပါက အာမခံမပေးနိုင် ကျေအေးခွင့်မရှိဘဲ ထောင်ဒဏ် ၂ နှစ်အထိ ထောင်ဒဏ်တစ်မျိုးမျိုးကိုဖြစ်စေ၊ ငွေဒဏ်ကိုဖြစ်စေ၊ ဒဏ် ၂ ရပ်လုံးကို ဖြစ်စေ ချမှတ်နိုင်ကြောင်း သိရှိရသည်။
မြိတ်မြို့နယ်မှ ပြည်သူတစ်ဦးကမူ အဆိုပါ အမှုအတွက် ဘုန်းကြီး ဦးတေဇကို အရေးယူသော ပုဒ်မမှာ ပေါ့လျှော့လွန်းလှပြီး ကလေးသူငယ်ကို ညှဉ်းပန်းနှိပ်စက်သည့်အတွက် ပုဒ်မကြီးစွာဖြင့် အရေးယူသင့်သည်ဟု ထောက်ပြသည်။
“သာသနာအကြောင်းပြပြီး ဘုန်းကြီးကျောင်းတွေ၊ သီလရှင်ကျောင်းတွေမှာ သာမဏေငယ်၊ ကိုရင်ငယ်နဲ့ သီလရှင်ငယ်တွေကို ညှဉ်းပန်းနှိပ်စက် ရိုက်နှက်တာတွေက ဓလေ့ကြီးလိုဖြစ်နေတော့ အဲဒါမျိုးကို ပပျောက်အောင် ပုဒ်မကြီးကြီးနဲ့ အရေးယူသင့်တယ်လို့ မြင်တယ်။ မဆုံးမနဲ့ မပြောဘူး။ မရိုက်နဲ့ မပြောဘူး။ ခြေသလုံးနဲ့ တင်ပါးကို ရိုက်လို့ရပါတယ်။ ကလေးကို တော်ရုံ တန်ရုံလောက် ရိုက်နှက်ရင် ဒီလိုကြီး မဖြစ်လာဘူး။ အခုက သေအောင် ရိုက်သလား မှတ်ရတယ်” ဟု မြိတ်မြို့နယ်မှ ပြည်သူက ရှင်းပြသည်။
ကျောင်းထိုင်ဘုန်းကြီး ဦးတေဇ၏ ရိုက်နှက်မှု ခံခဲ့ရသော ကိုရင်ငယ်ကိုမူ ဆေးစစ်မှုများ လုပ်ဆောင်နေပြီး အသက်အန္တရာယ်စိုးရိမ်စရာမရှိကြောင်း သိရှိရသည်။
