ရန်ကုန်၊ နိုဝင်ဘာ ၁၀
ရန်ကုန်တိုင်း၊ ရန်ကုန်မြစ်အတွင်း ဆီတင်သင်္ဘောတစ်စီး ပေါက်ကွဲမှုဖြစ်ပြီး မီးလောင်နေသဖြင့် ငြိမ်းသတ်နေကြောင်း မီးသတ်တပ်ဖွဲ့နှင့် ရန်ကုန်မြို့ခံများထံမှ သိရှိရသည်
နိုဝင်ဘာလ ၁၀ ရက်နေ့ မွန်းလွဲ ၂ နာရီ ၃၅ မိနစ်အချိန် ရန်ကုန်တိုင်း၊ ဗိုလ်တထောင်မြို့နယ်၊ လင်းစဒေါင်းတံတားအနီး၊ ရန်ကုန်မြစ်အတွင်း သင်္ဘော ၁ စီး မီးလောင်မှုဖြစ်ပွား၍ မီးငြိမ်းသတ်နေဆဲဖြစ်ကြောင်း မီးသတ်တပ်ဖွဲ့၏ အဆိုအရ သိရှိရသည်။
“သံလျက်စွန်းဘက်မှာ ရေတပ်အတွက် ဆီတင်လာတဲ့သင်္ဘော မီးလောင်တာလို့ကြားတယ်။ သေချာတော့မသိဘူး။ ဒီဘက်မှာ အဲဒီလိုပြောနေကြတာ” ဟု မြန်မာ့ဆိပ်ကမ်းအာဏာပိုင် သတင်းရင်းမြစ်က ပြောသည်။
ဒေသခံတစ်ဦးကမူ ရန်ကုန်မြစ်အတွင်း ဆီတင်သင်္ဘောသည် ပေါက်ကွဲမှု များဖြစ်ပွားပြီးမှ မီးထလောင်ခြင်းဖြစ်ကြောင်း၊ ပေါက်ကွဲသံကြောင့် ရန်ကုန်မြို့ရှိ တိုက်တာများ ပြတင်းပေါက်မှန်များ တုန်ခါသွားကြောင်း သိရှိရသည်။
“ပေါက်ကွဲသံကြောင့် ပြတင်းမှန်တွေ တုန်ခါသွားတယ်” ဟု ရန်ကုန်မြို့ခံတစ်ဦးက ဆိုသည်။