ယာယီသမ္မတ အမည်တပ်ထားသည့် မြင့်ဆွေ ငုတ်တုတ် ရှိနေသည့်ကြားမှ သမ္မတအဆောင်အယောင် ရွှေစလွယ်ဝတ်၍ ဂုဏ်ထူးဆောင်ဘွဲ့များ ချီးမြှင့်မှု မင်းအောင်လှိုင် သမ္မတရူး ရူးနေမှုကို ပိုမို ပေါ်လွင်စေလာ
ရန်ကုန်၊ ဇန်နဝါရီ ၂
ယာယီသမ္မတ အမည်တပ်ထားသည့် မြင့်ဆွေ ငုတ်တုတ်ရှိနေသည့်ကြားမှ သမ္မတအဆောင်အယောင် ရွှေစလွယ်ဝတ်၍ မင်းအောင်လှိုင်က ဂုဏ်ထူးဆောင်ဘွဲ့များချီးမြှင့်မှုသည် သမ္မတရူး ရူးနေသည့် မြင်ကွင်းကို ပိုမို ပေါ်လွင်သိသာစေကြောင်း နေပြည်တော် သတင်းရင်းမြစ်များက ပြောသည်။
နေပြည်တော်တွင် ဇန်နဝါရီလ ၁ ရက်နေ့ ကျင်းပသည့် ၃ ခုနှစ် (၇၅) နှစ်မြောက် စိန်ရတု လွတ်လပ်ရေးနေ့ အထိမ်း အမှတ် ဂုဏ်ထူးဆောင်ဘွဲများ ချီးမြှင့်အပ်နှင်းခြင်း အခမ်းအနား သို့တက် ရောက်ပြီး သမ္မတအဆောင်အယောင် ရွှေစလွယ်ဝတ်၍ ဂုဏ်ထူးဆောင်ဘွဲ့များ ပေးအပ်ချီးမြှင့်ခြင်းမှာ ၎င်းတို့ ရေးဆွဲထားသည့် ၂၀၀၈ ခုနှစ် အခြေခံဥပဒေကို ချိုးဖောက်ခြင်း ဖြစ်ကြောင်း ဥပဒေကျွမ်းကျင်သည့် နေပြည်တော်သတင်းရင်းမြစ်တစ်ခုက ပြောသည်။
“သမ္မတရွှေစလွယ်က န၀ရတ်ကိုးပါးပါတယ်။ မင်းအောင်လှိုင်ဝတ်ထားတဲ့ ရွှေစလွယ်မှာ န၀ရတ်ကိုးပါး မပါဘူး။ ဒါပေမယ့် သမ္မတနဲ့ ဒုတိယသမ္မတ အဆောင်အယောင် ရွှေစလွယ် လိုက်ဝတ်တာ။ သမ္မတ၊ ဒုတိယသမ္မတ အဆောင် အယောင်တွေကို သူယူသုံးတဲ့သဘောပဲ။ အဲဒါ သုံးခွင့်မရှိဘူး။ နောက်ပြီး သူက အိမ်စောင့်အစိုးရလို့ နာမည်တပ်ပြီး ဝန်ကြီးချုပ် ရာထူး ယူထားတာဖြစ်တယ်။ ၂၀၀၈ အခြေခံ ဥပဒေအရ နိုင်ငံတော်အကြီးအကဲလို့ ပြောရင် သူတို့တရားဝင် အသိအမှတ်ပြုထားတဲ့ ယာယီသမ္မတ မြင့်ဆွေရှိနေတယ်။ မြင့်ဆွေ တက်ပြီး ပေးရမယ်။ မင်းအောင်လှိုင်မှာ အဲဒီလို ပေးခွင့်မရှိဘူး။ ဥပဒေ တရားဝင် ပြဋ္ဌာန်းချက်ကို သူချိုးဖောက်လုပ်တာ” ဟု နေပြည်တော်သတင်းရင်းမြစ်က ပြောဆိုသည်။
၂၀၀၈ ဖွဲ့စည်းပုံ အခြေခံဥပဒေ အခန်း ၅ အုပ်ချုပ်ရေး၊ ပုဒ်မ ၂၀၅ (က) (ခ) တွင် နိုင်ငံတော်သမ္မတ သည် ဥပဒေနှင့်အညီ ဂုဏ်ထူးဆောင်ဘွဲ့များ၊ ဂုဏ်ထူးဆောင်ဘွဲ့တံဆိပ်များ ချီးမြှင့် အပ်နှင်းခြင်းပြု နိုင်ပြီး ရုပ်သိမ်းခြင်းပြုနိုင်ကြောင်း ပြဋ္ဌာန်းထားသည်။
“၂၀၀၈ ဥပဒေနဲ့ မညီဘဲ အာဏာသိမ်းတယ်။ ၂၀၀၈ ဥပဒေပါ ပြဋ္ဌာန်းချက်နဲ့ ဆန့်ကျင်ပြီး သမ္မတ လုပ်ပိုင်ခွင့်တွေကို သူက အကုန်ယူသုံးတာ။ သမ္မတရူး ရူးနေတာ ပိုပေါ်လွင်စေတာပေါ့။ သူလုပ် ချင်ရာလုပ်တာပေါ့။ ယာယီသမ္မတ နာမည်တပ်ထားတဲ့ မြင့်ဆွေငုတ်တုတ်ကြီးရှိနေတာ။ ဟိုကလည်း ငြိမ်ခံနေရတဲ့သဘောပဲ” ဟု နေပြည်တော် သတင်းရင်းမြစ်က ဆိုသည်။
မင်းအောင်လှိုင်သည် သမ္မတရူး ရူးနေလျက်ရှိရာ လက်ရှိ နိုင်ငံတော် သမ္မတအိမ်တော်တွင် အဆောင် များတိုးချဲ့ခြင်း၊ အသစ်ဆောက် လုပ် ခြင်း အပါအဝင် အိမ်တော်ပြုပြင်ရေး လုပ်ငန်းများကို ၎င်း စိတ် တိုင်းကျ လုပ်ဆောင်နေကြောင်း ၊ ၇၅ နှစ်မြောက် စိန်ရတု လွတ်လပ်ရေးနေ့တွင် လည်း ဗိုလ်ရှု သဘင် အခမ်းအနားဖြင့် အလေးပြု ခံမည်ဖြစ်ကြောင်း သိရှိရသည်။
