ခင်ဦး၊ မြကန်ရွာကို စစ်တပ်က မီးတင်ရှို့နေ
ရန်ကုန်၊ ဇန်နဝါရီ ၂
စစ်ကိုင်းတိုင်း၊ ခင်ဦးမြို့နယ် မြကန်ရွာကို အကြမ်းဖက် စစ်တပ် မီးတင်ရှို့နေကြောင်း ခင်ဦးမြို့နယ် သတင်းမှန်ကြားရေး အဖွဲ့ထံမှ သိရသည်။
ဇန်နဝါရီလ ၂ ရက်နေ့ နံနက် ၉ နာရီခန့်တွင် အကြမ်းဖက် စစ်တပ်မှ ကျေးရွာအတွင်း သေနတ်များ ပစ်ဖောက်ကာ ဝင်ရောက် စီးနင်း မီးရှို့နေခြင်းဖြစ်ကြောင်း သိရသည်။
ယင်းအကြမ်းဖက် စစ်တပ် စစ်ကြောင်းသည် နံနက် ၈ နာရီ ၃၃ မိနစ်ခန့်တွင် ခင်ဦးမြို့နယ် အနောက်ခြမ်းရှိ အင်းပတ်ဘူတာ ရထားသံလမ်းဘက်မှ ခြေလျင်တက်လာပြီး စပါးရိတ် တောင်သူများကို လိုက်လံပစ်ခတ်ပြီးနောက် မြကန်ကျေးရွာ အနီးရောက် ရှိလာခြင်းဖြစ်ကြောင်း သိရသည်။
ထို့ပြင် ခင်ဦးမြို့နယ် အရှေ့မြောက်ပိုင်းရှိ အလယ်ရှိုရွာတွင် ၅ ရက်ကြာ တပ်စွဲထားသော အကြမ်းဖက် စစ်တပ်က ဇန်နဝါရီလ ၁ ရက်နေ့ ညနေ ၅ နာရီစတင်ကာ ကျေးရွာအတွင်းရှိ ပြည်သူပိုင် နေအိမ်များကို မီးရှို့ဖျက်ဆီးနေပြီး ယနေ့ နံနက်ပိုင်းထိ မီးခိုးများ မြင်တွေ့နေရကြောင်း ခင်ဦးမြို့နယ် သတင်းမှန်ကြားရေး အဖွဲ့ထံမှ သိရသည်။
