ရန်ကုန်၊ မေ ၁၉
ကရင်ပြည်နယ်၊ မြ၀တီမြို့နယ်ရှိ အကြမ်းဖက်စစ်ကောင်စီတပ်၏သေ့ဘောဘိုး စခန်းကို စစ်တပ်က ဆုံးရှုံး လက် လွှတ် လိုက်ရပြီးနောက် ယနေ့ နံနက်အစောပိုင်းတွင် လေးကေ့ကော်ကို လေယာဉ်များဖြင့် လာရောက် ဗုံးကျဲရာ ပြည်သူ့ရဲဘော် ၃ ဦးထိခိုက်ဒဏ်ရာရရှိပြီး ၁ ဦးစိုးရိမ်ရကြောင်း PDF သတင်းရင်းမြစ်ထံမှ သိရှိရသည်။
“မြဝတီလေးကေ့ကော်မှာ ဒီမနက် ၂ နာရီ မှာ တစ်ခါ ၊ ၂ နာရီ ၂၈ မိနစ်မှာ ဒုတိယအကြိမ် နှစ်ခါလေယဥ်နဲ့ ဗုံး လာကျဲသွားပါတယ်။ ပထမတစ်ခါက ဗုံးကျဲတော့ မြ၀တီဘက်က မြေတွေပါတုန်တယ်။ မနေ့ည ၉ နာရီလောက်တုန်းကလည်း မြဝတီဘက်ကနေ လေကေ့ကော်ဘက်ကိုစစ်အင်အားကားအစီးရေ ၂၀ လောက်တက်သွားပါတယ်” ဟု မြ၀တီဒေသခံတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
PDF သတင်းရင်းမြစ်ကမူ စစ်လေယာဉ်ဖြင့် လေးကေ့ကော် ကော်ဘရာစခန်းကို စစ်တပ်က ဗုံးလာကျဲပြီး ပြည်သူ့ဘက်တော်သား ရဲဘော် ၃ ဦးထိခိုက်ဒဏ်ရာရရှိကြောင်း၊ ၁ ဦးစိုးရိမ်ရကြောင်း ပြောဆိုသည်။
ယမန်နေ့ တိုက်ပွဲများကြောင့် ထိုင်းနိုင်ငံဘက်ခြမ်းသို့ မြန်မာဘက်ခြမ်းမှ စစ်ဘေးရှောင်ပြည်သူ ၅၀၀ နီးပါး ထွက်ပြေးတိမ်းရှောင်ရပြီး ထိုင်းဘက်က လက်ခံထားရှိကြောင်း သိရှိရသည်။
