ရန်ကုန်၊ ဇူလိုင် ၆
စစ်ခေါင်းဆောင် မင်းအောင်လှိုင်၏ ညွှန်ကြားချက်ဖြင့် အစိုးရဌာနများမှ လျှို့ဝှက်ရုံးစာများ၊ ဌာနဆိုင်ရာ ဓာတ်ပုံနှင့် ဗီဒီယိုများ လူမှုကွန်ရက်များသို့ ပေါက်ကြားခြင်းများကို တားဆီးရန်အတွက် Non-CDM နိုင်ငံဝန်ထမ်းများကို ပြင်းထန်စွာ အရေးယူမည်ဟု လျှို့ဝှက်အမိန့်တစ်ရပ် ထုတ်ပြန်ထားကြောင်း စုံစမ်းသိရှိရသည်။
၂၀၂၆ ခုနှစ် ဧပြီလ ၂၈ ရက်စွဲဖြင့် ထုတ်ပြန်ထားသော “လျှို့ဝှက်” အဆင့် သတ်မှတ်ထားသည့် ညွှန်ကြားစာတွင် နိုင်ငံဝန်ထမ်းများသည် ရုံးလုပ်ငန်းများ ဆောင်ရွက်ရာ၌ ရုံးစာများ၊ လျှို့ဝှက်အဆင့်ရှိ စာရွက်စာတမ်းများ၊ ဌာနဝတ်စုံ ဝတ်ဆင်ထားသည့် ဗီဒီယိုနှင့် ဓာတ်ပုံများအပြင် ရုံးနှင့်သက်ဆိုင်သော လုပ်ငန်းဆောင်ရွက်မှုများကို TikTok၊ Telegram၊ Facebook စသည့် လူမှုကွန်ရက်များပေါ်တွင် ဖော်ပြခြင်း၊ မသက်ဆိုင်သူများထံ ရုံးစာများ ရောက်ရှိပေါက်ကြားခြင်း မဖြစ်စေရေးကို တာဝန်ရှိသူအဆင့်ဆင့်က စဉ်ဆက်မပြတ် စောင့်ကြည့်ကြပ်မတ် ဆောင်ရွက်ရန် ညွှန်ကြားထားသည်။
ထို့ပြင် အကြောင်းအမျိုးမျိုးကြောင့် အဆိုပါညွှန်ကြားချက်များကို ချိုးဖောက်ကျူးလွန်ပါက နိုင်ငံဝန်ထမ်းဥပဒေ၊ နိုင်ငံဝန်ထမ်းနည်းဥပဒေ၊ သက်ဆိုင်ရာ အမိန့်နှင့် ညွှန်ကြားချက်များသာမက တည်ဆဲဥပဒေများနှင့်အညီပါ အရေးယူခံရမည်ဖြစ်ကြောင်း သတိပေးဖော်ပြထားသည်။
အဆိုပါ ညွှန်ကြားစာတွင် ဌာနအသီးသီးမှ တာဝန်ရှိသူများအနေဖြင့် လက်အောက်ဝန်ထမ်းများအား ယင်းအမိန့်ကို သိရှိလိုက်နာစေရေး ဆင့်ပွားညွှန်ကြားရမည်ဖြစ်ပြီး ညွှန်ကြား ချက်ကို နားလည်သဘောပေါက်ကြောင်းနှင့် လက်ခံရရှိကြောင်းကိုလည်း ပြန်လည်အကြောင်းပြန်ရန် ထည့်သွင်းညွှန်ကြားထားကြောင်း သိရသည်။
စစ်ကောင်စီလက်အောက်ရှိ ဝန်ကြီးဌာနများနှင့် ဌာနဆိုင်ရာများမှ လျှို့ဝှက်ရုံးစာများ၊ အတွင်းရေးအမိန့်များနှင့် စီမံခန့်ခွဲရေးဆိုင်ရာ စာရွက်စာတမ်းများ မကြာခဏ ပြင်ပသို့ ပေါက်ကြားလာနေသည့်အတွက် ယခုကဲ့သို့ Non-CDM နိုင်ငံဝန်ထမ်းများကို ဥပဒေအရ ပြင်းထန်စွာ အရေးယူမည်ဟု လျှို့ဝှက်ညွှန်ကြားချက် ထုတ်ပြန်လာခြင်းဖြစ်ကြောင်း နေပြည်တော်စစ်ဘက်သတင်းရင်းမြစ်က ပြောဆိုသည်။
မင်းအောင်လှိုင်သည် စစ်အာဏာသိမ်ခဲ့သည့် ၂၀၂၁ ခုနှစ်မှစတင်၍ ရုံးစာနှင့် ဌာနဆိုင်ရာ ညွှန်ကြားစာများ မကြာခဏ ပြင်ပသို့ ပေါက်ကြားမှုများကို အရေးယူရန် အကြိမ်ပေါင်းများစွာ အမိန့်ထုတ်ညွှန်ကြားခဲ့သော်လည်း ယနေ့ ၅ နှစ်ကျော်ကြာမြင့်သည်အထိ အောင် မြင်ခြင်းမရှိသေးဘဲ ယင်းကဲ့သို့ အမိန့်ကိုသာ ဆက်လက် ထုတ်ပြန်နေရဆဲဖြစ်ကြောင်း နေပြည်တော်စစ်ဘက်သတင်းရင်းမြစ်က ရှင်းလင်းပြောဆိုသည်။
