ရန်ကုန်၊ ဖေဖော်ဝါရီ ၁၁
အကြမ်းဖက် စစ်ခေါင်းဆောင် မင်းအောင်လှိုင် ဗိုလ်ရှုခံရန် နာရီပိုင်းအလို နေပြည်တော်၊ တပ်ကုန်းမြို့မစျေးနှင့်ပျဉ်းမနားတို့တွင် ယခုည ဗုံးများပေါက်ကွဲကြောင်း နေပြည် တော် Ngwe Soe NPT – PDFမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနသို့ ပြောဆိုသည် ယခုည နေပြည်တော် သဇင်ဆောင်အနီးတွင်လည်းကောင်း၊ ည ၉ နာရီ ကျော်ခန့် တပ်ကုန်းမြို့မစျေးတွင်လည်းကောင်း၊ ည ၁၀ကျော်ခန့်တွင် ပျဉ်းမနားမြို့၊ ဂွကြားရပ်ကွက်(ဘိုးဘွာရိပ်သာအနီး)တွင်ရှိ ရေနံသိုလှောင်ရုံသို့ ဗုံးခွဲတိုက်ခိုက်ကြောင်း သိရှိရသည်။ အလားတူ ယနေ့ မွန်းလွဲ ၂ နာရီခွဲတွင် မန္တလေးတိုင်းဒေသကြီး၊မတ္တရာမြို့နယ် အရှေ့ခြမ်းတွင် လှည့်လည်သောင်းကျန်းနေသော စစ်ကောင်စီစစ်ကြောင်းကို မြောင်းသစ်ကျေးရွာနှင့် ကျပ်ပြင်ကျေးရွာကြားတွင် နဂါးညီနောင် Local PDF အဖွဲ့က မိုင်း ၈ လုံး(ပဒေသာမိုင်း)ဖြင့် မိုင်းဆွဲတိုက်ခိုက်ခဲ့ကြောင်း သိရှိရသည်။ အလားတူ မန္တလေးတိုင်း ကျောက်ဆည်ခရိုင်မြစ်သားမြို့နယ်နှင့်နွားထိုးကြီးမြို့နယ်အစပ်အနီး နွားထိုးကြီးမြို့နယ် ဖုံသာကြီးတောကျောင်းနှင့်ဘုတ်ကုန်းရွာကြားရှိ စစ်တပ်ပိုင် မိုင်တဲလ်တာဝါတိုင်ကို ယမန်နေ့ညပိုင်းတွင် ဖောက်ခွဲဖျက်ဆီးခဲ့ပြီး ၎င်းတာဝါတိုင် ဖေါက်ခွဲမှုကို လာရောက်စစ်ဆေးသည့် ရဲအင်အားဆယ်ဦးပါကားကို ယနေ့ အပြင်းစားမိုင်းငါးလုံးဆွဲ၍ တိုက်ခိုက်ခဲ့ ကြောင်း ကျောက်ဆည်ခရိုင်ပြည်သူ့ကာကွယ်ရေးတပ်ပေါင်းစု (ပကဖ)က သတင်းထုတ်ပြန်သည်။ ထို့ပြင် ယနေ့ ည ၇ နာရီ ၃၀ မိနစ်အချိန် ဧရာ၀တီတိုင်း ဖျာပုံခရိုင်၊ ကျိုက်လတ်မြို့နယ် ကျိုလတ်စစ်ဆေးရေးဂိတ် (မအူပင်အထွက်) မြို့ပြင်ဗုံးပေါက်ကွဲမှု ဖြစ်ပွားခဲ့ပြီး ပစ်ခတ်မှုဖြစ်ပွားကာ စစ်သား ၁ ဦး သေဆုံးသွားကြောင်း သိရှိရသည်။ “ကျိုက်လတ်မြို့ဝင်စစ်ဆေးရေးဂိတ်မှာဒီနေ့ည ၇ ခွဲမှာ ဗုံးပေါက်ပါတယ်။ ပစ်တဲ့သူကဆိုင်ကယ်နဲ့လာပစ်တာပါ။ စစ်သားတွေပက်လက်လန်သွားကြပါတယ်။ နောက်ပြီးတော့လာပစ်တဲ့လူကဆိုင်ကယ်မောင်းပြေးတော့သေနတ်နဲ့အတွဲလိုက်ပစ်ပေမယ့် မထိပါဘူး။ စစ်ကားတွေနဲ့သေနတ်ပစ်ဖောက်ပြီးမအူပင်ဘက်ကိုလိုက်သွားကြတယ်လို့လဲသိရပါတယ်။ ဖြစ်တာက ကျိုက်လတ်_မအူပင်လမ်း (ကျိုက်လတ်မြို့ဝင်စစ်ဆေးရေးဂိတ်)မှာပါ” ဟု ဒေသခံတစ်ဦးက ပြောသည်။ အလားတူ ယနေ့ည ၈ နာရီ ဧရာ၀တီတိုင်း ကျုံပျော်မြို့နယ်၊ အထောင်မြို့ EPC ရုံးတွင် ဗုံးပေါက်ကွဲမှု ဖြစ်ပွားပြီး မီးကြိုးများ လိုက်ဖြတ်လေ့ရှိသော Non CDM ဝန်ထမ်း ဦးဇော်ဝင်း ထိခိုက်ဒဏ်ရာရကြောင်း သိရှိရသည်။အလားတူ ရန်ကုန်တိုင်း၊ အင်းစိန်မြိုနယ်၊ ရွာမအနောက်ရပ်ကွက်၊ ဖန်ချက်စက်ရုံလမ်းရှိ မုဒိတာအိမ်ယာ ၂ တွင် ဖေဖော်ဝါရီလ ၁၁ ရက်နေ့ ည ၇ နာရီ ၁၅ နာရီအချိန်ဗုံးပေါက်ကွဲပြီး အမျိုးသမီးတစ်ဦး ထိခိုက်ဒဏ်ရာရရှိကြောင်း သိရှိရသည်။
ဓာတ်ပုံ- အကြမ်းဖက်စစ်ခေါင်းဆောင် မင်းအောင်လှိုင် ဗိုလ်ရှုခံရန် ပြင်ဆင်ထားသော နေပြည်တော်မြင်ကွင်းများ။
